LECTURAS LUNES DUODÉCIMA SEMANA

LECTURAS LUNES DUODÉCIMA SEMANA

LECTURA PETEÎHA:

Ko’ágã  ñahendúta Tupã Ñandejára ñe’ẽ mokõiha Reyes arandukápe oĩ háicha  17, 5-8. 13-15a. 18

Salmanasar, mburuvicha guasu Asiria pegua, ojasuru pe tetãme ha omongora Samaría ondyrývo hese mbohapy áño pukukue. Ipahápe, áño 9 oisãmbyhy haguépe Oseas, oñemomba’e Samaría rehe, ha Israel guápe ogueraha jepokuahápe Asiria gotyo ha omohenda Halah héravape, ysyry Gozán pegua Habor yvýpe, ha Médo távakuérape.

Kóva ojehu Israelgua ojapo haguére ivaíva Tupã Ijára renondépe, oguenohẽ va’ekue ichupe kuéra Egíptogui ha oipe’a Egipto ruvicha guasu faraón po guýgui; ha’ekuéra katu omomba’e guasu ambue tupã nguéra, ha ojapo mba’e vai ojapóva tetãnguéra Tupã Ñandejára omosẽ va’ekue henonderãgui, ha umi mba’e vai ojapouka va’ekue ichupe kuéra Israel ruvicha guasukuéra.

Opa maranduhára ha mba’e rechahára rupi, Tupä Ñandejára omomarandu va’ekue Israel guápe oheja haguã hape vai ha ojapo haguã Tupã Ñandejára rembiapoukapy, hembipota ha ñehekombo’e ome’ẽ va’ekue itúvakuéra ypy kuépe hembiguái maranduhára kuéra rupi. Ha’ekuéra katu ndoikuaaséi mba’eve, akóinte uvei oikose iñakãre itúvakuéra ypykuéicha, ndojeroviái va’ekue Tupã Ijárare, omboyke hembipota ha pe Ñe’ẽ ñome’ë ojapo va’ekue itúva kuéra ypykue ndive, ha hembiapoukapy ome’ẽ va’ekue ichupekuéra.

Upéva ári oho tupã nguéra rapykuéri naiporãiva maraverã, ha upéicha ha’ekuéra avei naiporãi maraverã, ha ojapo umi mba’e tetã nguéra ijere rehegua ojapóva, Tupã Ñandejára he’i va’ekue ichupekuéra ani haguã ojapo.

Ajeve Ñandejára ipochy rendy Israelgua ndive ha omosẽ henondégui ichupe kuéra; Judá ñemoñare año iténte oheja.

Tupã Ñandejára Ñe’ẽ.

SALMO ÑEMBOHOVÁI 59, 3-5. 12-14

Opavave: Tupã Ñandejára, ejúna ore pe’a ko jejopy vaígui.

Háa Tupã Ñandejára! Nde pochýgui niko ore reja reípa ha ore mosarambipa.

Eju jeýna eiko ore ndive.

Yvy niko remboryrýi ha rejokapa. O.

Embotypa jeýna umi ojeka hague, cháke ho’apa.

Ne retã guápe heta rembohasa asy, emoïvo ijapére mba’e pohýi re’uka oréve vino ore mbotarováva. O.

Nandéi nga’u piko Tupã, upe ore mboykéva,

ha neresẽvéi reñorairõvo ore ykére?

Eju ore pe’a ore jopývagui,

orénte ramo nda ore pu’aka mo’ãi. O.

ALELUIA Heb 4, 12

Aleluia.

Tupã Ñandejára Ñe’ẽ hekove ha imbarete;

oiporavo umi ñane akäme jarekóva ha ñane korasõ rembipota.

Aleluia.

EVANGELIO

Ko’ágã  ñahendúta Ñandejára Jesucristo rekove ha hemimbo’e San Mateo omombe’u háicha   7, 1-5

Upe ramo Jesús he’i hemimbo’ekuérape:

Ani pemoĩ vai pende rapichápe, nda peipotái ramo Tupã Ñandejára pene moĩ vai peẽme. Tupã Ñandejára pene moĩ vaíta peẽme, peẽ peporomoĩ vai háicha. Ha peẽ pejapo háicha pende rapicháre Tupã Ñandejára ojapóta pende rehe.

Mba’éicha piko rehecha pe yvyra ku’i nde ryvy resápe oĩva, ha nderehechái pe yvyra poguasu nde resápe voi rerekóva? Mba’éicha piko eréta nde ryvýpe: “Taipe’a ndéve pe yvyra ku’i nde resápe oĩva”, nde voi rereko ramo peteĩ yvyra poguasu nde resápe? Nde, tekove rova mokõi! Eipe’a raẽ pe yvyra poguasu nde resape oĩva rehecha porã haguã, ha upéi reipe’a haguã pe yvyra ku’i nde ryvy reságui.

Ñandejára Jesucristo Ñe’ẽ