LECTURAS MIÉRCOLES DUODÉCIMA SEMANA

LECTURAS MIÉRCOLES DUODÉCIMA SEMANA

LECTURA PETEÎHA:

Ko’ágã ñahendúta Tupã Ñandejára ñe’ẽ mokõiha Reyes arandukápe oĩ háicha 22, 8. 10-13; 23, 1-3

Pa’i guasu Hilquías omombe’u mba’e haihára Safánpe ojuhu hague tupaópe kuatiañe’ẽ oĩ háme Tupã Ñandejára rembiapoukapy, ome’ẽ ichupe upe kuatiañe’ẽ ha Safán omoñe’ẽ. Upéi Safán oho omombe’u kóva mburuvicha guasúpe ha he’i ichupe: Ne rembiguáikuéra, che ruvicha guasu, omboyku pe pláta oĩva tupaópe ha ome’ẽ umi tupao ñemoatyrõre oñangarekóvape.

Omombe’u avei Safán mburuvicha guasúpe pa’i Hilquías ojuhu hague peteĩ kuatiañe’ẽ ha Safán ohenduka ichupe umi mba’e pype ojehaíva.

Mburuvicha guasu ohendúvo upe kuatiañe’ẽ oĩ háme Tupã Ñandejára rembiapoukapy, omondoro ijao, ha he’i Hilquías, Safán ra’y Ahicam, Micaías ra’y Abdón, kuatia haihára Safán ha mburuvicha guasu rembiguái Asaíaspe: Ta peho peporandu Tupã Ñandejárape, che rérape ha opa Israel ha Judagua rérape, mba’épa he’i pe kuatia Ñe’ẽ ojejuhu va’ekuépe. Oime va’erã Tupã Ñandejára ipochy hendy hína ñane ndive, ñande ru kuéra ypykue ndoikuaaséi haguére mba’eve ichugui ha ndojaposéi haguére pe he’íva.

Upérõ mburuvicha guasu ohenoiuka opa moakãhára Judá ha Jerusalén guápe, oñemboaty haguã hendive. Upéi mburuvicha guasu, kuimba’ekuéra Judagua, opavave Jerusalénpe oikóva, pa’i kuéra, maranduhárakuéra ha tetãgua oĩ haguéicha, oho tupaópe.

Upépe mburuvicha guasu omoñe’ẽ hatã ichupekuéra opa mba’e oje’éva pe ñe’ẽ ñome’ẽrehegua kuatiápe, ojejuhu va’ekue tupaópe. Upéi mburuvicha guasu oñembo’y pe horkon ykére, ha ome’ẽ iñe’ẽ Tupã Ñandejára renondépe iñe’ẽ rendúvo ichupe, ojapóvo heko itépe ha ipy’aite guive opa umi hembiapoukapy, ha omboajévo opa mba’e ojehaíva pe kuatiápe. Ha opavave ome’ẽ iñe’ẽ ojapóvo pe oje’éva.

Tupã Ñandejára Ñe’ẽ.

SALMO ÑEMBOHOVÁI 118, 33-36. 39-40

Opavave: Ore Jára, che moarandu ne rembiapoukapýpe.

Ore Jára, che moarandu ne rembiapoukapýpe,
umíva he’i háicha niko aikose.
Che mbo’e umi ne rembiapoukapy,
che py’a ite guive ajapo haguã upe he’i háicha. O.

Che mboguata ne rembiapoukapy rapére,
upéva chéve che mbovy’a.
Che py’a to japoseve seve ne rembipota,
ha anítei imba’e potasénte. O.

Ani reheja che resa amoĩ mba’e
rei reíre, ne Ñe’ẽ mente taiko.
Ne rembiapoukapy ahecha ramo,
che moingove kena, nde niko nde reko joja. O.

ALELUIA Jn 15, 4a. 5b
Aleluia.
Ñandejára Jesucristo he’i: “Peime che ndive, che aime háicha penendive.
Pe oïva che ndive heta mba’e porã osẽ ichugui”.
Aleluia.

EVANGELIO

Ko’ágã ñahendúta Ñandejára Jesucristo rekove ha hemimbo’e San Mateo omombe’u háicha 7, 15-20

Upe ramo Jesús he’i hemimbo’ekuérape: Peñe ñangarekóke maranduhára japu pene rendápe oúvagui. Ijape guio ojogua ovechápe, ipy’apýpe katu aguara guasu ñarõ. Hembiapo kuére peikuaáta ichupekuéra. Ndo jepo’ói niko úva ñuatĩ mátagui, térã ígo ñuatĩ pytãgui. Ha péicha, yvyra iporãva hi’a porã. Umi yvyra ivaíva katu hi’a vai.

Ndaikatúi pe yvyra iporãva hi’a vaívo, térã pe yvyra ivaíva hi’a porãvo. Opa yvyra ndahi’a porãiva oñekytĩva ha oñemombo tatápe. Ha péicha, hembiapo kuére peẽ pehecha kuaáta mávapa umi maranduhára japu.

Ñandejára Jesucristo Ñe’ẽ