LECTURAS LUNES 3º TIEMPO DURANTE EL AÑO

LECTURA PETEÎHA:

Ko’ágã ñahendúta Tupã Ñandejára ñe’ẽ Samuel arandukápe oĩ háicha 5, 1-7. 10

Israel ñemoñaregua oho Hebrónpe oñe’ẽ haguã David ndive ha he’i hikuái ichupe: “Ore niko nde ruguy tee, ha Saúl ramo jepe ore ruvicha guasu, ndénte voi reisãmbyhy va’ekue Israel guápe ñorairõháme. Hi’arive, Tupä Ñandejára ome’ẽ ndéve iñe’ẽ ndetaha upe omoakãva ha oisãmbyhýva Israel.”

Upéicha opa moakãhára  Israelgua oho ha oñe’ẽ David ndive Hebrónpe, ha ha’e oñoñe’ẽ me’ẽ hendive kuéra, omoĩvo Tupã Ñandejárape mba’e rechahárõ. Upérõ ha’ekuéra omoĩ Davídpe Israel ruvicha guasúrõ. David oguereko 30 áño oñepyrũrõ oisãmbyhy, ha oisãmbyhy 40 áño. Hebrónpe oiko Judá ruvicha guasúrõ 7 áño imédio, ha upéi Jerusalénpe Israel ha Judá ruvicha guasúrõ 33 áño. Mburuvicha guasu David ha iñirũ nguéra oho Jerusalén gotyo ondyry haguã jebuseo kuérare, oikóva upe tetãme.

Umíva he’i Davídpe: “Nde nga’u piko reikéta ápe! Hesatũ ha ikarẽva jepe niko nde jokóta!” David katu oñemomba’e Sión táva oñeñangareko mbaretévare, Ko’ágã  “David távape” ojekuaáva. David oñemombareteve ohóvo, ha Tupä Ñandejára ipu’akapáva oĩ hendive.

Tupã Ñandejára Ñe’ẽ.

SALMO ÑEMBOHOVÁI 88, 20-22. 25-26

Opavave: Tupã Ñandejárape ahayhúne ha namboykéi chéne

Che képe Nde reñe’ë va’ekue

Yma rejechauka va’ekue umi nde rehe ojeroviávape

ha ere va’ekue: “Kuimba’e ikatupyrývape aipytyvõ, iporavopyrévape ahupi. O.

Che rembiguái Davídpe ajuhu

ha añohẽvo iñakãre ñandy ryku marangatu

amoingo mburuvicha guasúrõ,

Ichupe opa ára aipytyvõne ha amombareténe. O.

Ichupe ahayhúne ha namboykéi chéne,

ha che rupi imbaretevéne uvei.

Yguasu guive Éufrates ysyry ári ipo oipysóta ysyry ári ijakatúa omoĩne ipo. O.

ALELUIA    Cf. 2Tim  1, 10b

Aleluia.

Ñandejára Jesucristo ñane Pysyröhára ipu’aka manóre ha ombojajái tekove, Marandu porã rehe ae.

Aleluia.

EVANGELIO

Ko’ágã ñahendúta Ñandejára Jesucristo rekove ha hemimbo’e San Marcos omombe’u háicha   3, 22-30

Upe ramo guare Moisés rembiapoukapy mbo’ehakuéra oguahẽ va’ekue Jerusaléngui he’i avei hese: “Beelzebú, Aña nguéra ruvicha voi niko hína pe ohejáva ichupe omosẽ umi mba’epochykuérape”

Jesús ohenói ha he’i ichupekuéra ñe’ẽ mbojojápe: “Mba’éicha piko ikatúta Aña voi omosẽ Añáme? Peteĩ tetã oñemboja’opa ramo ha maymáva opu’ã oñoakãre, ndaikatúi upe tetã oiko arévo. Ha peteĩ óga pegua opu’ãmba ramo ojuehe oñehundi avei. Péicha avei, Satana voi opu’ãrõ ijehe ndaikatu mo’ãi oiko arévo ha oikopáta hese. Avave ndoike mo’ãi peteĩ kuimba’e imbaretéva rógape omonda haguã ichupe, ndoipokuái ha ndoipykuái raẽirõ.

Péicha ojapo ramo mante ikatúne omonda ichugui .

Añetehápe ha’e peẽme, Tupã Ñandejára oheja reitaha opavavépe opaichagua angaipa, ha oñe’ẽ vai haguére hese jepe. Espíritu Santo rehe ojahéivape katu ndojeheja rei chéne, opytáne hi’ári opa árape guarã.” Ko’ã mba’e Jesús he’i, ha’ekuéra he’i haguére hese oguerekoha mba’epochy.

Ñandejára Jesucristo Ñe’ẽ.