LECTURAS LUNES 4º TIEMPO DURANTE EL AÑO

LECTURA PETEÎHA:

Ko’ágã ñahendúta Tupã Ñandejára ñe’ẽ Samuel arandukápe oĩ háicha 15, 13-14. 30; 16, 5-13

Peteĩ ñe’ẽ rerahaha he’i Davídpe Israelgua oñemoirũha Absalón ndive. Upérõ David he’i opa mburuvichakuérape oĩva hendive Jerusalénpe.

Pya’éke ñakañy Absalóngui ko’ágä ite voi, cháke ñande rupitýrõ ñande jukapáta opavave ko távape ñaimévape!

David ojupi yvyty olívo rape rehe pynandi ha hasẽ ohóvo ha iñakã ojaho’i mba’e mbyasýgui. Opa iñirũ nguéra ojaho’i avei iñakã ha hasẽ ohóvo hendive. David oguahẽvo upe héravape Bahurim, peteĩ kuimba’e Saúl róga pegua osẽ upégui.

Upéva Guerá ra’y ha héra Simí, ha oñe’ẽ reity, ha oha’ã ohóvo itápe David ha mburuvichakuérape, pe mburuvicha guasúpe omo’ãro jepe igénte ha umi hese oñangarekóva. Simí oñe’ẽ reity ichupe he’ívo: Hýpy, nde porojukahára ahẽ! Tereho ko’águi! Tupã Ñandejára omoengoviáma ndéve hetaite Saúl rogaguápe rejuka haguére reiko haguã hendaguépe mburuvicha guasúrõ! Agã katu Tupã Ñandejára neme’ëma nde ra’y tee Absalón pópe, ha ápe rerotyryry rehóvo neñañangue; nde niko hína porojukahárante voi!

Upérõ Abisai, Seruiá memby, he’i mburuvicha guasúpe: Mba’ére piko ko jagua re’õngue oñe’ẽ reitýta hína che ruvicha guasúpe? Che rejána tañakã’o ichupe peteĩ sapy’a itépe! David katu he’i ichupe: Ko mba’e ndaha’éi pene ndive hína, Seruiá memby. Oime va’erãko oñe’ẽ pohýi hína chéve Tupã Ñandejára he’i haguére ichupe ojapo haguã péicha che rehe. Ha upéicharõ, mávapa he’íta ichupe mba’érepa ojapo upéva.

Upéi he’i Abisai ha mburuvicha kuérape: Che ra’y tee jepe che jukase hína, ko’ýte che jukaséta peteĩ Benjamín ñemoñaregua! Peheja tojahéi che rehe! Tupã Ñandejára niko pe he’íva ichupe ojapo haguã! Ikatu mba’éko Tupã Ñandejára, ohechávo mba’éicha itépa ajepy’apy, che rovasa ko’ã ñe’ẽ ko’ágä ahendúva rekovia.

David ha iñirũnguéra oho hapére, Simí oho aja hapykuéri pe yvyty ykére, ojahéi hese, oha’ã itápe ha omopu’ã yvy tĩmbo.

Tupã Ñandejára Ñe’ẽ.

SALMO ÑEMBOHOVÁI 3, 2-8a

Opavave: Tupã Ñandejára che guenohẽ kena ko jejopy vaígui

Che Jára, heta oĩ nda ija’éiva che rehe.
Heta oĩ opu’ãva che rehe.
Heta oĩ he’íva che rehe: “Tupã nonohẽ mo’ãi ichupe jejopy vaígui.” O.

Nde che Jára che pytyvö ani haguã ojehu chéve mba’eve.
Nde upe che myakã rapu’ãva.
Ñandejárape asapukái ha’e che pytyvõ haguã.
Ha’e, che rendu ha oñe’ẽ chéve Ijyvyty marangatu guive. O.

Añeno, ake ha upéi apáy,
ipópe Tupã Ñandejára che rerekógui.
Heta ramo jepe che mongoráva,
ndakyhyjéi ichugui kuéra. O.

ALELUIA Lc 7, 16

Aleluia.
Peteï maranduhára tuicháva osë kuri ñande apytégui ha Tupã Ñandejára ou ohechávo hetäguápe.
Aleluia.

EVANGELIO

Ko’ágã ñahendúta Ñandejára Jesucristo rekove ha hemimbo’e San Marcos omombe’u háicha 5, 1-20

Upe ramo Ñandejára Jesucristo ha hemimbo’ekuéra oguahẽ yguasu mboypýri, yvy hérava Gerásape. Jesús oguejývo kanóagui, oñemboja hendápe peteĩ kuimba’e oguerekóva mba’epochy. Ko kuimba’e osẽ ra’e umi tyvy pa’ũgui, oikógui upe rupi. Ndaipóri ikatúva omosã ichupe, ita sãme jepe. Heta jevýma ojepokua ha ojepykuapa, ha katuetei omondohopa umíva, avave ikatu’ỹre ipu’aka hese. Ára ha pyharépe oiko umi yvyty ha tyvy pa’ũ rupi, osapukáivo ha oñenupãvo itápe.

Ha ohechávo Jesúspe mombyry guive, oñani ha oñesüvo henondépe, he’i ichupe osapukaihápe: Aníke rejapo che rehe mba’eve Jesús, Tupã Yvatetegua Ra’y. Tupãre ajerure ndéve, ani haguã che mbohasa asy! He’i upéicha, he’i haguére ichupe Jesús: Mba’epochy, esẽ pe kuimba’égui!

Jesús he’i ichupe: Mba’éicha nde réra.

Ha’e he’i: Legión che réra, ore retágui ore. Ha ojerure Jesúspe ani haguã omosẽ ichupekuéra upéva upe yvýgui.

Namombyrýi upégui heta oĩ kure okarúva hína pe yvytýre. Umi mba’epochy ojerure ichupe: Ore mondóna umi kurépe, ha eheja oréve toroike ipypekuéra. Jesús oheja ichupe kuéra oike. Ha umi mba’e pochy osẽ pe kuimba’égui ha oike umi kurépe. Umi kure ohupytýva 2.000 rupi, ha hetakue umi kure oho ojepoi ýpe, ha upépe omanomba.

Umi kure rerekua pya’e oho ha omombe’u opa mba’e pe távape ha umi okaháre.

Opavave oho ohechávo upe ojehu va’ekue. Ha oguahẽvo Jesús rendápe, ohecha hikuái upe oguereko va’ekue ipype mba’epochy eta oguapy, oñemonde porã ha iñakã porã. Opavave oñemondýi. Ha umi ohecha va’ekue mba’épa ojehu pe mba’e pochy oguereko va’ekuépe ha umi kurépe, omombe’u umi ambuépe. Ha ojerure asy hikuái Jesúspe oho haguã upégui.

Jesús ojevývo kanóa oĩhápe, upe oguereko va’ekue mba’e pochy ojerure ichupe oheja haguã oho hendive. Jesús katu ndohejái ha he’i ichupe: Tereho uvei nde rógape ha emombe’u nde rogagua kuérape opa mba’e ojapo va’ekue nde rehe Tupã Ñandejára, ha mba’éichapa nde poriahuvereko. Pe kuimba’e oho ha omombe’u Decápolis táva kuéra rupi upe Jesús ojapo va’ekue hese. Ha opavave ohecha ramo.

Ñandejára Jesucristo Ñe’ẽ