LECTURAS MARTES DECIMOCUARTA SEMANA

LECTURAS MARTES DECIMOCUARTA SEMANA

LECTURA PETEÎHA:

Ko’ágã ñahendúta Tupã Ñandejára ñe’ẽ Oseas arandukápe oĩ háicha    4, 1; 8, 4-7. 11-13

Israelgua, pehendúke Tupã Ñandejára Ñe’ẽ:

Oiporavo huvicha guasurã, oporandu’ỹre chéve mba’eve, huvicharã omboguapy peteĩ che aipota’ỹva.

Ipláta ha hi’órogui ojapo ta’ãnga rei ha umíva ohundíta ichupe kuéra.

Che mbojeguaru, Samaría, pe vaka ra’y remomba’e guasúva che pochy rendy nde rehe. Araka’e peve piko reñeme’ẽta añáme?

Ko vaka ra’y ra’ãnga Samaríagui oúva, ndaha’éi tupã.

Yvypóra póguinte osẽ ha oñemoangu’ipáta.

Peñotỹgui yvytu, pemono’õta yvytu ratã.

Pende kokue nome’ĩ mo’ãi trígo, ha ome’ẽrõ, ho’úta mombyrygua. Israel, tetã nguéra rembi’u heta iterei omopu’ã altar, iñangaipa haguãnte iporãva. Ichupe guarã ahaírõ jepe umi che remimbo’e, ha’e umívagui mba’eve ndoikuaaséi. Ha’e kuéra oguerohory mymbajuka, so’ónte ho’use, che, opa mba’e Jára, katu ndavy’ái hendive kuéra, che mandu’áta umi iñañanguére, ha umívare ainupãta, Egíptope araha jevýta ichupe kuéra.

Tupã Ñandejára Ñe’ẽ.

SALMO ÑEMBOHOVÁI                   113B, 3-7ab. 8-10

R. Peẽ Israelgua! Pejerovia Tupä Ñandejára rehe.

Ore Tupã oĩ yvága ha yvýpe,

ha’e ojapo ojaposéva.

Umi ta’ãnga katu pláta ha óro,

yvypóra rembiapokue. R.

Umíva ijuru ha noñe’ẽi,

hesa ha ndohechái,

ijapysa ha nohendúi,

itĩ ha nohetũi. R.

Ipo ramo jepe ndopokói,

ipy ha ndoguatái,

upéichata avei umi ijapohare,

umíva rehe omoĩva ijerovia. R.

Peẽ Israelgua! pejerovia Tupä Ñandejára rehe.

Aarón rogaygua pejerovia Tupä Ñandejárare

Ha’e pene pytyvõta ha

oñangarekóta pende rehe. R.

ALELUIA Jn10, 14

Aleluia.

Ñandejára Jesucristo he’i:

“Che hína pe ovecha Ñangarekoha marangatu;

aikuaa che ovecha kuérape,

ha umi che ovecha kuéra chéve cheikuaa”.

Aleluia.

EVANGELIO

Ko’ágã ñahendúta Ñandejára Jesucristo rekove ha hemimbo’e San Mateo omombe’u háicha     9, 32-38

Upe ramo ojegueru Jesús rendápe peteĩ kuimba’e iñe’ẽngúva, mba’epochy oguerekógui ichupe ipoguýpe. Ha Jesús omosẽvo ichugui  pe mba’epochy, pe iñe’ẽngúva oñepyrũ oñe’ẽ. Ha opavave oñemondyipa ha he’i: Araka’eve ndajahecháiva mba’eve péichagua Israélpe.

Umi fariséo katu he’i: Umi mba’epochy ruvicha voi niko hína pe ohejáva ichupe omosẽ umi mba’epochýpe. Upéi Jesús ohasa oikóvo peteĩ távagui ambuépe. Ha mamo oĩháme itupao kuéra, upépe ha’e oporombo’e.

Omoherakuã avei marandu porã Tupã Ñandejára sãmbyhyha ára rehegua, ha omonguera opaichagua hasývape. Ha ohechávo hetaha umi ijatýva, tuicha oiporiahuvereko ichupe kuéra. Ohecha kuaa, ha’e kuéra ikane’õ ha ikangypaha ku ovecha herekua’ỹ vaicha. Ha he’i hemimbo’e kuérape: Ajépa tuicha pe kokue ha heta hi’a, omono’õ va’erãnte mbovy. Upévare, pejerure pe kóga járape tombou umi ou va’erãme omono’õ.

Ñandejára Jesucristo Ñe’ẽ