LECTURAS MIÉRCOLES DECIMOCUARTA SEMANA

LECTURAS MIÉRCOLES DECIMOCUARTA SEMANA

LECTURA PETEÎHA:

Ko’ágã ñahendúta Tupã Ñandejára ñe’ẽ Oseas arandukápe oĩ háicha 10, 1-3. 7-8. 12

Israel ojogua parral hi’a hetávape, ha hetavérõ pe hi’a, hetave umi altar omopu’ãva, ijyvy iporãvérõ, iporãve umi ita mandu’arã tupã gua’úpe omopu’ãva. Israel hova mokõi, ha ko’ágä iñangaipa hekoviáta ichupe. Tupã Ñandejára ohundíta umi altar ha oitýta yvýre umi ita.
Ha ko’ágä ha’e kuéra he’íta: “Na ñande ruvicha véima, na ñamomba’éigui Tupä Ñandejárape.

Mba’e piko ojapóta mburuvicha guasu ñande rehehápe?

Ndojekuaa mo’ãvéi Mburuvicha guasu Samariagua rapykuere, yvyra pehenguéicha ovevýiva pe.

Tupã gua’u tupaokuéra oñehundíta, iñangaipa haguére Israelgua. Ijaltar ári okakuaáta ñuatĩ ha javorái, ha upepegua he’íta yvyty kuérape: “Ore aho’íke!” Ha umi yvyty yvatépe: “Pe’áke ore ári.”

Peñotỹke teko joja, ha pemono’õta mborayhu. Pembovóke pende yvy kóga pyahurã.
Oguahẽma ára peheka haguã Tupä Ñandejárape, tove tou ha togueru peẽme ama oporope’áva jejopýgui.

Tupã Ñandejára Ñe’ẽ.

SALMO ÑEMBOHOVÁI 104, 2-7

Opavave: Peguahẽ Tupä Ñandejára rendápe

Ichupe peropurahéi ha pemoherakuã
imombe’upyrãva ha’e ojapo va’ekue .
Héra marangatu pembotuicha.
Tupã Ñandejára rehe ojeroviáva tovy’a. O.

Peguahẽ Tupã Ñandejára rendápe pytyvõ rekávo.
Opa ára peñemboja hendápe.
Pene mandu’áke umi mba’e hechapyrãva ojapo va’ekuére,
ha hembiapoukapy ijurúgui osẽ va’ekuére. O.

Peẽ hembiguái kuéra Abraham ñemoñaréva,
peẽ hembiporavo Jacob ra’ykuérava,
Tupã niko Ñandejára hína,
ha’e oisãmbyhy ko yvy tuichakue. O.

ALELUIA Mc 1, 15

Aleluia.
Ñandejára Jesucristo he’i: Tupã Ñandejára Sambyhy hi’aguïma.
Pejevy pene rembiapo vaikuégui ha peguerovia Marandu porã.
Aleluia.

EVANGELIO

Ko’ágã ñahendúta Ñandejára Jesucristo rekove ha hemimbo’e San Mateo omombe’u háicha 10, 1-7

Upe ramo Jesús ohenói umi 12 hemimbo’épe ha ome’ẽ ichupe kuéra pokatu omosẽ haguã mba’epochy, ha omonguera haguã opaichagua mba’asy.

Péicha hína umi 12 apóstol réra: tenondete Simón hérava avei Pedro, ha tyvýra Andrés. Upéi Santiago ha tyvýra Juan, Zebedeo ra’ykuéra. Felipe ha Bartolomé, Tomás ha Mateo, viru ombyatýva Romape guarã. Avei Santiago, Alfeo ra’y ha Tadeo. Oĩ avei Simón, hetã rayhúva, ha Judas Iscariote, pe upéi omoñuhã va’ekue Jesúspe.

Jesús omondo hembiaporãme ko’ã 12 kuimba’épe kóicha ombo’e rire ichupe kuéra: Aníke pehótei judio’ỹva oikoha rupi térã peguahẽ Samariagua táva kuéra rupi. Tapeho uvei Israelgua rendápe, ku ovecháicha okañymbáva. Tapeho pemyerakuã hi’aguĩmaha ñesãmbyhy yvágagui oúva.

Ñandejára Jesucristo Ñe’ẽ