LECTURAS MARTES V DE CUARESMA

LECTURA PETEÎHA:

Ko’ágã ñahendúta Tupã Ñandejára ñe’ẽ Números arandukápe oĩ háicha 21, 4-9

Ojere haguã Edom guágui, Israel ñemoñare oho yvyty Hórgui tape rupi ohóva Mar Rojo gotyo. Tape rehe katu Israel ñemoñare ikane’õ ha ipochy, ha ojahéi Tupã Ñandejára ha Moisés rehe. He’i hikuái: “Peẽ ore renohẽ Egíptogui ore juka haguã ko yvy ojeiko’ỹháme. Ápe ndaipóri mba’eve ro’u va’erã térã y roy’u haguã. Ore mbyajúma ko tembi’u ahẽ!”

Tupã Ñandejára omondo ichupe kuéra mbói. Ko’ãva oisu’u ichupe kuéra ha ojuka hetápe. Upérõ oho hikuái Moisés rendápe ha he’i ichupe: “Ivai eterei ore angaipa roñe’ẽvo Tupã Ñandejára rehe ha nde rehe! Ejeruréna Ñandejárape toipe’a ko’ã mbói ore apytégui.”

Upérõ Moisés oñembo’e hesekuéra. Ha Tupã Ñandejára he’i ichupe: Ejapo peteĩ mbói ra’ãnga ha emoĩ yvyráre. Pe ojesu’úva toma’ẽ pe yvyra rehe ha okueráta. Moisés ojapo mbói ra’ãnga ha omoĩ yvyra rehe ha pe ojesu’úva, oma’ẽvo pe mbói ra’ãnga rehe okuera.

Tupã Ñandejára Ñe’ẽ.

SALMO ÑEMBOHOVÁI 101, 2-3. 16-21

Opavave: Che Jára, ehendu che ñembo’e.

Che Jára, ehendu che ñembo’e.
Ne rendápe to guahẽ che rembijerure.
Ani nde rova reñomi che hegui ajejopy vai jave.
Che rendumi kena ha eñeñanduka chéve añembo’e jave. O.

Tupã Ñandejára, tetãnguéra nde réragui okyhyjéne,
mburuvicha guasukuéra ne momba’éne.
Tupã Ñandejára omopu’ã jevy vove Sión,
ha ojechaukávo heko mimbipápe,
ohendúne imboriahúva ñembo’e
ha nomboykéi chéne imba’e jerure. O.

Ko’ã mba’e kuatiápe toñemoĩ, oikuaa haguã umi oútava,
ha oikove’ỹva gueteri ágã omomba’e guasu Ñandejárape.
Tupã Ñandejára oma’ẽ yvýre amo yvatégui,
upe hekoha marangatu guive oma’ẽ, ohendu haguã iñapytĩmbýva ñembyasy,
ha umi ojejukátavagui opoi haguã. O.

VERSÍCULO ANTES DEL EVANGELIO

Pe mba’e ra’ÿi hína Tupã Ñandejára ñe’ë, pe oñotÿva katu Cristo hína; pe ojuhúva oikove opa ára guarä.

EVANGELIO

Ko’ágã ñahendúta Ñandejára Jesucristo rekove ha hemimbo’e San Juan omombe’u háicha 8, 21-30

Upe ramo Jesús he’i jevy fariséokuérape: “Che niko aháta. Peẽ katu che rekáta ha opáichavo pemanóta pene rembiapo vaikuépe. Peẽ ndaikatúi peho, che ahatahápe”.

Judíokuéra moakãhára kuéra he’i ichupe: Kóva piko ojejukáta mba’e, ajeve he’i ndaikatu mo’ãiha jaha ha’e ohotahápe?

Jesús he’i ichupe kuéra: Peẽ niko ko yvy pegua, che katu yvága pegua. Peẽ niko ko yvy arigua, che katu ndaha’éi yvy arigua. Upévare ha’e kuri peẽme pemanotaha pene rembiapo vaikuépe. Ha pemanóta pene rembiapo vaikuépe, ndaperoviái ramo ‘Cheha pe Ha’éva.’
Upépe oporandu ichupe hikuái: Máva piko nde?

Jesús he’i ichupe kuéra: Iñepyrũmby guive niko ha’éva peẽme, heta mba’e aguereko ikatúva ha’e pende rehe, ha ahecha pende rehe heta mba’e pene moĩ vaíva. Upe che mbou va’ekue katu añete guánte he’i, ha che ha’e opavavépe, umi mba’e ichugui ahendu va’ekue.
Ha’e kuéra katu ndohecha kuaái Jesús oñe’ẽha ichupe kuéra Itúvare.

Upévare he’i ichupe kuéra: Peẽ chéve, yvypóraicha aju va’ekue ko yvy ári, che rupiha ára yvate kurusúre, peikuaáta ‘Cheha pe Ha’éva’, ha che ndajapoiha mba’eve che jehegui. Che amombe’u umi mba’e che Ru he’i va’ekue che ha’e haguãnte. Pe che mbou va’ekue oĩ hína che ndive. Che Ru nda che rejái cheño, ajapógui umi mba’e ichupe ombovy’áva. Heta umi ohendúva Jesús péicha oñe’ẽ, ojerovia hese.

Ñandejára Jesucristo Ñe’ẽ.