LECTURAS MIÉRCOLES 6º TIEMPO DURANTE EL AÑO

LECTURA PETEÎHA:

Ñahendúta Tupã Ñandejára Ñe’ẽ Santiago ohai va’ekue 1, 19-27

Pene mandu’áke che pehẽngue kuéra pohayhúva, pene kyre’ỹ va’erãha pehendu haguã, ha pene mbegue peñe’ẽ ha pende pochy haguã. Pe ipochýva niko ndojapói iporãva Tupã Ñandejára renondépe. Peipe’a aipórõ, opa mba’e ky’a ha ñaña pya’ete oñemuñáva, ha perohory py’a porãme upe ñe’ẽ oñeñotỹ va’ekue pende py’ápe ha ikatúva pene pysyrõ angaipágui.

Pejapo Tupã Ñandejára Ñe’ẽ he’íva ha ani pehendúnte, ani haguã peñembotavy pende jupe voi. Pe ñe’ẽ ohendúnteva ha ndojapói, ha’ete ku omañáva ijehe ha’ãngápe, ha ohecha mba’éicha guápa ha’e. Ha ojeimi vove upéguinte hesaráima mba’eichaguápa ra’e ha’e. Pe hesarai’ỹva ohendúvagui katu, ha oma’ẽ porãva pe tembiapoukapy ñane mosãsóvare, ha oñeha’ãmbaite ojapo, upéva ovy’a va’erã opa ojapóvape.

Oimérõ oimo’ãva ohayhuha Tupã Ñandejárape, ha ndojoko kuaái ijuru, oñembotavy jupe voi, ha gua’únte pe Tupãme ohayhuha. Tupã rayhu ipotĩ ha imarã’ỹva, Tupã ñande Ru renondépe hína: Ñaipytyvõ umi ityre’ỹ ha imenave’ỹvape opa hemikotevẽme, ha ñañe ñangareko yvy arigua teko ky’águi.

Tupã Ñandejára Ñe’ẽ.

SALMO ÑEMBOHOVÁI 14, 2-5

Opavave: Máva piko oiko nde reipota háicha

Upe hembiapo porã ha heko hendápeva
ha ojapóva opa ára teko joja,
upe añete guánte he’íva ipy’aite guive,
upe oñe’ẽ vai’ỹva hapicháre. O.

Upe ojapo’ỹva ivaíva hapicháre,
upe oiko vai’ỹva hapicha ndive,
upe ndohecha ramóiva hembiapo vaívape,
umi Tupã Ñandejárare ojeroviávape omomba’éva. O.

Upe he’íva ojapóva ohasa asy ramo jepe,
pe plátare oiporuka’ỹva mba’eve,
térã plátare omoĩ vai’ỹva hapichápe.
Upe ojapóva ko’ã mba’e, ndo’ái chéne araka’eve. O.

ALELUIA Cf. Ef 1, 16-18

Aleluia.
Tupã, Ñandejára Jesucristo Ru to hesape ore korasõ
ikatu haguã ñamomba’e pe Ñeha’arö ñañe henói va’ekuépe.
Aleluia.

EVANGELIO

Ko’ágã ñahendúta Ñandejára Jesucristo rekove ha hemimbo’e San Marcos omombe’u háicha 8, 22-26

Upe ramo Ñandejára ha hemimbo’ekuéra oguahẽ hikuái Betsáidape, ha ogueraha hikuái peteĩ ohecha’ỹva Jesús rendápe, ha ojerure ichupe opoko haguã hese.

Jesús ipojái pe ohecha’ỹva póre ha oguenohẽ ichupe táva rokápe, hendýpe omoakÿ hesa, omoĩ ipo hese ha oporandu ichupe ikatúpa ohecha. Pe ohecha’ỹva oñepyrũ ohecha ha he’i ichupe: Ahecha yvypóra kuéra, ojogua yvyra hakã ha hoguéva oguatávape.

Jesús omoĩ jevy ipo hesáre, ha pe kuimba’e oma’ẽ porã ha okuera opytávo. Opa mba’e ohecha porã. Upérõ Jesús omondo hógape ha he’i ichupe: Ani reho jevy pe távape.

Ñandejára Jesucristo Ñe’ẽ.