LECTURAS ÑANDEJÁRA HESUKRÍSTO ÑEMONGARAI

LECTURA PETEÎHA:

Ko’ágã ñahendúta Tupã Ñandejára ñe’ẽ Isaías arandukápe oĩ háicha 40,1-5.9-11

Ñandejára he’i: “Pembovy’a, pembovy’a che retã guápe.  Peñe’ẽ pende py’aite  guive

Jerusalénpe ha peje ichupe opamaha itembiguái reko, omyengoviapa maha hembiapo vaikue rehe, ohupitýma hague Tupägui ñenupã jo’a opa iñangaipa rehe”.

Oĩ peteï osapukáiva: “Pembosako’i Tupãme háperã yvy ojeiko’ỹháme, pejapo yvy perõme tape po’i ñane Tupãme guarã. Pemyenyhẽ umi ipyko’ẽha, pemboguejy yvyty ha yvy pu’ã.

Pejapo yvyty pa’ũgui ñu ojojapaitéva. Upéma ramo Tupä ohechaukáta heko mimbipa ha upéva ohecháta opa yvypóra oñondive. Ñandejára voi upéicha he’i”.

Ejupi yvyty yvatépe, nde, rerahava Siónpe marandu porã. Hatã esapukái, nde, reraháva marandu porã Jerusalénpe. Esapukái kyhyje’ỹ rehe, ere Judá pegua távakuérape: “Péina upépe ne Tupä!”

Oguahẽma Tupã ipokatu reheve ha pyapy mbaretépe opa mba’e ipo guýpe omoĩ. Ogueru hendive hetãgua oguenohẽ va’ekue jejopy vaígui. Ovecha rerekuáicha ogueraha ijovecha kuéra

omongarúvo, ohupi umi ovecha ra’y, ogueraha ijyva ári ha oñangareko ovecha imemby ramóvare.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

SALMO ÑEMBOHOVÁI    103, 1b-4. 24-25. 27-30

Opavave: Amomba’e guasu Ñandejárape che py’aite  guive.

Nde tuichaite niko Tupã che Jára,

remimbi ha rejajaipa, ha mba’e rendýpe reñeñuã.

Óga pepóicha reipyso yvága. O.

Ha nde rogarã y ári remopu’ã.

Reñemo mbayru araípe ha yvytu pepo ári reiko.

Yvytu ne maranduhára ha ára vera katu ne rembiguái. O.

Ore Jára, hetaite mba’e niko rejapo.

Nde katupyrýgui umíva rejapo.

Ko yvy henyhẽ ne rembiapokuégui.

Péina upépe yguasu ipe ha ipyrusúva,

ipype omumumba tymbakuéra michĩ ha tuicháva ikatu’ỹva jaipapa. O.

Opa ko’ãva nde rehe ojepoka hembi’urã hi’árape ichupekuéra reme’ẽ haguã.

Reme’ẽ ha ogueraha, nde po jerágui ha’ekuéra hyvatã. O.

Nde rova reñomi ramo ha’ekuéra oñemondýi,

ipytu rejoko ramo omanomba, ha yvýpe jevýnte oho opa.

Nde pytúpe umíva rejapo, ko yvy ári opa mba’e rembopyahu. O.

LECTURA MOKÕIHA:

Ñahendúta Tupã Ñandejára Ñe’ẽ San Pablo ohai va’ekue Títope 2, 11-14; 3, 4-7

Che ra’y rohayhuetéva: Ñandejára niko ohechauka va’ekue imba’e porãha, oikuave’ẽvo yvypórape oñepysyrõ haguã. Pe Ñandejára py’a porã, ñane mbo’e jajeheja haguã teko jerovia’ỹ ha mba’e pota yvy ári guágui, ha jaiko haguã ñande rekove ko’ágã guápe, akã guapýpe, hekópe ha Ñandejára mborayhúpe, torypápe ñaha’arõ aja ou jevy ñane Ñandejára guasu Jesucrísto ñande pysyrõhára.

Ha’e omano va’ekue ñande rayhupápe, ñane renohẽ haguã teko añágui ha ñane mopotĩmbaite haguã, ojapóvo ñande hegui peteĩ tetã imba’e teéva, mba’e porãnte oipotáva.

Ñandejára ñane pysyrõhára katu, ohechauka ipy’a porã ha imborayhu yvypórape. Ñande poriahuvereko guinte ha ndaha’éi ñane rembiapo porãgui, ñane pysyrõva, ñane mopotĩvo ýpe ha ombo pyahúvo ñande rekove Espíritu Santo rupi.

Jesucrísto ñande pysyrõhára rupi niko, Ñandejára ñane myenyhẽ Espíritu Sántogui, ñanemoĩ porã haguã hendive imborayhu rupi, ha jahupity upe jeikove opa árape guarã ñaha’arõva.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

ALELUIA       Cf. Lc 3, 16.

Aleluia.

Juan katu he’i ichupekuéra: oime peteĩ oútava pene mongarai Espíritu Santo ha tatápe.

Ha’e ipokatuve che hegui.

Aleluia.

EVANGELIO

Marandu porã Ñandejára Jesucrísto rekove ha hemimbo’e San Lucas omombe’u háicha 3, 15-16. 21-22

Opavave: Romomba’e guasu ndéve, Ñandejára.

            Upérõ umi ohóva oñemongarai rrío Jordánpe opondera joaite, ha oikuaase hikuái ndaha’éipa Juan upe Mesías. Juan katu osẽ he’i chupe kuéra: — Che niko pomongarai ýpente. Oime katu peteĩ oútava ha pene mongaraítava Espíritu Santo ha tatápe. Ha’e imbareteve chehegui, ha nda’ijáiva chéve ajora chupe isapatu sãnte jepe.

            Juan omongaraipa rire umi hendápe ou vaekuépe, ou ave Jesús oñemongarai haguã. Ha Jesús oñembo’e jave hína, upe yvága ojepe’a, ha ku pykasúicha oguejy hi’ári Espíritu Santo. Yvágagui oñehendu peteĩ oñe’ẽva, ha he’íva: — Ndéko hína che ra’y ahayhúva, che py’a rembohorýva.

Ñandejára Jesucrísto  Ñe’ẽ.

Opavave: Romomba’e guasu ndéve, Ñandejára Hesukrísto.