LECTURAS SÁBADO I DE CUARESMA

LECTURA PETEÎHA:

Ko’ágã ñahendúta Tupã Ñandejára ñe’ẽ Miqueas arandukápe oĩ háicha 7, 14-15. 18-20

Eñangarekóke ore Jára ne retãgua ha ovecha kuéra ne mba’e teévare, ka’aguýpe opytáva ha’eño, yvy ne porãmba jepévape!
Eraha ichupe kuéra yma guaréicha, okaru haguä Basán ha Galaádpe.

Ehechauka ichupekuéra mba’e hechapyrãva, Egíptogui ichupe kuéra renohẽ ramo guaréicha. Tupã Ñandejára, ndeichagua ndaipóri, reheja rei tembiapo vaikue, ha reñemboesarái ne retã rembyre opu’ã hague nde rehe.

Nde hasýpe nde pochýva ha reporo poriahuvereko. Ore poriahuvereko jevy kena ha eñotỹ ore añangue, ore rembiapo vaikue emombo yguasu ruguápe. Ne mandu’akena ore Jára ne ñe’ẽ ha ne mborayhúre, yma ite guive reme’ẽ va’ekue ore ru kuéra ypykue Abraham ha Jacóbpe!

Tupã Ñandejára Ñe’ẽ.

SALMO ÑEMBOHOVÁI 102, 1-4. 9-12

Opavave: Amomba’e guasu Ñandejárape che py’a ite guive.

Amomba’e guasu Tupã Ñandejárape che py’aite guive, che py’aite guive amomba’e guasu héra marangatu.
Amomba’e guasu Tupä Ñandejárape che py’aite guive, nda che resarái chéne heta mba’e porã ome’ẽ hague chéve. O.

Ha’e oheja rei chéve che rembiapo vaikue ha che mongueráva opaichagua mba’asýgui.
Ha’e ndohejái apa yvy kuápe ha mborayhúpe che añuã ha che mbojere kunu’ũ ha mboayhúpe. O.

Ha’e ndoporo mongavajúi mante ha ndaipochy aréi.
Nomoengoviái ñandéve ñane angaipa, ha ndojapói ñande rehe ojapo haguãicha
nomoengoviái jajapóre ivaíva. O.

Yvága mombyry oĩ háicha yvýgui,
upéichaite tuicha imborayhu umi hese ojeroviávare.
Kuarahy resẽ mombyry háicha kuarahy reikégui,
upéicha omomombyry ñande hegui ñane angaipa. O.

VERSÍCULO ANTES DEL EVANGELIO Lc 15, 18

Aháta che ru rógape ha ha’eta ichupe: “Che ru, che rembiapo vai Tupã ndive ha ne ndive”.

EVANGELIO

Ko’ágã ñahendúta Ñandejára Jesucristo rekove ha hemimbo’e San Lucas omombe’u háicha 15, 1-3. 11b-32

Upe ramo maymave umi omono’õva jehepyme’ẽ Rómape guarã ha heta ambue herakuã vaíva, oñemboja Jesús rehe ohendu haguã ichupe. Umi Moisés rembiapoukapy mbo’eha ha fariséo kuéra oñe’ẽ hese upévare, ha he’i: Kóva omoguahẽ umi iñangaipávape, ha okaru hendivekuéra.

Upérõ Jesús omombe’u ichupe kuéra ko ñe’ẽ mbojoja: “Peteĩ kuimba’e ita’ýra mokõi, ha pe imitãvéva he’i itúvape: ‘Che ru, eme’ẽ chéve pe rehejátava, che mba’erãva.

Upérõ, upe kuimba’e omboja’o ta’ýra kuérape oguerekóva. Mbovymi ára rire, pe imitãvéva ome’ẽmba hepýre pe oñeme’ẽ va’ekue ichupe. Ha pe hepykuére oho mombyry, ambue tetãme, ha upépe omombopa vy’a reípe, ojejoko’ỹre, ha oipurupa marõ pe ogueraha va’ekue, ndaipóri guasuvéi tembi’u upe tetãme, ha ha’e oñepyrũ ohasa ñembyahýi.

Oho ojerure omba’apo haguã peteĩ karai upépe guápe, ha upéva omondo ichupe ñúme oñangareko haguã kurére. Ha hi’ãnte ichupe oñemoyvatã pe algarrovo’a, kure ho’úvape, ha avave nome’ẽi ichupe. Amo ipahávo ojepy’a mongeta: Mboy omba’apóvape piko che ru rógape hembypa tembi’u.

Che katu, ko’ápe, amano ñembyahýigui! Aha jevýta che ru rógape, ha ha’éta ichupe: ‘Che ru, che rembiapo vai Tupã Ñandejára ndive ha ne ndive, ndaikatu véima añehenóivo nde ra’y. Che rereko peteĩ ne mba’apohára ramo.’ Aipórõ oñemoĩ oho jevy itúva rógape. Oĩ jave gueteri hína mombyry, itúva ohecha ichupe ha oiporiahuvereko.

Osẽ ohuguaitĩvo, ha omoguahẽ ñehetũ na ñañuãme. Ta’ýra he’i ichupe: ‘Che ru, che rembiapo vai Tupã ndive ha nde ndive. Ndaikatu véima añehenóivo nde ra’y.’ Itúva katu he’i hembiguái kuérape: “Pya’e penohẽ ao iporãvéva ha pemonde hese. Pemoĩ avei ichupe kuãirũ ha pembopy rehegua. Peru pe vakara’y ikyravéva, ha pejuka. Kóva jarohorýta peteĩ karu guasúpe! Ko che ra’y kóva omanóma va’ekue ha oikove jevy; okañy va’ekue ha jajuhu jevy” Omoñepyrũ hikuái pe vy’a guasu.

Upe aja, pe ta’ýra tuichavéva oĩ ñúme. Ou jeývo ha oike marõ pe óga ypýpe, ohendu pe mba’epu ha pe jeroky ryapu. Upe marõ ohenói peteĩ hembiguáipe ha oporandu ichupe mba’épa oiko hína. Upe tembiguái he’i ichupe: ‘Nde ryvy niko péina ou jevy. Ha nde ru ojukauka peteĩ vakara’y ikyravéva, ou jevýre hesãi ha ndojehúi ichupe mba’eve ivaíva.’

Tuicha ipochy pe tyke’ýra, ha ndoikeséi. Aipórõ itúva osẽ ojerure asy ichupe oike haguã. Ha’e he’i itúvape: ‘Nde reikuaa mbovy áñopa amba’apo ndéve, ha ajapopa opa mba’e nde reipotáva, ha araka’eve nereme’ẽiva chéve peteĩ kavara ra’ymínte jepe, ajapo haguã karu guasu che irũnguéra ndive. Ko’ágã katu, oguahẽ ko nde ra’y omombopa rei va’ekue iviru kuña reko vaíre, ha rejuka ichupe guarã vakara’y ikyravéva.’

Itúva he’i ichupe: ‘Che ra’y, nde niko tapia reime che ndive, ha opa arekóva ne mba’e. Ha jarohory va’erã kóva peteĩ karu guasúpe ha javy’a. Nde ryvy niko, omanóma va’ekue ha oikove jevy, okañy va’ekue ha jajuhu jevy.

Ñandejára Jesucristo Ñe’ẽ.