LECTURAS DOMINGO DE RAMOS

LECTURA PETEÎHA:

BENDICIÓN DE RAMOS ÑEMBO’E
Tupã Ñandejára nde pu’akapáva ha opa ára reikovéva, emomarangatu nde jehovasa rupi ko’ã + pindo (ha ka’avo) rogué ikatu haguáicha opavave romomba’e guasúva guive Ñandejára Hesukrísto, Mburuvicha Guasúpe, toroguahẽ ha’e rupi Herusalén marangatúpe.
Ha’e nendive oikóva ha imborayhúpe ore añuãva yma, ko’âga ha opa araite.

Amén.

EN LA PROCESIÓN DE RAMOS
Ñandejára Hesukrísto jehasa asy San Lucas omombe’u háicha 19- 28-40

Opavave: Romomba’e guasu ndéve, Ñandejára.

Upérõ Jesús oipykúi hape Jerusalén gotyo. Ha oguãhẽvo Betfagé ha Betania ypýpe, opyta Monte Olívospe. Upégui omondo henonderã mokõi idisípulope.

He’i chupekuéra: — Tapeho peguãhẽ amóva amo puéblope. Ágã peguãhẽvo pejuhúta hína peteĩ vúrro oñeñapytĩva, ne’ĩrava gueteri avave ojupi hi’ári.

Pejoráta ha pegueru chéve. Ha oime mba’érõ oporandúva peẽme maerãpa pejora, pejéta: “Ñandejára oikotevẽ hese.”

Idisípulokuéra oho, ha ojuhu hikuái Jesús he’i haguéicha chupekuéra. Ha ojora jave hína pe vúrro, osẽ ijára oporandu chupe kuéra: — Maerãiko pejora.

Ha’ekuéra he’i: — Ñandejára oikotevẽ hese.

Ha osẽ ogueraha hikuái pe vúrro Jesús rendápe. Ijapére katu omoĩ hikuái umi ijao hamba’e Jesús oguapy haguã hi’ári. Ha Jesús oho aja Jerusalénpe, maymávante oipyso hapépe ijahoja. Ha oguãhẽvo Monte Olívos ypýpe ha oguejývo hikuái Jerusalén gotyo, maymáva umi ohóva hapykuéri oñepyrũ osapukái vy’apópe.

Oguerohory joa hikuái Ñandejárape opa umi milágro Jesús ojapo va’ekuére. He’i hikuái: Tupã tohovasa ñande rréype Ñandejára rérape oúva. Py’a guapy toĩ yvágape ha ñamomba’e guasu Ñandejárape.”

Umi génte kuéra apytépe oĩ ave fariséo kuéra. He’i hikuái Jesúspe:— Mbo’ehára, eréna nde disípulokuérape tokirirĩ.

Jesús katu he’i chupekuéra:— Ha’éta peẽme peteĩ mba’e. Ko’ãva okirirĩ ramo, umi ita jepe oñemoĩne osapukái.

Ñandejára Jesucrísto Ñe’ẽ.

Opavave: Romomba’e guasu ndéve, Ñandejára Hesukrísto.

ÑAHENDU ÑANDEJÁRAPE – Motivación a lecturas

Proféta Isaías omombe’u mba’éichapa pe Tupã rembijokuái ohasa asykuaa va’erã, ojeroviágui Ñandejára oipytyvõtaha ichupe.
Pe Salmo pe katu pe ojejopy vaíva osapukái asy Ñandejárape oipe’a haguã ichupe ñemanógui.

San Pablo he’i Jesús nombyasýi hague hekove ha omano ñande rayhupápe ñande pe’ávo Aña poguýgui. Upévare Ñandejára omoĩ ichupe opa mba’e ári.

San Lucas omombe’u ñandéve Jesús jehasa asy, ha mba’éichapa ohupi ijapére opa mba’e vai ha ipahápe oguata ikurusu reheve ojejuka peve.

LECTURA PETEÎHA:
Ko’ágã ñahendúta Tupã Ñandejára ñe’ẽ Isaías arandukápe oĩ háicha 50-4-7

Ñandejára che reko mbo’e amokyre’ỹ haguã che ñe’ẽme ikane’õvape. Ára ko’ẽ rehe oñe’ẽ che apysápe ahendu haguã hemimbo’e.
Ñandejára oipe’a che apysa, che nda jokói ichupe ha nda guevíri. Amoĩ che ape che nupãsévape ha che rendyva’óvagui ndajehekýiri. Che rova pete ha che rova rehe ondyvúvagui che rova namokañýi. Ñandejára upe che pytyvõva.

Upéva rehe nañandúi ajehova api ramo, añemohatã itáicha, aikuaa rupi nañemotĩ mo’ãiha.

Tupã Ñandejára Ñe’ẽ

Opavave: Romomba’e guasu ndéve, Ñandejára.

SALMO ÑEMBOHOVÁI 21, 8-9. 17-18a. 19-20. 23-24

Opavave: Ñandejára! Mba’e rehe piko che reja?

Umi che recháva oñembohory che rehe, oñembohova vai,
oñemohembe jere, ha he’i che rehe hikuái:
“Ñandejára rehe niko ojerovia, tove ha’e toipytyvõ ichupe.
Tupã ichupe ohayhu ramo toipe’a ichupe ivaívagui”. O.

Mondaha atýra jaguáicha che mongora.
Che po ha che pýpe che kutu hikuái.
Umi che kãngue ojekuaapa. O.

Che ao rehe oñomboja’o che ahoja rehe oity po’a.
Tupã, ani reñemo mombyry che hegui,
nde niko upe che mombaretéva. Eju che pytyvõ. O.

Nde rehe che mandu’áta che ryke’ykuérape,
ha rogueropurahéita ijatyhápe hikuái.
peẽ Ñandejára rehe pejeroviáva, pemomba’e guasu ichupe!
Israel guáva guive, peñesũ henondépe! O.

LECTURA MOKÕIHA:
Ñahendúta Tupã Ñandejára Ñe’ẽ San Pablo ohai va’ekue ikuatia peteïháme Filipos guápe 2, 6-11

Jesucrísto, opáichavo nahakate’ỹi va’ekue itupã reko rehe, opoi va’ekue uvei pe imba’évagui ha oiko tembiguái ramo. Oikóvo oiko háicha opa yvypóra, ou yvy ári ñandeichagua yvypóra ramo.

Oñemomirĩ ijupe voi, iñe’ẽ rendúvo omano meve osãingohápe kurusu rehe. Upéva rehe Tupã ohupi ichupe yvateve opavavégui, ha ome’ẽ ichupe upe téra oĩva opa téra ári, ikatu haguãicha Jesús réra renondépe, oñesũ opavave oĩva yvágape, yvýpe ha yvy guýpe ha opavave ohechakuaa haguã Jesucrísto Ñandejaraha, Tupã pe Túva oñemomba’e guasu haguã.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

ACLAMACIÓN Flp 2, 8-9
Oñemomirĩ ijupe voi, iñe’ẽ rendúvo omano meve osãingohápe kurusu rehe.
Upéva rehe Tupã ohupi ichupe yvateve opavavégui, ha ome’ẽ ichupe upe téra
oĩva opa téra ári.

EVANGELIO
Marandu porã Ñandejára Jesucrísto rekove ha hemimbo’e San Lucas omombe’u háicha. 22, 7. 14 __ 23, 56
Opavave: Romomba’e guasu ndéve, Ñandejára.

Omombe’úva: Oguahẽ upe ára oñepyrũháme arete oje’uhápe pan oñembovu’ỹva, ha ojejukahápe ovecha Páskua rehegua. Ojekarútavo, Jesús ha umi apóstol oguapy upe mesápe. Jesús he’i chupekuéra: Jesús: –Hetaitéma ahasase pene ndive ko Páskua rehegua arete, amano mboyve. Ha’e peẽme, kóva rire nda’u mo’ã véima oiko peve oiko va’erã Tupã oisãmbyhyhápe.

Omombe’úva: Aipórõ ohupi ipópe copa, ha ome’ẽ rire ijaguyje Tupãme, he’i:

Jesús: –Pejapyhy kóva ha pembohasa ojoapytépe, ha’e peẽme nda’u mo’ã veimaha ko vino rykue, oguahẽ meve Tupã sãmbyhy.

Omombe’úva: Upéi ojapyhy ipópe pan, ha ome’ẽ rire ijaguyje Tupãme, oipehe’ã chupe kuéra, ha he’i: Jesús: –Kóva niko che rete, oñeme’ẽva pende rehehápe. Pejapo kóva pene mandu’ávo che rehe.

Omombe’úva: Péicha avei ojapo pe copa reheve ojekarupa rire, ha he’i:

Jesús: –Ko cáliz niko hína pe ñe’ẽ me’ẽ pyahu oñembyajéva che ruguy rupi, oñeñohẽva pende rehehápe. Ha pe che me’ẽ vaerã po, oĩ hína ko’ágã che ndive ko mesápe. Che, yvypóraicha aju vaekue, amano vaerã voínte oñemoĩ ypy haguéicha chéve. Ha tojererekóke pe che reitýva umi che rehe ija’e’ỹva pópe.

Omombe’úva: Upépe, oñepyrũ oporandu joa ojupe mávatapa hína pe ome’ẽva Jesúspe. Ha uperire oñepyrũ oñoñe’ẽ api hikuái, mávapa ijapytépe kuéra mba’e guasuvéva.

Jesús he’i chupekuéra: Jesús: –“Umi ndojeroviáiva apytépe, mburuvicha guasu kuéra oisãmbyhy mbaretépe ha ojopy hetãgua kuérape, ha oipota oje’e hese kuéra imba’e porãha. Peẽ ndaupéichai va’erã. Pe mba’e guasuvéva pende apytépe oiko va’erã imichĩvéva ramo, ha pe oporosãmbyhýva oiko va’erã oñesãmbyhýva ramo.

Máva piko pe mba’e guasuvéva, pe oguapýva mesápe okaru haguã piko, térãpa pe oporomongarúva? Ndaha’éi nga’u piko pe mesápe oguapýva? Che katu aime pende apytépe oporomongarúvaicha.”

“Peẽ peime tapiáva che ndive opa mba’e ahasávape. Upévare che ame’ẽ peẽme peteĩ tetã, che Ru ome’ẽ haguéicha avei chéve, ha peẽ pekarúta ha pemboy’úta che mesápe che retãme, ha peguapýta pembojovake haguã umi 12 Israelgua ñemoñarépe.”

Omombe’úva: He’i avei Ñandejára:

Jesús: –Nde Simón, ema’ẽke. Sataná ojeruréma pende rehe pende tyvyro haguã, ku kumanda ojetyvyro ramo guáicha. Che katu añembo’éma nde rehe, ani haguã ne kangy nde rejeroviápe. Ha nde, ágã rejevývo che rendápe, eipytyvõ ne pehẽngue kuérape taimbarete mbareteve ijeroviápe Omombe’úva: Simón he’i chupe:

Apóstol: –Che Jára, che aime aha haguãicha nde ndive yvyrakuápe, ha amano haguã ave ne ndive.
Omombe’úva: Jesús katu he’i chupe:
Jesús: –Pedro, ha’e ndéve, ko árape voi gállo osapukái mboyve, eréta ndachekuaaiha mbohapy jevy.

Omombe’úva: Upéi Jesús oporandu chupe kuéra:
Jesús: –Upe pomondo ramo guare viru, tembi’u ha pende py rehegua’ỹre, oime nga’úpa ra’e peikotevẽva?

Omombe’úva: Ha’e kuéra he’i:
Apóstol: –Ahániri.
Omombe’úva: Aipórõ Jesús he’i chupekuéra:
Jesús: –Ko’ágã katu, viru oguerekóva, togueru, ha tembi’u avei. Ha pe ndaikysepukúiva, tome’ẽ hepýre ijao anambusu ha tojogua peteĩ. Ha’e peẽme, oiko vaerãha che rehe pe Ñandejára Ñe’ẽ he’íva: ‘Ha ojerereko heko añáva ramo.’ Ha upéicha opa oĩva kuatiápe che rehegua, oiko va’erã.

Omombe’úva: Ha’e kuéra he’i:
Apóstol: –Ore Jára, péina ápe mokõi kyse puku.
Omombe’úva: Ha’e katu he’i:
Jesús: –Iporãmante.
Omombe’úva: Upe rire Jesús osẽ, ha ojepokuaaháicha, oho Yvyty Olivotýpe, ha hemimbo’ekuéra oho hapykuéri. Oguahẽvo upépe, he’i chupe kuéra:
Jesús: –Peñembo’e, ani haguã pejepy’a ra’ã.
Omombe’úva: Ha oho chugui kuéra peteĩ ita ñemombo mombyrykuéicha, ha upépe oñesũ oñembo’e haguã. He’i:
Jesús: “Che Ru, reipotárõ, embohasa che hegui ko ñembyasy tuichaite. Opáichavo, anítei oiko pe che aipotáva, pe nde reipotávante toiko.”

Omombe’úva: Upe jave ojechauka peteĩ ángel omoirũva ichupe. Pe iñembyasy guasuete pa’ũme, Jesús ko’ýte oñembo’e ipy’aite guive, ha pe hy’ái ho’a yvýpe tuguy tyky guasu guasúicha.

Opu’ãvo pe oñembo’ehágui, oho hemimbo’e kuéra rendápe, ha ojuhu chupe kuéra oke, ikangypa hikuái ñembyasýgui. He’i chupe kuéra:
Jesús: –Mba’ére piko peke hína? Pepu’ã ha peñembo’e, ani haguã pejepy’a ra’ã.

Omombe’úva: Oñe’ẽ gueteri hína Jesús, ha upe jave heta oguahẽva. Pe Judas hérava, peteĩ umi 12 Jesús remimbo’e apyte pegua, omyenonde chupe kuéra.

Judas oñemboja ha ohetũ Jesúspe. Jesús katu he’i chupe:

Jesús: –Judas, peteĩ ñehetũme piko che reity chéve, yvypóraicha aju vaekuépe?

Omombe’úva: Umi oĩva Jesús ndive, ohechávo mba’épa ojehu oporandu hikuái chupe:

Apóstol: –Ore Jára, rojeitýpa hese kuéra kyse pukúreve?

Omombe’úva: Upépe peteĩva, pe pa’i ruvicha rembiguái peteĩgui oipe’a inambi akatúa gotyogua.

Jesús he’i: Jesús: –Peheja, iporãmante.

Omombe’úva:Ha opoko pe tembiguái nambíre ha omonguera. Upéi he’i umi pa’i ruvicha kuérape, umi Tupao sãmbyhyha ha myakãhára kuérape, ou va’ekue oguerahávo chupe:

Jesús: –Mba’ére piko peju kyse puku ha yvyra reheve che reraha haguã, mba’e vai apoha ramo guáicha che? Opa ára aime vaekue pene ndive Tupaópe ha ndapejapói mba’eve che rehe. Kóva ha’e ra’e pende ára, mba’e vai apo ruvicha ipu’akaha ára.

Omombe’úva: Aipórõ omyakãsã hikuái Jesúspe, ha ogueraha chupe pa’i guasu rógape. Pedro oho hapykuéri mombyrymi. Upépe, pe korapy mbytépe, ojatapy ra’e hikuái ha oguapy joa ijerére. Ha Pedro oguapy avei ijapytéte kuéra. Upe jave, peteĩ kuña tembijokuái, ohechávo chupe oguapy hína pe tataypýpe, oma’ẽ porã hese ha he’i:

Fariseo: –Kóva avei oĩ kuri hendive.
Omombe’úva: Pedro katu he’i:
Apóstol: –Nahániri, che ndaikuaái chupe.

Omombe’úva: Upe riremínte, ambueháma ohecha chupe, ha he’i:
Soldado: –Nde avei ha’e kuérava.
Omombe’úva: Pedro he’i:

Apóstol: –Nahániri, nde kuimba’e, che ndaha’éi.

Omombe’úva: Upe rire avei, oimeve he’íva:
Soldado: –Añetehápe ha’e oĩ kuri hendive. Upéi ave niko, ha’e Galileagua voi.
Omombe’úva: Pedro katu he’i:
Apóstol: –Nde kuimba’e, che ndaikuaái upe eréva.

Omombe’úva: Upe javete, Pedro oñe’ẽ aja hína, osapukái peteĩ gállo. Upévo Ñandejára ojere ha oma’ẽ Pedro rehe. Ha Pedro imandu’a Ñandejára he’i hague chupe: “Ko árape, gállo osapukái mboyve, eréta ndachekuaaiha mbohapy jey.” Ha Pedro osẽ upégui ha ojahe’o soro.

Umi oñangareko vaekue hína Jesús rehe, oñembohory hese ha oinupã. Ohesa jokua chupe, ha oporandu joa: Soldado: –Nde ndajeko maranduhára. Máva piko upe ne nupãva?

Omombe’úva: Ha oñembohory hese hikuái, ha hetave mba’e he’i chupe. Ko’ẽmba rire, oñembyaty umi judío myakãhára, umi pa’i ruvicha ha Moisés rembiapoukapy mbo’eha, ha ogueraha hikuái Jesúspe mburuvicha kuéra rovake.

Upépe oporandu hikuái chupe: Fariseo: –Ere oréve, nde piko hína pe Mesías?
Omombe’úva: Ha’e he’i chupe kuéra:

Jesús: –Ha’érõ peẽme añeteha, ndapechererovia mo’ãi. Ha aporandu ramo peẽme, ndapeje mo’ãi chéve mba’eve, ha ndapepoi mo’ãi che hegui. Ko’ágã guive katu, Tupã ra’y ou vaekue yvypóraicha, oguapýta Tupã ipu’akapáva akatúape.

Upéi opavave oporandu chupe:
Fariseo: –Aipórõ piko nde hína Tupã ra’y?
Omombe’úva: Jesús ombohovái chupekuéra:

Jesús: –Peẽ voi peje che ha’eha!
Omombe’úva: Upépe ha’e kuéra he’i:
Fariseo: –Nañaikotevẽ véima avavére he’i vaerã ñandéve mba’eve. Ñandetéma voi ñahendu ijuru rupi.

Omombe’úva: Opavave opu’ã ha ogueraha hikuái Jesúspe Pilato rovake.
Henondépe oñepyrũ oñe’ẽ hese he’ívo:
Fariseo: –Rojuhu ko kuimba’épe oporomopu’ãmba oikóvo tetãpýre. He’i nañame’ẽi vaerãha viru mburuvicha guasu Roma guápe. Ha upéi ave he’i ijehe ha’eha Mesías, pe mburuvicha guasu.

Omombe’úva: Pilato oporandu chupe:
Soldado: –Nde piko hína judío kuéra ruvicha guasu?
Omombe’úva: Jesús he’i chupe:
Jesús: –Ndéma niko ere.
Omombe’úva: Aipórõ Pilato he’i umi pa’i ruvichápe ha opavavépe:

Soldado: –Ndajuhúi hese mba’eve ikatúva omoĩ vai chupe.
Omombe’úva: Ha’e kuéra katu he’i he’ive:
Fariseo: –Opa ombo’évape oporomopu’ãmba. Oñepyrũ Galiléape, ha ágã péina Judeapeháma.

Omombe’úva: Ohendúvo upéva, Pilato oporandu pe kuimba’épa Galileagua. Ha oikuaávo Jesús ouha pe yvy oĩva Herodes poguýpegui, omondo chupe hendápe. Oĩgui ha’e umíva umi árape Jerusalénpe.

Ohechávo Jesúspe, Herodes ovy’aiterei, heta árama ohechaségui chupe, oguahẽ niko ijapysápe opa oje’éva hese, ha oha’arõva ohechami peteĩ mba’e rechapyrã ojapo ramo. Heta mba’e oporandu chupe, Jesús katu nde’íri chupe mba’eve. Oĩ avei upépe umi pa’i ruvicha ha Moisés rembiapoukapy mbo’eha kuéra, oñe’ẽ jey-jeýva Jesús rehe.

Aipórõ, Herodes ha iñorãirõhára kuéra ojahéi hese, ha oñembohorývo omonde hese ao hepy ha ojeguapáva, mburuvicha guasu mba’éicha. Upe rire, Herodes omondo jey Jesúspe Pilato rendápe. Upéva upe árape oiko porã jey vaekue oñondive Herodes ha Pilato, upe mboyve katu ndaija’éi vaekue ojuehe.

Pilato ombyaty umi pa’i ruvichápe, mburuvicha kuérape ha opavavépe, ha he’i chupe kuéra:

Soldado: –Peẽ niko peru chéve ko kuimba’e, pejévo hese oikoha oporomopu’ãmba. Che katu amba’e porandu chupe pene renondépe, ha ndajuhúi mba’eve umi ivaíva peje vaekue chéve hese. Ha Herodes upéicha avei, upévare ombou jey ñandéve. Pehecháma, ndojapói niko mba’eve ikatu haguã ojejuka. Ainupãukáta ha upéi ahejáta oho.

Omombe’úva: Páskua arete jave niko, Pilato opoi vaerãva peteĩ cárcel-pe oĩvagui, oguerohorývo Jerusalén guápe. Upépe oñepyrũ osapukaipa hikuái:

Fariseo: –Ndaipóri upéva. Epoi oréve Barrabásgui!

Omombe’úva: Barrabás oñemoinge ra’e cárcel-pe peteĩ ñepu’ãnguére upe távape, ha oporojuka haguére. Pilato, opoiségui Jesúsgui, oñe’ẽ jey chupe kuéra.

Ha’e kuéra katu osapukái hatãve:
Fariseo: –Emosãingo kurusúre! Emosãingo kurusúre!
Omombe’úva: Mbohapy jeyha Pilato he’i jey chupe kuéra:

Soldado: –Mba’e ivaíva piko ojapo ra’e? Che ndajuhúi hese mba’eve ivaíva ikatu haguã ojejuka. Ainupãukáta ha upéi ahejáta oho.
Omombe’úva: Ha’e kuéra katu osapukái jey-jey, ojerurévo ojehupi haguã kurusúre. Ha heta osapukáigui oiko pe ha’e kuéra oipotáva. Pilato upémarõ ojapo pe ojejeruréva chupe. Aipórõ opoi pe ha’ekuéra ojerure vaekuégui, pe oĩva cárcel-pe ñepu’ãnguére ha oporojuka haguére, ha oheja Jesúspe ipópekuéra.

Oguerahávo Jesúspe omosãingo haguã kurusúre, ohuguãitĩ hikuái peteĩ kuimba’e táva Cirenegua hérava Simón, oúva hína ñúgui. Ha ohupi hikuái ijati’ýre pe kurusu ogueraha haguã Jesús rapykuéri.

Heta tavagua ha heta kuña ojahe’o ha osapukái joáva ñembyasýgui, oho hapykuéri. Ha Jesús oma’ẽ hese kuéra ha he’i:

Jesús: –Peẽ kuña Jerusalengua, ani pejahe’o che rehe. Pejahe’o uvei pende rehe ha pene memby kuérare. Oúta hína ára oje’étaha: “Ovy’aiténepa umi ikatu’ỹva imemby, umi kuña imemby’ỹ vaekue ha umi oguereko’ỹva mitã omongakuaa vaerã.”

Upépe opavave he’íne umi yvytýpe: ‘Pe’a ore ári!’, ha umi yvy pu’ãme: ‘Ore mokañýna!’ Pe yvyra hokývare ojapo ramo péicha, mba’épa ndojapói chéne hikuái pe ipirúvare?

Omombe’úva: Ogueraha avei hikuái mokõi oporojuka vaekuépe, oñemosãingo haguã kurusúre Jesús ykére. Oguahẽvo peteĩ hendápe hérava “Akãngue Renda”

omosãingo hikuái Jesúspe kurusúre, ha umi mokõi oporojuka vaekuépe. Peteĩ ijakatúape ha pe ambue ijasúpe. Jesús he’i:
Jesús: “Che ru, eheja rei chupe kuéra, ndoikuaáinteko ojapóva.”

Omombe’úva: Ha umi ñorãirõhára oity po’a oñomboja’o haguã umi Jesús aokuére. Ha opavave oĩva upépe oma’ẽ joa hikuái hese. Ha mburuvicha kuéra jepeve oñembohory hese, ha he’i:

Fariseo: –Hetápeko osalva vaekue. Tojapo ijehe ko’ágã, añete ramoha ha’e upe Mesías, Tupã oiporavo vaekue.

Omombe’úva: Umi ñorãirõhára oñembohory avei Jesús rehe. Oñemboja, ho’uka ichupe vinagre, ha he’i:

Soldado: –Nde ramo judío kuéra ruvicha guasu, nde voi ejesalva!

Omombe’úva: Ha oĩ peteĩ kuatia iñakã ári, he’íva: ‘Kóva hína judíokuéra ruvicha guasu!’ Peteĩva pe oporojuka vaekue, oĩva kurusúre ijykére, oñembohory hese:

Fariseo: –Nde ramo upe Mesías, ejesalva nde, ha ore salva oréve ave!

Omombe’úva: Pe ambue katu oja’o upe hapichápe ha he’i chupe:

Soldado: –Nderekyhyjéi piko Tupãgui, ñaime niko hína peteĩcha?

Ñande niko hekópe jahasa asy hína. Oñembyekovia ñandéve hína ñane rembiapo vaikue. Ko kuimba’e katu ndojapói mba’eve ivaíva.
Omombe’úva: Upéi he’i Jesúspe:

Soldado: –Jesús, ne mandu’amíke che rehe reñepyrũvo reisãmbyhy. Omombe’úva: Jesús he’i chupe:

Jesús: –Añetehápe ha’e ndéve, ko árape reimetaha che ndive yvágape!

Omombe’úva: Asaje guive ka’aru mbyte peve, yvy tuichakue opyta pytũguýpe. Kuarahy ndohesapevéi. Ha pe Tupao ryepy pegua cortina osoro mbyte rupi.

Jesús hatã osapukái, ha he’i:

Jesús: –Che ru, nde pópe amoĩ che espíritu!
Omombe’úva: Ha he’ívo upéva omano… (Opavave opyta kirirĩhápe ha oñesu)…

Pe ñorãirõhára ruvicha Romagua ohechávo mba’épa oiko, omomba’ete Tupãme, ha he’i:

Soldado: –Kóva niko añetehápe Tupã Ra’y ra’e.

Omombe’úva: Opavave oĩva upépe ha ohecha mba’épa ojehu, oinupã ohóvo ipyti’a ñembyasýgui. Umi oikuaáva Jesúspe opyta mombyrymi. Ha umi kuña oho vaekue hapykuéri Galilea guive ave, oma’ẽ hikuái upépe.

Oiko vaekue peteĩ kuimba’e heko joja ha imba’e porãva hérava José, Arimateagua, peteĩ táva Judá pegua. Ha’e niko peteĩva umi judío ruvicha kuéra atyha pegua. Ko José, oha’arõva Tupã sãmbyhy ha noĩriva pe mburuvicha aty ojapóvare, oho ohechávo Pilátope, ha ojerure chupe Jesús retekue. Omboguejy rire pe kurusúgui, oñuã peteĩ savanáme ha omoĩ pe tyvy ojejapo vaekuépe peteĩ itakuápe, avave oñeñotỹ’ỹ haguépe gueteri. Upérõ, oñembosako’íma hína pytu’uha ára, oguahẽmbotámava.

Umi kuña omoirũ va’ekue Jesúspe Galilea guive, oho ha ohecha hikuái upe tyvy ha oma’ẽ mba’éichapa oñemoĩ ra’e upépe hetekue. Oho jeývo hógape kuéra, ombosako’i hikuái mba’e ryakuã porã omona haguã Jesús retekuére.

Ñandejára Jesucrísto Ñe’ẽ.