LECTURAS VIERNES 4º TIEMPO DURANTE EL AÑO

LECTURA PETEÎHA:

Ko’ágã ñahendúta Tupã Ñandejára ñe’ẽ Eclesiástico arandukápe oĩ háicha 47, 2-11

Pe ikyrakue mymbajukápe oñemboyke vaicha, péicha va’ekue David Israelgua apytépe. León ndive oñemboharái kavara ra’y ndive ramo guáicha ha jaguarete ndive ovecha ra’y ndive ramo guáicha.

Imitãme ojuka kuimba’e hete rusúvape, oipe’ávo hetã guára ñemotĩ, opoírõ ita ha yvýre oity Goliátpe. Ohenói upe Yvatete guápe omombaretéva ichupe ipo akatu ohundi haguã kuimba’e mbaretetépe ha hetã guápe omokyre’ỹ jevy.

Upévare 10.000 rekovia ojererohory ichupe, ha Tupã Ñandejára rovasápe oñemomorã, oñekuave’ẽvo ichupe akã jeguaka omimbipáva.
Ha’e oipete yvýre Israel rayhu’ỹha ijereregua, ohundi umi filistéo ija’e’ỹha, ha omopẽ ete ipokatu.

Opa mba’e ichupe osẽ porãvare oaguyje me’ẽ upe Yvatete guápe, heko mimbipa ogueropurahéivo. Ipy’aite guive ojapo purahéi ohechauka haguã imborayhu ijapoharépe. Omoĩ umi altar renondépe opurahéi va’erã ohenduka haguã purahéi he’i asýva.

Aretekuéra ombojegua porã ojapoukávo heko itépe tupao pegua tembiapo, he’ívo ojererohory haguã Tupã Ñandejára réra marangatu, ha hyapu haguã ko’ẽtĩ guive pe tupao.

Tupã Ñandejára oheja rei ichupe iñangaipa ha omoatã ipokatu opa árape guarã, omoingo ichupe mburuvicha guasúrõ ha omohenda Israélpe iguapyha.

Tupã Ñandejára Ñe’ẽ

SALMO ÑEMBOHOVÁI 17. 31. 47. 50. 51

Opavave: Tupã Ñandejára, romomba’éne opa rupi,

Tupã Ñandejára rape ndaipóri ojoavyha, jarovia kuaa
upe Tupã Ñandejára he’íva ojapotaha.
Tupã oñangareko umi hendápe oguahẽvare.
Toikove Tupã Ñandejára, che pytyvõhára. O.

¡Tuichaitépa Tupã Ñandejára! ¡Ha’e pe añemopyendaha!
To ñemomba’e Tupã Ñandejára che pe’áva ivaívagui.
Romomba’éne opa rupi,
ha nde réra aropurahéine Tupã Ñandejára. O.

Tuicha reipytyvõ mburuvicha remoĩ va’ekuépe,
ha teko jojápe oñangareko oiporavo va’ekuépe
na nde resaráiri ne rembiporavo pyrégui.
David ha ita’ýra kuérape opa árape rehayhu. O.

ALELUIA Cf. Lc 714, 29

Aleluia.
Ovy’aite va’erã umi orekóva iñakäme
Tupã Ñandejára ñe’ẽ pe ikorasõ omoï porãvo
ha heta mba’e osë ichugui naikane’öire.
Aleluia.

EVANGELIO

Ko’ágã ñahendúta Ñandejára Jesucristo rekove ha hemimbo’e San Marcos omombe’u háicha 6, 14-29

Upe ramo guare mburuvicha guasu Herodes ohendu pe oje’éva Jesús rehe, herakuãmava opa rupi. Oĩ he’íva: “Juan Bautista niko opu’ã jevýma omanóva apytégui, ha upévare ipokatu ojapo haguã hechapyrãva.” Oĩ he’íva: “Maranduhára Elías hína upéva.”
Ha ambueve he’i: “Peteĩ umi maranduhára yma guaréva hína.”

Ohendúvo ko’ã mba’e, Herodes he’i: Upéva hína Juan. Che añakã’ouka va’ekue ichupe ha ko’ágä oikove jevýva. Herodes niko, Herodías rehehápe, ojopyuka va’ekue Juánpe yvyrakuápe ha ombotyuka ichupe koty ypytũme. Herodías, Herodes ryvy Filipo rembirekore va’ekue, ha Herodes omenda hese. Ha Juan he’i va’ekue Heródespe: “Ndaikatúi remendávo nde ryvy rembirekorére.”

Upévare Herodías ndaija’éi Juan rehe, ojukase ichupe ha ndaikatúi, Herodes niko okyhyje ichugui oikuaágui ha’eha kuimba’e marangatu, ha omo’ã ichupe. Ohendu ramo ichupe opyta jepi oikuaa’ỹre mba’épa ojapóta. Upéicha ramo jepe Herodes ohenduse Juánpe.

Herodías katu ohecha oguahẽha peteĩ ára ou porãtava ichupe. Herodes ojapo karu guasu hi’ára mbotýre, mburuvicha kuéra ha poguasu kuéra Galiléa guápe guarã. Herodías memby oike ha ojeroky pe karu guasuhápe. Herodes oguerohory eterei pe ijeroky ha opavave upépe oĩva rovake, he’i pe kuñataĩme: Ejerure chéve reipotáva ha ame’ẽta ndéve.

Ha ome’ẽ jevy jevy ichupe iñe’ẽ, he’ívo ome’ẽtaha ichupe oimeraẽ mba’e, taha’e hetã mbytere jepe. Ha’e osẽ ha oporandu isýpe: Mba’épa ajeruréta?

He’i ichupe: Ejerure ichupe Juan Bautista akãngue.

Pe kuñataĩ oike pya’e oĩháme mburuvicha guasu ha he’i ichupe: Aipota reme’ẽ chéve ko’ágã ite voi peteĩ ña’ẽmbépe Juan Bautista akãngue.

Upéva oguapy eterei mburuvicha guasúre. Ha ome’ẽ haguére iñe’ẽ opavave rovake ndaikatúi opyrũvo hese. Upévare ojapo mante pe mitãkuña ojeruréva ichupe. Ha pya’ete omondo peteĩ ñorairõhára ogueru haguã ichupe Juan akãngue. Upéva oho koty ypytũme, oñakã’o Juánpe, ha ogueraha iñakãngue peteĩ ña’ẽmbépe. Ome’ẽ upe kuñataĩme ha ha’e ome’ẽ isýpe.

Juan remimbo’e kuéra oikuaávo, ogueraha hetekue ha oñotỹ.

Ñandejára Jesucristo Ñe’ẽ