LECTURAS VIERNES DECIMOQUINTA SEMANA

LECTURAS VIERNES DECIMOQUINTA SEMANA

LECTURA PETEÎHA:

Ko’ágã ñahendúta Tupã Ñandejára ñe’ẽ Isaías arandukápe oĩ háicha 38, 1-6. 22. 7-8. 21

Umi árape mburuvicha guasu Ezequías hasy ete. Maranduhára Isaías Amós ra’y oho oñandúvo ichupe ha he’i: He’iuka ndéve Tupä Ñandejára: ‘Ere ne ñe’ẽ paha nde róga guápe, cháke remanóta hína. Nde rekuera mo’ã véima.’

Ezequías oñembojere oma’ẽ ogyke gotyo ha oñembo’e kóicha Tupä Ñandejárape: “Che Jára ne mandu’a kena aiko hague nde rape rupi añetehápe ha che py’a ite guive, ajapóvo upe reipotáva.” Ha Ezequías hasẽ soro. Tupä Ñandejára he’i Isaíaspe oho haguã he’i Ezequíaspe: “Tupã, nde ru ypykue David Jára, he’i: ‘Ahendu ne ñembo’e ha ahecha nde resay. Ambopukuvéta 15 áño nde rekove. Roipe’áta ndéve, ha Jerusalén guápe avei, Asiria ruvicha guasu pógui. Che añangarekóta ko távare.”

Ezequías oporandu: Mba’éicha piko aikuaáta ikatuha aha tupaópe?
Upéi he’i Isaías: “Peru mbaipy ígo, pemoĩ mburuvicha guasu ai rehe ha okueráta.”

Tupã Ñandejára Ñe’ẽ.

SALMO ÑEMBOHOVÁI Is 38, 10-12abcd. 16

Opavave: Tupã Ñandejára nde upe che moingovéva

Che ha’e kuri che jupe,
che rekove hi’aju jave aha va’erã.
Añemondo omanóva retãme, ojepe’a che hegui umi ára
hembýva gueteri chéve. O.

Che ha’e kuri che jupe, ndahecha mo’ãvéi
Ñandejárape ko yvy ári.
Ndahecha mo’ãvéi yvypóra
avavépe ko yvy ári. O.

Ojehupi che róga vakapi ha ojereraha che hegui
ovecha rerekua róga vakapícha.
Che rekove ojogua peteĩ poyvi
ojepyaháva ha oñekytĩ ichugui henimbo. O.

Umi Tupã Ñandejára omo’ãvape oikovéta
ha ijespíritu omombaretéta opa mba’e oïva ipype
ha umíva ndive aikovéta che.
Nde che mongueráta ha che moingove jevýta. O.

ALELUIA Jn 10, 27

Aleluia.
Ñandejára Jesucristo he’i: “Che ovechakuéra ohendu che ñe’ë,
Che aikuaa ichupe kuéra ha ha’ekuéra oho che rapykuéri”.
Aleluia.

EVANGELIO

Ko’ágã ñahendúta Ñandejára Jesucristo rekove ha hemimbo’e San Mateo omombe’u háicha 12, 1-8

Upe ramo Jesús ohasa ohóvo kokue rupi peteĩ pytu’uha árape. Ha hemimbo’ekuéra iñembyahýigui, oñepyrũ oipo’o trígo ha ho’u.
Umi fariséo ohecha upéva he’i Jesúspe: Ema’ẽmi, ne remimbo’e kuéra niko ojapo, ojejapo’ỹ arã pytu’uha árape.

Jesús katu he’i ichupekuéra: Nda peikuaái nga’u piko mba’épa Tupã Ñandejára Ñe’ẽme he’i David ha iñirũ nguéra ojapo hague iñembyahýi ramo guare? Oike hikuái Tupaópe ha ho’u umi mbujape Tupãme oñemboyke va’ekue. Ha’e térã iñirũ nguéra ndaikatúi va’ekue ho’u umíva, pa’i kuérape guarã añónte va’ekue umi mbuja.

Nda peikuaái nga’u piko Moisés rembiapoukapýpe he’iha, pa’i kuéra ndo pytu’úi ramo jepe pytu’uha árape Tupaópe, upéva ndo jererekoiha ichupekuéra tembiapo vai ramo? Che katu ha’e peẽme, ko’ápe oĩha hína peteĩ mba’e guasuvéva Tupaógui.

Peẽ nda peikuaái mba’épa he’ise Tupã Ñandejára Ñe’ẽme he’ihápe: “Che aipota peiporiahuvereko pende rapichápe, pemymbajuka rangue chéve.”

Upéva peikuaa rire nda pejéi va’erã mo’ã ojapo vai’ỹvare ojavyha. Che, yvypóraicha aju va’ekue, areko che pópe ha’évo mba’e-mba’épa ikatu ojejapo pytu’uha árape.

Ñandejára Jesucristo Ñe’ẽ.