MARTES XIII DEL TIEMPO ORDINARIO

LECTURA PETEÎHA:

Ko’ágã ñahendúta Tupã Ñandejára ñe’ẽ Apóstolkuéra rembiapokuépe oĩ háicha        12,1-11

Umíva umi árape mburuvicha guasu Herodes oñepyrũ oñemoĩ pe iglésiare. Ojukauka kyse pukúpe Juan ryke’y Santiágope. Ha ohechávo upéva oguerohoryha Israelgua, oapresa avei Pédrope. Kóva ojehu  umi  ára oñembyarete jave pan añembovu’ỹva.

Herodes omoingeka Pédrope kárselpe, oñangarekohápe hese  4 soldado aty, 4 ñorãirõhára reheve peteĩ-teĩ atýpe. Omoĩse chupe tetãgua pópe Páskua arete rire.

Pedro oĩ aja kárselpe, pe iglésia oñembo’e hese ipy’aite guive. Upe Herodes omoĩtaha árape Pédrope tetãgua pópe, ha’e oke hína mokõi soldado pa’ũme, ojepokua mokõi kadénape, ha okápe soldado kuéra oñangareko pe okẽre.

Upeichaháguinte oguahẽ sapy’a peteĩ Ñandejára Ánhel, ha pe koty ypytũ ojehesapepa. Pe Ñandejára remimbou opoko Pédrore ijyképe ha omombáy chupe he’ívo: “Epu’ã pya’e!” Upévo umi kadéna ho’a Pedro pógui, ha Tupã remimbou he’i chupe: “Eñemonde ha emoĩ nde sapatu.”

Pedro ojapo upéicha ha pe Tupã remimbou he’i jey: “Emoĩ nde ahoja ha che moirũ.” Pedro osẽ pe Tupã remimbou rapykuéri, oikuaa’ỹre añetépa pe Tupã remimbou rembiapo térã iképe guánte upe ohecháva. Ohasa rire hikuái pe soldado aty peteĩha ha upe mokõiha, oguahẽ upe oka pegua okẽ fiérrope, ha upéva ojepe’a ijehegui rei. Osẽ hikuái ha ohasa rire peteĩ tape, pe Ánhel oheja chupe.

Upérõ Pedro ohechakuaa ha he’i: “Ko’ágã ae ahecha porã Ñandejára, hemimbou rupi, che pe’a hague Heródesgui ha umi Israelgua che rehe ojapose va’ekuégui.”

Tupã Ñandejára Ñe’ẽ.

Opavave: Romomba’e guasu ndéve, Ñandejára

SALMO ÑEMBOHOVÁI 33, 2-9

Opavave: Ñandejára che pe’a jejopy vaígui.

Amomba’e guasúta opa ára Ñandejárape, chupe aropurahéita tapiaite.

Ñandejára ombovy’a che rekove. Imboriahúva tohendu ha tovy’a! O.

Oñondive ñamomba’e guasu Ñandejárape, héra jaropurahéi oñondivepa.

Ñandejárape añembo’e, ha’e che rendu ha oipe’apa che hegui umi mba’e che mongyhyjéva. O.

Umi Ñandejára rehe ojeroviáva vy’águi ojajaipáne, ha hova noñomi chéne ñemotĩgui.

Che, tekove poriahu, Ñandejárape añembo’e.

Ha’e, che rendu ha che pe’a jejopy vaígui. O.

Ñandejára remimbou oñangareko ha oguenohẽ jejopy vaígui

opa umi hese ojeroviávape. Peha’ã ha pehecha Ñandejára imba’e porãha.

Ovy’a rasa upe hese ojeroviáva O.

LECTURA MOKÔIHA

Ñahendúta Tupã Ñandejára Ñe’ẽ San Pablo kuatiañe’ê mokôiha Timotéope oi háicha

4, 6-8.17-18

Che katu aiméma ame’ẽ haguãicha che rekove Tupãme ikuave’ẽmby ramo. Hi’aguĩma ára amano haguã. Hekoitépe niko añorãirõ, ipahaite peve añani, ha ndajeíri che jeroviágui.

Ha ko’ágã aha’arõ hína pe koróna Ñandejára Jesu- cristo, Juez heko jojáva, omoĩtava che akãre pe árape, che reko potĩ haguére. Ha ndaha’e mo’ãi chéve añónte ome’ẽtava. Ome’ẽta avei opa umi ipy’aite guive oha’arõ- vape ha’e ou jey.

Ñandejára mante che pytyvõ ha che mombarete. Upévare, ikatu vaekue amoherakuã pe marandu osalváva opa umi Tupãre ojerovia’ỹvape. Ha upéicha Ñandejára Jesucristo che pe’a jaguarete jurúgui. Ha’e che mo’ãne opa mba’e vaígui, ha che reraháne yvágape ha’e oisãmbyhyhápe. Toñemomba’e guasu chupe opa ára! Amén.

Tupã Ñandejára Ñe’ẽ.

O. Romomba’e guasu ndéve, Ñandejára.

ALELUIA Cf. Mt. 16,18

Aleluia.

Pedro, nde réra niko he’ise ita. Ko ita ári amopu’ãta che iglésia, ha mano jepe nda’ipu’aka mo’ãi hese.

Aleluia

EVANGELIO

Marandu porã Ñandejára Jesucrísto rekove ha hemimbo’e San Mateo omombe’u háicha

16, 13 – 19

Jesús oguãhẽmbotávoma Cesaréa Filípope, oporandu idisípulo kuérape:

— Mba’éiko oje’e che rehe upe rupi. Mavaha che piko he’i hikuái.

He’i chupe hikuái: — Oĩ he’íva nde rehe, nde Juan Bautistaha. Oĩ katu he’íva ndeha Elías, ha oĩ ave he’íva ndeha Jeremías térã ambue proféta.

Jesús oporandu chupe kuéra: — Ha peẽ piko mba’e peje. Mávaiko che.

Ha Simón Pedro he’i chupe: — Nde hína pe Mesías, Ñandejára oikovéva Ra’y.

Jesús he’i chupe: — Ñandejára ta nde rovasa ndéve Simón. Ndejeheguínte ndereikuaái vaerã mo’ãi kuri péva, che ru yvagapegua ndoikuaaukái rire ndéve. Ha ha’eve ndéve Pedro, nde  réra niko he’ise ita. Ko ita ári amopu’ãta che iglésia, ha mano jepe nda’ipu’aka mo’ãi hese. Nde pópe amoĩta Ñandejára Rréino rokẽ reipe’a haguã. Ha opa mba’e nde emosãva ko yvy ári oñemosãta avei yvágape. Ha opa mba’e nde reheja reíva ko yvy ári, yvágape avei ojeheja reíta.

Ñandejára Jesucristo Ñe’ẽ.

O. Romomba’e guasu ndéve, Ñandejára Hesukrísto.

EVANGELIO

Marandu porã Ñandejára Jesucrísto rekove ha hemimbo’e San Mateo omombe’u háicha

16, 13 – 19

Jesús oguãhẽmbotávoma Cesaréa Filípope, oporandu idisípulokuérape:

— Mba’éiko oje’e che rehe upe rupi. Mavaha che piko he’i hikuái.

He’i chupe hikuái: — Oĩ he’íva nde rehe, nde Juan Bautistaha. Oĩ katu he’íva ndeha Elías, ha oĩ ave he’íva ndeha Jeremías térã ambue proféta.

Jesús oporandu chupekuéra: — Ha peẽ piko mba’e peje. Mávaiko che.

Ha Simón Pedro he’i chupe: — Nde hína pe Mesías, Ñandejára oikovéva Ra’y.

Jesús he’i chupe: — Ñandejára ta nde rovasa ndéve Simón. Ndejeheguínte ndereikuaái vaerã mo’ãi kuri péva, che ru yvagapegua ndoikuaaukái rire ndéve. Ha ha’eve ndéve Pedro, nde  réra niko he’ise ita. Ko ita ári amopu’ãta che iglésia, ha mano jepe nda’ipu’aka mo’ãi hese. Nde pópe amoĩta Ñandejára Rréino rokẽ reipe’a haguã. Ha opa mba’e nde emosãva ko yvy ári oñemosãta avei yvágape. Ha opa mba’e nde reheja reíva ko yvy ári, yvágape avei ojeheja reíta.

Ñandejára Jesucristo Ñe’ẽ.

O. Romomba’e guasu ndéve, Ñandejára Hesukrísto.