MIÉRCOLES XIV DEL TIEMPO ORDINARIO

LECTURA PETEÎHA:

Ko’ágã ñahendúta Tupã Ñandejára ñe’ẽ Génesis arandukápe oĩ háicha 21,3. 5. 8-20

Abraham oguereko 100 áño, oikove ypy ramo guare Isaac. Isaac okakuaa. Ára opo’o haguépe Abraham ojapo karu guasu.

Ismael, Agar Egiptogua memby ha Abraham ra’y, oñembohory Isaac rehe. Sara ohecha upéva ha he’i Abrahámpe: Emosẽ pe tembiguái ha imembýpe. Imembýpe niko ndajaheja mo’ãi mba’eve; ñane rembireja che memby Isaácpe guarãnte.

Abraham ombyasy eterei upéva. Ismael niko ita’ýra avei. Tupã Ñandejára katu he’i ichupe: Ani rejepy’apy upe mitãre térã ne rembiguáire. Ejapo he’i háicha Sara. Isaácgui osẽta ne ñemoñare ha’e va’ekue ndéve. Ne rembiguái membyrégui avei osẽta heta tetã guasu. Ha’e ne ñemoñarégui avei.

Upe ára oúvape Abraham ome’ẽ Agárpe hi’upy ha peteĩ y ryru. Ohupi ichupe ijati’ýre ha ome’ẽ ichupe imemby ha omondo. Ha’e oiko águio pégotyo yvy ojeiko’ỹha Beerseba peguápe.

Opa vove hi’y, oheja imemby petỹ javorái guýpe, ha oho oguapy hovái 100 métro rupi mombyry ichugui , he’ívo ipy’apýpe: “Ndaikatúi ahecha che memby omano ramo yuhéigui.” Ha’e oguapy aja upépe upe mitã oñemoĩ hasẽ.

Tupã Ñandejára ohendu upe mitã rasẽ. Tupã Ñandejára remimbou ohenói yvágagui Agárpe ha he’i ichupe: Mba’e piko ojehu ndéve Agar? Ani rekyhyje. Tupã Ñandejára ohendu upe mitã rasẽ yvága guive. Tereho ipiári, emboguata nde ykére ipógui. Iñemoñarégui ajapóta tetã guasu.

Upépe Tupã Ñandejára ohechauka sapy’a ichupe peteĩ ykua. Ha omoenyhẽ hi’y ryru ha omboy’u imembýpe. Tupã Ñandejára oñangareko upe mitãre okakuaáva yvy ojeiko’ỹha hérava Paránpe. Ha oiko ichugui tymba ka’aguy jukaha ikatupyrýva. Isy ogueru ichupe hembirekorã Egíptogui.

Tupã Ñandejára Ñe’ẽ.

SALMO ÑEMBOHOVÁI 33, 7-8. 10-13

Opavave: Umi Ñandejárape oñembo’éva noikotevẽi chéne mba’eve.

Che, tekove poriahu, Tupã Ñandejárape añembo’e.
Ha’e, che rendu ha che pe’a jejopy vaígui.
Ñandejára remimbou oñangareko
ha oguenohẽ jejopy vaígui opa umi hese ojeroviávape. O.

To momba’e Ñandejárape, umi oñemboyke va’ekue ichupe,
umíva noikotevẽi chéne mba’evére. .
áçante imboriahu ha iñembyahýine.
Umi Ñandejárape oñembo’éva noikotevẽi chéne mba’eve. O.

Peju che ra’ykuéra ha pehendu:
pombo’éta pemomba’e haguã Tupä Ñandejárape.
Oĩpa oikove pukuséva?
Oĩpa vy’ápe oikoséva? O.

ALELUIA Sant 1, 18

Aleluia.
Ñande Ru niko ñande apose iñe’ẽ añetegua rehe ae, jaiko haguã mba’e porãita tenonderã itéva hembiapokue.
Aleluia.

EVANGELIO

Ko’ágã ñahendúta Ñandejára Jesucristo rekove ha hemimbo’e San Mateo omombe’u háicha

8, 28-34

Upe ramo Jesús oguahẽvo yvy hérava Gadárape, oĩva yguasu mboypýri, mokõi kuimba’e osẽ umi tyvy pa’ũgui ha ohuguãitĩ ichupe.

Umi mokõi oĩ mba’epochy poguýpe, ha ndaipóri upe rupi ohasáva ichugui kuéra. Hatã osapukái hikuái ha he’i: Aníke rejapo ore rehe mba’eve, Tupã Ra’y. Reju piko ore mbohasa asývo ára paha oguahẽ mboyve?

Namombyrýi upégui oĩ heta kure okarúva hína, ha umi mba’epochy he’i Jesúspe: Ore mosẽta ramo, eheja oréve toroike umi kure retepýpe. Ha Jesús he’i ichupe kuéra: Tapeho.

Ha umi mba’epochy osẽ umi kuimba’égui ha oho oike umi kure retepýpe. Upepete, hetakue umi kure oho ojepoi ýpe, ha upépe omanomba.

Umi kure rerekua katu pya’e oho ha omombe’u opa mba’e itávape, ha mba’épa ojehu umi kuimba’épe, mba’epochy poguýpe oiko va’ekuépe. Ha tavagua maymáva osë oho Jesús rendápe. Ha oguahẽvo ha’e oĩháme, ojerure asy hikuái ichupe oho haguã upégui.

Ñandejára Jesucristo Ñe’ẽ