Ñahendu Jesús Ñe’ẽ. 22 de diciembre. Feria de Adviento

Escucha el evangelio y la reflexión en: https://youtu.be/DvR4zVlFMCw

22 diciembre. Adviento

Lucas 1, 46 – 55

Upérõ María he’i Isabel pe: Che py’aite guive aguerohory Ñandejárape. Che ánga rugua guive aguerohory Ñandejára, che salvadórpe. Ñandejára omoĩ hesa che rehe, che niko hembiguaimínte.

Águi rire opavave he’íne chéve: «María, Ñandejára nde rovasa». Ñandejára ipu’akapáva niko mba’e guasuete ojapo che pype. Ha’e niko imarangatu.

Ñandejára oiporiahuvereko opa ára umi chupe omomba’e guasúvape. Ha ipokatúpe katu ohundi umi ojejapóvape. Poguasúpe oity iguapyhágui ha heko mirĩvape katu ohupi.

Umi iñembyahýivape omyenyhẽ mba’e porãgui, ha po nandi orrepunta umi imba’e retávape. Oipytyvõ hetã Israélpe.
Oiporiahuvereko chupe ha ndahesaráiri chugui. Péicha voi he’i va’ekue ojapotaha ñande rukuéra ypykuépe, Abraham ha iñemoñarépe.

Ñandejára Hesukrísto ñe’ẽ.

ÑAMBOGUEJY ÑANDE REKOVÉPE…

“Oikovéva piko péva nde. Noñeñandukái ete niko”. Ja’e jepi ñande, oiméramo ñane hénte, térã ñane irũ nañanerenoi, ndajaikuaái ichugui mba’eve. Tuicha mba’éko pe ñañeanduka, ñañoatõi imínte jepe. Ñañohenói, ñañemongeta, ndaikatúiramo jaha jajotopami. Ñambohasa mensaje ha jahechauka nañanderesaraiha umi jahayhúva ha ñande rayhúvagui avei.

Jahecha ningo María oho meme oñandu Isabélpe, ha’éva ipríma, hye guasuetéva avei Juan Bautístagui. Tuicha vy’ápe oñuguaitĩ hikuái. Oñomoñe’ẽmba ha ipy’aite guive ojoecha ramo. Oiméne oñemongeta puku, omombe’u ojupe mba’éichapa Ñandejára tuicha mba’e ojapo hekovépe. Oñembo’e oñondive ha oñomokyre’ỹ ijeroviápe.

Ko Navidápe iporãiténe, che reindy ha nde che irũ, ñande avei ñañeandukami umi imombyrymívape ñande hegui. Ñamombe’u ha ñahendumi ñande rapicha rembiasa.

Mba’épa Ñandejára ojapo ñande rekovépe, mba’épa ome’ẽ ñandéve, mba’éiguipa ñande salva. Ñamombe’u ojupe ñambyasýva ha ñanembovy’áva. Ha ñañembo’e ramo oñondive katu iporãvéntema.

Pa’i Alberto Luna.