Ñahendu Hesu. 23 de diciembre. Feria de Adviento

Escucha el evangelio y la reflexión en: https://youtu.be/hkgdZKxsg6c

23 diciembre. Adviento

Lucas 1, 57 – 66

Isabel imembývo, opa umi hóga jereregua ha hogaguakuéra oho joa oguerohorývo chupe. Ohecha kuaa hikuái Ñandejára ipy’a porã hague hendive. Ha 8 ára haguépe ogueraha hikuái pe mitã osirkunsida haguã. Ha omoĩse mo’ã chupe hikuái itúva réra, Zacarías.

Isy katu he’i: — Nahániri. Héra va’erã Juan.

Ha umi oĩva upépe he’i chupe: — E’a, pende apytépe niko ndaipóri avave péicha hérava.

Upémarõ, oporandu hikuái Zacaríaspe mba’éichapa omboherase pe mitã. Zacarías ojerure peteĩ pisárra, ha omoĩ hese “Juan”. Ha opondera joaite hikuái. Upépe, Zacarías oñepyrũ jey oñe’ẽ, ha oñemoĩ omomba’e guasu Ñandejárape. Umi hóga jerére oikóva
opondera joa. Ha opa Judá sérro pa’ũ rupi herakuã pe ojehúva.

Ohendúva guivénte he’i: “Mba’e apoharãnepa ko mitã”. Ohecha kuaa niko hikuái Ñandejára oĩha hendive.

Ñandejára Hesukrísto ñe’ẽ.

ÑAMBOGUEJY ÑANDE REKOVÉPE…

Ñanemandu’ami imembýramo ñande rogagua, ñane hénte, térã ñande vesína. Ojeho joa ojecha upe mitã oguahẽva. Ha oĩma katu ñemongeta mba’éichapa hérata.

Orahátapa itúva, isy, ijaguélo, itia, ihénte kuéra réra. Térã mba’e sánto árapepa ou ha mba’e. Juan Bautísta onase ramo guare niko ou la hénte ohecha ramo. Ijurujaipa ha he’i joa hikuái: Mba’épa oikóta chugui okakuaa vove.

He’i ningo ñande ypykuekuéra guaraní, peteĩ mitã oúramo, ñande rukuéra ombouha chupe ha oñemboapyka yvy ári opavave apytépe. Ha upe ñemboapyka ningo he’ise hína pe mitã, oguapy vaerã ñande apytépe, oreko va’erã hendaguã, ija va’erã pe familia, pe komunida pa’ũme. Ndaikatúi hembývo, ndaikatúi oñembo’yke, ha’égui ñande ru kuéra remimbou.

Jahecha mba’éichapa Isabel imemby ramo guare, oñeme’ẽ imembýpe héra, he’iseva ojeapoha mba’érõ. Heta mitãgui oñenega pe itúva réra, itúva apellido.

Chímboicha ojereko. Ha pe mitã oúva, peteĩ teĩ ndou reíri. Upéva oreko hendaguã, oreko hembiaporã, imisión ko yvy ári. Ñandejára ojokuái chupe. Marãve ndoikói yvypóra ndohechakuaái ramo, péva ndoipe’ái ichugui pe oguerúva ijehe opa ára guarã.

Mba’épa reñandu che irũ ha nde che reindy umi mitã nde rogaguáre, ne héntekuéra apytépe. Oimépa oñembotapykuéva, tekotevẽva ñambojeroviave, jahecha ramo ha ñame’ẽ ichupe hendaguã ñande apytépe.

Pa’i Jasy.