Ñahendu Jesús Ñe’ẽ. Navidad víspera pyhare

Escucha el evangelio y la reflexión en: https://youtu.be/QKXbBb_NTko

Navidad víspera pyhare Mateo 1, 18 – 25

Jesucristo oúramo guare kóicha va’ekue: Isy María ome’ẽma iñe’ẽ omenda haguã Josére. Ha oiko mboyve oñondive, María ojejuhu hye guasuha Espíritu Santo rupi. José katu, kuimba’e ijoheipyréva, nomoherakuã vaiséi chupe. Oheja reise mo’ãnte chupe, avave oikuaa’ỹre.

Ko’ã mba’e ombojere aja iñakãme, ojehechauka chupe iképe Ñandejára anhél, ha he’i chupe: José, David ñemoñare, ani rekyhyje reraha haguã ne rembirekorã Maríape. Pe mitã ha’e oguerekótava niko Espíritu Santo pu’aka rupi ou.

María imembýta ha rembohérata pe mitã Jesús. Ha’e ou hína osalva haguã tetã Israel. Ko’ã mba’e ojehu oiko haguã hekoitépe upe Ñandejára he’iva’ekue proféta ñe’ ẽ rupi: “Kuñataĩ imarã’ỹva hye guasúta ha imemby kuimba’éta. Oñembohérata Emanuel, (he’iséva “Tupã oime ñane ndive”).” Ha oiko’ỹre oñondive imemby María, ha José ombohéra Jesús.

Ñandejára Jesucristo ñe’ẽ.

ÑAMBOGUEJY ÑANDE REKOVÉPE…

Pe mitã onace ramóvaicha ikangy ha ndaijeheguíriva niko ndaipóri. Ha’e anga niko oñesambotymi oguahẽvo, ndojevaléi ijehe. Ha jahejáramo ha’éño ndoikove are mo’ãi. Pe isy mborayhu rupi ha’e oikove, okambu, okakuaa ha opu’ã oguata upéi.

Ñandejára ñande ru ipu’akapáva niko hesaho Maríare. Mitãkuña mboriahu oikóva peteĩ pueblito kañy’ípe amo tetã Israel ruguápe. Ohayhu chupe, oiporavo Jesús syrã. Jahecha avei Josépe, iñe’ẽrendúva Ñandejárape ha ohayhúgui pe mitãkuñami Maríape omoguahẽ chupe hógape. Omenda hese ha oiko ha’e Ñandejára rembijokuáiramo.

Jesús sy ñangarekohára. Ha’e oĩ ijykére María ojeko ha ojevale haguã hese. José ha’e hína María defendehára. Ha ñande sy Tupãsy, Ñandejára ñe’ẽrendúpe ohayhu imemby Jesús, oúva mitã kangýicha María jyva ári. Mboriahumi ndorekóiva mamópa oñenóta, nome’ẽigui ichupekuéra hendaguã, oñemopa’ũva vaka kehápe. Ha María upévante ohayhu ipy’aite guive, ha oiko ichugui pe mitã serviha, ha oime ome’ẽvo hekove pe imemby rayhupápe.

José ha María ohechauka ñandéve mba’éichapa jahayhu va’erã umi michĩvévape, ñane rakate’ỹ ha jaiko va’erã hesevekuéra. Ha’ekuéra ñanembo’e mba’éichapa jahayhu va’erã ikangy ha imboriahúvape, ñamoirũ ichupekuéra, ñahendu hembiasa.

Ema’ẽvo hesekuéra nde pesébrepe, che reindy ha nde che irũ, mba’e reñandu ikatuha ejapo nde ave remoañeteve haguã upe Navida he’iséva nde rekovépe, nde rogapy ha reiko hárupi.

Pa’i Jasy.