Ñahendu Jesús Ñe’ẽ. NAVIDAD ÁRA

Escucha el evangelio y la reflexión en: https://youtu.be/KrErAwCy1fo

25 de diciembre: Navidad ára Lucas 2, 1-14.

Jesús onase mboyvemi, emperador Augusto ojapouka peteĩ sénso oikuaa haguã máva-mávapa hína umi oikóva ipoguýpe. Quirínio upe ramo gobernador va’ekue Síriape, ha chupe ho’a ojapóvo pe sénso Palestínape. Opavave oho va’erã ivállepe, omoĩ haguã héra kuatiápe.

Upévare, José osẽ Nazarétgui opytáva Galiléape, ha oho Belénpe oĩva hína Judéape.

Upépe niko onase vaekue rréi David, ha José niko David ñemoñare va’ekue. María niko upérõ hye guasetéma hína, ha oho ave José ndive. Ha Belénpe oĩ aja hikuái, Maríape oguãhẽ hi’ára imemby haguã. Ha ndojuhúigui hikuái mamove opyta haguã, oheja chupekuéra opyta óga guýpe mymba kuéra apytépe. Ha upépe onase imemby kuimba’e.

Omonde mitã aópe ha omoñeno peteĩ mymba karuhápe. Belén ypýpe oĩ upe pyhare ovecha rerekua oñangarekóva hína ñúme hymba kuérare.

Peichaháguinte ojechauka sapy’a chupe kuéra Ñandejára ángel peteĩ. Ha Ñandejára mimbipa ojaho’ipágui chupekuéra, okyhyjepa hikuái. Ñandejára ángel katu he’i chupekuéra: “Ani pekyhyje. Aru hína peẽme marandu iporãva, ombovy’átava opavavépe.

Péina ko pyhare onase kuri, David vállepe, pende salvador. Upéva hína pe Mesías, Ñandejaraite voi. Peikuaáta mávapa, pejuhúvo oñeñuã mitã aópe, ha oñeno hína vaka karuhápe.”

Upéicha háguinte, ojechauka sapy’a yvágape heta Ñandejára ángel, oguerohorýva Ñandejárape, ha he’íva: Toñemomba’e guasu yvágape Ñandejára, ha py’a guapy tou opa yvypórape, Ñandejára ohayhúva.

Ñandejára Jesucristo ñe’ẽ.

ÑAMBOGUEJY ÑANDE REKOVÉPE…

Opa tetã rupi oi purahéi Navida rehegua. Ñane retãme jareko avei: Navidad de flor de coco, Dos trocitos de madera, ha mba’e. Oime avei pe purahéi porãite ojapo va’ekue Emiliano R. Fernández níño ára peguarã, he’íva: “Ñesuháme ne rokẽme ajurofelisita, arúvo ndéve guarã ne santo ára guahẽme, ko ivíspera pyharépe tupaópe orrepika la incomparable alegría oanuncia ne nacimiento.”

Ha osẽ haguéicha mombyry ivállegui José ha María, heta iterei oime ñandevrapicha omýiva ha osẽva hetãgui. Umíva hína migrante. Heta ñande vallegua niko osẽ va’ekue avei ñane retãgui jeiko porãve rekávo. Oiko ichuguikuéra migrante. Ha sapy’ánte oñandu hikuái noñemoguahẽ porãi ha oñemboyke imboriahu haguére, oñemboyke haguéicha Tupãsy, hye guasuetéva, karai San José ha pe Níño Jesús onase potáva.

ÑAÑEMBO’E OÑONDIVE
Ñandejára Jesucristo, nde reju va’ekue eguerúvo oréve vy’a ha py’aguapy. Ore roipota eguahẽ ore rógape ha rojapose ndéve, nde sy Maríape ha nde ru San Josépe, nerendaguã, epyta haguã ore apytépe. Amén.

Pa’i Jasy.