Ñahendu Jesús Ñe’ẽ. 31 de julio: San Ignacio de Loyola ára

Escucha el evangelio y la reflexión en: https://youtu.be/D1OmAW7qFSM

31 de julio: San Ignacio de Loyola ára

Lucas 14, 25-33

Heta umi ohóva oikóvo Jesús ndive mamo ohoha rupi. Upéma ramo he’i chupekuéra: Peikosérõ che disípulo ramo, che rayhuve va’erã chéve pende rúgui, pende sýgui, pene rembirekógui, ha opa pene famíliakuéragui.

Ndaikatúi peiko che disípulo ramo pene rakate’ỹ ramo pende rekovére. Na peiméi ramo pehupi haguã pende kurusu ha che moirũ, ndaikatúi peiko che disípulo ramo.

Ja’éntena pemopu’ãseha peteĩ tórre. Mba’e pejapo raẽ. Peguapy pehecha mbovýpa pende rupytýta peikuaa haguã perekópa hepyrã. Peicha’ỹrõ, peñepyrũ kuaa pemopu’ã ha ágã upéi tape ku’a rupi peso. Ha upéi ojepukapa pende rehe. Osẽne he’i hikuái, “Ajépako nde výro. Reñepyrũ ha ndaikatúi ejapopa”.

Ha mba’épa ojapóne peteĩ rréi 10 mil soldádonte oguerekóva ha osẽséva oñorãirõ 20 mil oguerekóva ndive ha oúva hína hi’ári.

Ohecha raẽta ikatúnepa ipu’aka pe oguerekóva reheve. Ha ohecha kuaávo ndai’ipu’aka mo’ãiha hapicháre, mombyrymi guive omondóne hendápe hembijokuái oñomongeta anivéma haguã oiko vai. Upévare ha’e peẽme, peikosérõ che disípulo ramo, pehejapa vaerã opa mba’e perekóva.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Oime niko umi mba’e jaipota asýva, hi’ãitéva ñandéve jahupyty. Ñapensáva hese ha ñande képe jepe jahecháva. Péicha ndaje raka’e Ignacio de Loyola, ko árape ñanemandu’aha hína. Ha’e ningo oikose terei va’ekue karai guasu ramo, ojecha ramóva ha oñemomba’e guasúva.

Yvate voi ha’e oma’ẽ. Ha upevarã oiko hatã, oheka mba’éichapa ojupíta ha opyta porãta karai rréi ha mburuvicha kuéra ndive. Ha iñakãraku avei raka’e Ignacio karai rréi rajy rehe voi. Ndaha’éi voi vyrésa la oipotáva.

Ha upéicha oiko hárupi umi karai guasu kuéra apytépe, oiko chugui soldádo ha oike peteĩ ñorairõ guasúpe. Ha upépe omongora ichupe kuéra ikontrário Francia gua ha mitã Ignacio noñentregaséigui, ndoikuaáigui avei upe Hesu he’i vaekue, oñorairõ ipahaite peve.

Ojapi ichupe hikuái hetymáme peteĩ cañón válape, omopẽ vaipaite ha oheja’iete ichupe. Upépe ñande ra’y hasyete, haimete voi omano.

Ojerure socorro Ñandejára ha sántokuérape oĩ háicha ha nomanói. Ha upégui okuera aja ohóvo ou ha’e olee umi lívrope oĩva Hesukrísto rekove, santokuéra rembiasa hamba’e. Ha mbeguekatúpe ou iñakãraku ha’e ohechávo tuichaite mba’e umi santokuéra ojapo va’ekue. Ha oñepyrũ opensa: Mba’épa oikóne che ajapóramo ko San Francisco ha Santo Domingo ojapo va’ekue. Ha ipy’a guasu voi ningo ha’e. Ha he’íma katu: San Francisco ojapo ramo, che avei ajapóne, ha Santo Domingo ojapóramo che ajapótante avei.

Ndépa che irũ ha che reindy epensa ikatúne haguã ejapo avei umi santo kuéra ojapo va’ekue, San Roque González, Chiquitunga, ha mba’e. Téra ambue reikuaáva, imarangatu ha imba’e porãva oiko vaekue Ñandejára rapére. Mba’épa reñandu.

Pa’i Alberto Luna.