Ñahendu Jesús Ñe’ẽ. Jueves 17º Durante el Año

Escucha el evangelio y la reflexión en: https://youtu.be/lkBOkTMr-bU

Jueves 17º Durante el Año Mateo 13, 47 – 53

Upérõ Jesús he’i opavavépe: Ñandejára Rréino niko ojogua ku rred ýpe japoívape, ha oitýva opaichagua pira. Henyhẽ vove pirágui, ñambotyryry y rembe’ýpe ha upépe jaiporavo umi pira. Ñamoĩ ajakápe umi iporãva ha umi oje’u’ỹva katu ñamombo. Péicha avei ojehúta ãga ára pahápe. Ñandejára ángelkuéra osẽta oipe’a umi heko vaíva umi heko potĩva apytégui. Umi hembiapo vaíva ojeitýta Aña retãme, ha upépe ojahe’óta hikuái ha omopururũta hãi.

Jesús oporandu idisípulokuérape: — Peikuaa piko mba’épa he’ise ko’ã mba’e.

Ha’ekuéra he’i chupe: — Roikuaa.

Upéi Jesús he’i chupekuéra: — Opa oñemo’arandúva Ñandejára Ñe’ẽme ha oikéva Ñandejára Rréinope niko ojogua ku óga járape oguenohẽva ikarameguãgui mba’e ipyahúva ha itujáva. Jesús omombe’upa rire ko’ã káso, osẽ oho upégui.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Pira apytépe niko oĩ iporãva ja’u haguã ha oime avei ipire atãva, hatĩ etereíva ha mba’e. Ohóva peskádape omombo umíva ha oraha hógape umi iporãvante ovende térã ho’u haguã.

Ko’ápe ñahendu Jes ombojoja pe Ñandejára Rréino ára pahápe oútava hína peteĩ peskáda guasu ramo guáicha. Ñandejára oitýta hápe peteĩ rred guasu ombyatýva opaite umi pira oĩva guive. Ha Ñandejára upe oiporavoukátava mávapa umi opyta va’erãva hendive vy’a apyra’ỹme yvágape, ha mávapa umi hembýva ha oñemombo va’erãva okápe.

Ikatu ñande ja’e: Ha mba’érã piko Ñandejára oha’arõta ára paha ohundi haguã umi Aña tajasu ñandereko asyetéva. Ha oiméneko Ñandejára oikuaa ojapóva. Oha’arõne hína heta ko’ãga oiméva gueteri aña poguýpe ojehekýi ha omohenda hekove.

Oiméneko oipota hína umi hese ojeroviáva oñemombareteve teko marangatúpe Aña ñuhã kuéra apytépe. Ja’énte ningo. Moõ piko ñande jaikuaapáta Ñandejára ohecha ha oikuaáva. Jajerovia jepe ningo pe karai guasúre ha jaikuaa ha’e ojapóva ndaikatu mo’ãi
ivai amo ipahápe, ko’ágã nahesakãmbáiramo ramo jepe ñandéve.

Ha’e omohendáne peteĩ teĩ hembiapo ojerure háicha. Ha ñande upe aja ñañomboguata ha ñañeha’ã ojuehe. Jaipe’a jahávo ñande rekove ha ñande rapicha rekovégui umi Aña delihéncia ha ñañeprende hatã hatãve Ñandejára Jesucristo re.

Taiporãve ohóvo ñande rekove, japyta haguãicha ñañembo’y hápe henondépe. Ani ñañakaitỹ ha ñatĩ hovái ñañemosẽvo ijykégui.

Pa’i Alberto Luna.