Ñahendu Jesús Ñe’ẽ. Santa Marta, María ha Lázaro ára

Escucha el evangelio y la reflexión en: https://youtu.be/uezG1WOZ0_w

29 julio: Santa Marta, María ha Lázaro ára Juan 11, 19 – 27

Upérõ heta Judeagua oho oñandúvo Marta ha Maríape ikyvy Lázaro omano haguére. Marta ohendúvo Jesús og̃uahẽha oúvo, osẽ huvãitĩvo. María katu opyta hógape. Marta he’i Jesúspe:— Mbo’ehára, reime rire ko’ápe niko che kyvy nomanói vaerã mo’ã. Aikuaa jepe niko Ñandejára ikatúne hag̃ua ome’ẽ ndéve oimeraẽ mba’e chupe rejeruréva.

Jesús he’i chupe: — Nde kyvy oikove jeýta.

Marta he’i chupe: — Che niko aikuaa ág̃a ára pahápe oikove jeytaha, opa umi omano vaekue oikove jeývo.

Upépe Jesús he’i chupe: — Chéko hína pe amoingove jeýva opa omanóva. Che rehe ojeroviáva, omano ramo jepe oikovéta. Ha opa oikovéva ha ojeroviáva che rehe, nomano mo’ãi araka’eve. Ndéiko rerovia ko’ã mba’e.

Ha Marta he’i chupe: — Arovia che Jára. Che arovia ndeha pe Mesías, Ñandejára Ra’y, pe ou va’erãva ko yvy ári.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Oime niko ñande rapicha ñañandúva jahayhu ha ñande rayhúva avei. Jaikéva hógape ñande rógape guáicha. Javy’áva oñondive, jaguapýva jaterere, ñañemongeta kyre’ỹ ha jajoecharamo. Ñañohenói ha jajoechaga’úva ndajajoechavéirõ. Nameméi ko upeichagua jajuhu. Ndareíri niko he’i Ñandejára ñe’ẽme: “Pe ojuhúva peteĩ angirũ ikatúvare ojerovia, upéva ojuhu pláta yvyguy” (Eclesiástico 6,14).

Ko árape, oguahẽ mbotávo angirũkuéra ára, jaguerohory hína Santa Mártape, María ha Lázaro, Ha’e kuéra niko oikómiva Betániape, namombyrýi opytáva tupao Jerusaléngui. Ha upépe ha’ekuéra oguerohory ha omoguahẽ jepi Jesús pe hógape. Ha Jesús niko ojepokuaaiterei jepe ha ohayhu voi ichupekuéra, ovy’a hendivekuéra. Ha oikuaa rupi Jesús ha’ekuéra ohayhu ha ojeroviaha hese, oho jepi opyta okaru ha opytu’u upépe ijapóstolkuéra ndive.

Lázaro ningo la óga jára. Ha’e omoguahẽ Jesús pe hógape. Ha la heindy Marta katu Jesús ou vove ndoikuaái mba’épa ojapóta oguerohory haguã ichupe. Ou ha oho, omopotĩ ha ojapo tembi’u. María katu oimesénte Jesús ykére ohendu haguã ichupe. Oguapy voi hendive ha opyta omoirũ ichupe.

Oiméne ko omombe’u ichupe ohasáva ha oñandúva ha oporandu Jesús pe mba’épa ha’e oñandu. Tuichaite mba’e hína jareko mávare jajerovia ha jahayhúva.

Péva Ñandejára remime’ẽ. Umíva hína ñane angirũ. Jesús oreko avei raka’e umichagua. Ha’e ohayhúva ha ohayhúva ichupe. Lázaro ñanembo’e ñamoguahẽ haguã ñane angirũ Jesús pe ñande rógape. Marta katu ñanembo’e pe jerovia Jesús re, ñañeha’ã ha ñamba’apo haguã hendive. Ha María katu ñanembo’e pe mborayhu rupi ñahendu ha jajapysaka haguã Jesús rehe ñande py’aite guive.

Pa’i Alberto Luna.