Ñahendu Jesús Ñe’ẽ. San Juan Evangelista ára

Escucha el evangelio y la reflexión en: https://youtu.be/KME0gnB9Ebc

27 diciembre San Juan Evangelista ára

Juan 20, 1 – 8

Domigo pyharevete, pytũ ramo hína gueteri, María Magdaléna oho pe itakuápe Jesús oñeñotỹ haguépe. Ojuhu ojepe’a hague pe ita ombotýva pe itakua juru. Pya’e oho Simón Pedro ha ku disípulo Jesús ohayhuetéva rendápe, ha he’i chupekuéra:— Ojereraha niko Ñandejára retekue pe itakuágui, ha ndoroikuaái moõpa oñemoĩ.

Upépe, Pedro ha pe Jesús disípulo pya’e osẽ oho pe itakuápe. Odipara oho hikuái ojoykére, upéi katu pe ambue hatãve oho Pédrogui ha ha’e raẽve oguãhẽ. Ojayvy omaña pe itakuápe ha ohecha umi ao Jesús retekue ojelia va’ekuépe oĩmbaha upépe. Ha’e katu ndoikéi.

Hapykuéri katu oguãhẽ Simón Pedro, ha oike pe itakuápe. Ha’e ave ohecha umi ao.

Ohecha avei pe ao Jesús akã ojelia haguépe oñembyapu’a hague ha oñemoĩ hague ambue hendápe ha’eño. Upépe oike avei pe Jesús disípulo, pe oguãhẽ raẽve va’ekue. Ha ohechávo mba’épa ojehu, ha’e oguerovia Jesús oikove jey hague.

Ñandejára Jesukrísto ñe’ẽ.

ÑAMBOGUEJY ÑANDE REKOVÉPE…

Ko áño pahápe heta mba’e jahecha oñekuave’ẽva, heta propaganda oñemoherakuã ha heta mba’ére ñande jurujái. Ñama’ẽ asy, jarekosete, ñambojere ñane akãme, jaiko hapykuéri jahechápa ndajahupytýi. Ha upéicha ave upe máva jahayhúvare ñande jurujái. Jaiko hapykuéri, jaheka, jajapysaka ha ñama’ẽ asy.

Ko árape ñaromandu’a hina San Juan Evangelista, omombe’úva kuatiáre Hesu rekove, omoirũ va’ekue Hesúpe oñepyrũ guive imisión ha opyta va’ekue hendive opa ára. Juan niko ha’e va’ekue umi Hesu irũ apytépe upe ha’e ohayhuvéva.

Ojerovia ha ojepokuaágui hese oguapy ijykére pe última sénape ha ojeko ipyti’áre. Hesu omano rire katu Juan ityre’ỹ ichugui ha ohechaga’u opytávo.

Ñande ave niko che irũ ha che reindy ndajahechái Hesúpe, okañy vaicha ñande hegui sapy’a. Jahekáramo jepe, ñahendúramo jepe ñande rapicha oñe’ẽva Ñandejárare, nahesakãmbái ñandéve heta mba’e.

Magdalena hina avei Hesu irũ nguéra apytépe ohóva oheka Hesúpe. Ha’e rire katu Juan ha Pedro hatã odipara avei ohekávo ichupe. Juan hatãve oho. Upe mborayhu niko ñanembyetia’e, upe oporohayhúva hatãve oho. Pe oporohayhúva niko ojerovia ndohecháiramo jepe.

Juan oñandu ipy’ápe Hesu oikove jevyha, oñandu pe mborayhu ichugui oúva ndogueiha araka’eve. Mba’etekópa reime nde ave che reindy ha che irũ, edipara haguã eheka Hesúpe. Térãpa mbeguekatumínte eiko eheka.

Pa’i Jasy.