Ñahendu Jesús Ñe’ẽ. Sagrada Familia

Escucha el evangelio y la reflexión en: https://youtu.be/gqS8dvJtvAw

Sagrada Familia. Ciclo A Mateo 2, 13-15. 19-23.

Oho rire umi karai arandu, Ñandejára ángel peteĩ ojehechauka Josépe iképe, ha he’i chupe: — Epáy epu’ã. Pya’e eraháta pe mitã ha isy, ha pehóta Egíptope. Upépe epytáta che ha’e peve ndéve. Cháke Herodes ohekaukáta hína pe mitã ojuka haguã.

Opáy ha opu’ã José, ha pe pyharépe voi ogueraha pe mitã ha isy Egíptope. Ha opyta hikuái upépe Herodes omano meve. Péicha ojehu va’ekue oiko haguã hekoitépe ku Ñandejára he’i vaekue proféta rupi: “Egíptogui ahenói vaekue che ra’y.”

Herodes omano rire, Ñandejára ángel ojechauka jey Josépe iképe, Egíptope. Ha he’i chupe: — Epáy, epu’ã. Pehokuaa jeýma Israélpe. Omanombáma umi ojukase va’ekue pe mitã.

Opu’ã José ha ogueraha pe mitã ha isy Israélpe. José oikuaávo Arquelao, Herodes ra’y, ojupi hague itúva rendaguépe okyhyje oho haguã Judéape. Ñandejára katu he’i chupe iképe oho haguã Galiléape. Oguãhẽvo upépe, oho oiko hikuái Nazarétpe. Ha péicha ou ojehu ku
proféta he’i va’ekue, Jesús rehe oje’etaha Nasaréno.

Ñandejára Jesucristo ñe’ẽ.

ÑAMBOGUEJY ÑANDE REKOVÉPE…

Mba’épa ombojoaju añete pe familia. Jahecha ningo oime omenda porãitéva, omenda tupaopáva jepe, ha ne’ĩraramo guarã opoi jeýma ojuehegui. María ha José, ojoayhu porãgui oiméma kuri ombojoaju haguã hekove, háime ojopoi kuri, ha upépe ou pe Ñandejára angaisy, ha’éva hina pe jejokuái. Ñandejára ojokuái Maríape oiko haguã Jesús sy, upéi katu ojokuái Josépe ha he’i chupe omenda haguã Maríare ha oñangareko haguã hese ha imembýre. Ha péva pe misión Ñandejáragui oúva hína pe ombojoaju mbaretevéva chupekuéra ha ndohejáiva ojopoi, ojejokuáigui peteĩ teĩ oime haguã oñondive. Ñandejára aipóramo upe omosãva ha oñapytĩva chupe kuéra peteĩ
júgo guýpe, omboguata haguã tembiapo oñondive.

Umi sã mbarete oñapytĩva peteĩ óga ha peteĩ familia, omosãva ména ha tembireko hína tenonderã upe mborayhu ha upéi katu upe jerovia Ñandejárare. Ndaha’éi antóho, térã akãraku año rehe oñomboguatáva hína.

Pe júgo niko sapy’ánte ipohýi, ndofaltái la problema ha la argel. Ikatu avei ñande voi ñande tirón vai júgo guýpe oñondive ha ñañomboajúra rasy ñande guatápe.

Mba’etekópa che reindy ha nde che irũ la nde júgo hína. Ikatúko ipohýi vove jajetyvyro rangue ichugui ñanemandu’a Jesús he’ívare ñandéve: Eju cherendápe nde, ne kane’õ ha reiko asýva ha che rombopytu’úta, che júgo ndaipohýi mo’ãi ndéve ha pe nandepu’akáiva katu ambovevúita ndéve.

Pa’i Jasy.