Ñahendu Jesús Ñe’ẽ. Domingo 22º Durante el Año

Escucha el evangelio y la reflexión en: https://youtu.be/WdhRmrgZ4AM

Domingo 22º Durante el Año Ciclo B Marcos 7, 1-8, 14-15, 21-23

Upérõ oñemboja Jesús rendápe umi fariséo ha Moises léi ombo’éva. Ou hikuái Jerusaléngui Jesús rendápe. Ohecha hikuái oĩha Jesús disípulokuéra apytépe okarúva ojepohei’ỹre. Mayma hudíova niko ndokarúiva ojepohéi porã’ỹre.

Péicha oheja va’ekue chupekuéra ojapo haguã ijypykuéra. Oho ramo oñemu katu ndo’úi hikuái mba’eve ojogua va’ekue ojohéi mboyve. Ha umíva apytépe avei, ojohéi térã omopotĩ mante va’erã umi hembiporu oiporúva okaru haguã téra hoy’u haguã.

Upévare fariséo ha Moises léi ombo’éva oporandu Jesúspe: — Mba’éreiko nde disípulo kuéra ndojapói hekópe umi mba’e ñande ypykue oheja vaekue ñandéve. Okaru niko hikuái ojepohei’ỹre.

Jesús ojere he’i chupekuéra: — He’i porã vaekue voi proféta Isaías peẽichagua tova mokõire, ohai ramo guare: “Ko’ãva ijurúpente che momba’e, ipy’apýpe katu mombyry oĩ chehegui. Reíko che momba’e guasu hikuái, ha ombo’e ku che ahejárõ guáicha umi mba’e ha’ekuérante omoĩva ojejapo haguã.”

Peẽ niko pemboyke Ñandejára léi pejapo haguã umi mba’e peẽnte pejéva. Upéi Jesús ohenói opavavépe ha he’i chupe kuéra: — Pe che rendúke opavave, jahecha nahesakãipa peẽme ko ha’étava.

Mba’eve ja’úva niko na ñane mongy’ái. Umi mba’e ñane korasõgui osẽvante pe ñane mongy’áva. Ñane korasõgui niko osẽ opa mba’e vai, jejuka, ñemyakãratĩ, teko vai, monda, japu, ha ñe’ẽ rei ñande rapicháre. Opa ko’ã mba’e vai osẽ ñane korasõgui ha ñane mongy’a.

Ñandejára Hesukrísto ñe’ẽ.

ÑAMBOGUEJY ÑANDE REKOVÉPE…

Ñande nícho ha tupao niko ñamboyvoty, ñambojegua, ñamopotĩmba ha ñamyataindy. Ñañemonde porã avei jahávo mísa hápe, tuicha jajovasa y karaípe jaikévo, japurahéi ha ñañesũ. Ha umíva ñane pytyvõ ha iporãramo jepe, ñama’ẽ va’erã avei noiméipa jajepy’apy eterei ijapéguionte ñambovera ha ñamopotĩmba.

Mba’etekópa oime hína ñane korasõ ha ñande py’a Ñandejára ndive ha ñande rapicha kuéra ndive. Ani oiko ñande rehe upe he’íva proféta Isaia ha Hesu avei ñanemomandu’áva: “Ko’ãva niko ijurúpente che momba’e, ipy’apy katu mombyry oĩ che hegui”.

Sapy’ánte ikatu avei ñama’ẽ terei ñande rapicháre, ijape, ijao, ha upépe tuicha ikatu jajavy. He’i háicha Hesu: ‘Umi mba’e ñane korasõgui osẽva hína la ñane mongy’áva.’

ÑAÑEMBO’E OÑONDIVE

Ñandejára Jesukrísto, nde embojoajúva Tupã ha tapicha rayhu, orepytyvõmíkena romoañete haguã ore ñembo’e ha ore jerovia, romoirũvo ore rapichakuérape mborayhu pópe ore py’aite guive, nde rejapo haguéicha. Amén.