Ñahendu Jesús Ñe’ẽ. Domingo 23º Durante el Año

Escucha el evangelio y la reflexión en: https://youtu.be/kZ7vEgepwfs?si=ikKr8yq1uqrhSDrh

Domingo 23º Durante el Año Ciclo B

Marcos 7, 31 – 37

Upérõ Jesús osẽ jey oho Tírogui. Ha ohasa Sidón rupi ha oguãhẽ Lágo Galiléape, Decápolis ypy rupi. Upépe, ojereraha hendápe peteĩ ohendu’ỹva ha iseseósova. Ojerure hikuái Jesúspe omoĩ haguã ipo hese okuera haguã. Jesús ogueraha chupe ha’eñoháme, omoinge ikuã ijapysápe ha omona hendy ikũre. Upéi ohupi hesa yvágare, hi’ãho ha he’i, “Efatá” he’iséva, “Ejepe’a.”

He’ipamívonte, pe ohendu’ỹva apysa ojepe’a ha ikũ jera, ha oñe’ẽ porã. Jesús he’i opavavépe ani haguã omombe’u. Ha he’i-he’ivérõ jepe chupe kuéra, ko’ýte omombe’u hikuái. Oponderapa joa hikuái ha he’i, “Opa mba’e ojapóva niko ojapo porã.

Ohendu’ỹvape omohendu ha iñe’ẽngúvape omoñe’ẽ.”

Ñandejára Hesukrísto ñe’ẽ.

ÑAMBOGUEJY ÑE’Ẽ ÑANDE REKOVÉPE

“Ndaikuaaséi”. He’i ningo nohenduséiva upe oikóva térã oje’éva ichupe. Ikatu voi omboty ijapysa péicha he’i vove. Oĩ katu umi ohendúramo jepe upe oikóva, nohendúiramo guáicha. oñembotavyete. Ijapysape gua’u. Ndoikuaaséi avei. Ha oime avei umi ohendu ha oikuaáva upe oikóva ha okirirĩeténte. Oñembotavy. Ndoikuaáiramo guáicha. Iñe’ẽngu vaicha. Oiméne okyhyje mba’e omombe’úramo osẽ vaitaha.

Ñahendu ojegueruha Hesu rendápe peteĩ ohendu’ỹ, ha iñe’ẽ pa’ãva. Ha Jesús oraha ichupe peteĩ ha’eño háme, upépe oñandu porã haguã ichupe ha oime haguã oñondive.

Oiméne niko mba’épa upe oñe’ẽ jokóva chupe ha oñapytĩ su’úva ipy’apy ani haguã ohendu. Hesu omoinge ikuã ijapysápe ha omona hendy ikũre. Ha’éte ku péicha oñemopeteĩvo hendive oipe’áva hi’árigui upe oñapytĩ ha ojopýva ichupe. Ha upépe ojepe’a ijapysa ha ohendu porã. Ojera ikũ ha oñe’ẽ porã, naikũsãvéi.

Mba’épa oiméne che reindy ha nde che irũ umi oikóva nde jerére ha ojekuaa porãramo jepe avave ndoikuaaséi ha nohenduséiva. Oñembotavypa guasúnte lo mitã. Mba’épa oiméne nde py’ápe oñeñomi asýva ha ndaikatúiva emombe’u. Mba’épa oiméne umíva omo’ã ha oñomi.

Hesu ou oipe’ávo ñande apysa ñahendu haguã umi añeteguáva. Ani avave ñanembotavy, ani haguã ñande avei ñañembotavy. Hesu ou ojora ñane kũ ñamombe’u haguã upe añeteguáva ha upe ñañandúva ñande py’ápe, jakyhyje’ỹre avavégui.

ÑAÑEMBO’E OÑONDIVE

Ñandejára Hesukrísto rejúva eipe’a ore apysa ha ejora ore kũ, anivéma haguã avave orembotavy ha oremokirirĩ. Emongakuaa ore pype py’a guasu romombe’u haguã opavavépe kyhyje’ỹre ne ñe’ẽ añeteguáva. Amén.

Pa’i Jasy.