Ñahendu Jesús. Sábado 7º Pascua
11 mayo, 2024Ñahendu Jesús Ñe’ẽ. Lunes 7º de Pascua
12 mayo, 2024
Escucha el evangelio y la reflexión en: https://youtu.be/x-JASSbX8Wg
Domingo 7º Páskua: Ascensión ára
Marcos 16, 15 – 20
Upérõ Jesús ojechauka umi 11 apóstolkuérape, ha he’i chupekuéra: Tapeho opa rupi ko yvy apére ha pehenduka opavavépe ko marandu porã. Umi ogueroviáva ha oñemongaraíva ojesalváta.
Umi oguerovia’ỹva katu oñehundíta. Umi che rehe ojeroviáva heta milágro ojapóne. Che rérape omosẽne hikuái demóño ha oñe’ẽne ñe’ẽ oñeñe’ẽ’ỹvape ha ipyahúva chupekuéra. Ipópe ojagarráne mbói térã ho’u ramo venéno ndojehúi chéne chupekuéra mba’eve. Omoĩne ipo hasývare ha umíva okueráne.
Jesús oñe’ẽmba rire idisípulokuéra ndive, Tupã ohupi chupe yvágape. Upépe oguapy ha’e Tupã ykére. Idisípulokuéra katu osẽ omombe’u pe ohasa va’ekue oparupiete. Ha Ñandejára oipytyvõ mante chupekuéra. Umi milágro ojapóva rupi ojehecha añeteha umi mba’e ha’ekuéra he’íva.
Ñandejára Jesucristo Ñe’ẽ.
ÑAMBOGUEJY ÑANDE REKOVÉPE
“Ahakuetévo askrivíta”. He’i ningo peteĩ purahéi ñahendúva upérupi. Ha péicha avei Hesu ojapopaite rire hembiapo ko yvy apére, ome’ẽmbaite rire orekomíva guive ñandéve, ohokuetévo yvágape itúva rendápe, oheja iñe’ẽ paha iñirũ nguérape. Tuicha mba’e niko hína pe ñe’ẽ paha ojehejáva ñandéve.
Ha pe Hesu ohokuetévo onkargáva idisípulokuérape, ha ñandéve avei che irũ ha che reindy, ha’e hína oparupiete ha opavavetépe ñamombe’u haguã ikáso kue, jaikuaauka iñe’ẽ, ñahenduka mba’épa Hesu ojapo raka’e hekovépe, mba’e he’i, mba’éicha oiko kuri umi hénte apytépe, ivállepe, ha mba’e.
Upéva tekotevẽ opavave oikuaa. Ha avei iporã ñamombe’u ha jaikuaauka umi Hesu irũnguéra rembiapokue. Apóstolkuéra ohai ha ojapo va’ekue, Tupãsy, sánto ha sántakuéra oiko va’ekue Hesu rapére rembiapo kue ha iñe’ẽngue avei.
Jesús niko oñeha’ã va’ekue ontendeka pe Ñandejára ñe’ẽ umi hénte ijave guápe. Káso rupive,
ñe’ẽ mbojoja rupive, ñembo’e rupive, ñepohãno rupive, opredika ha ombo’e umi héntekuérape ha opáicha oha’ã jahechápa noguahẽi ikorasõme pe Ñandejára grásia.
Upéicha avei ko’ãga, ñande japytáva ñande Iglésiape Jesús rekovia ko yvy apére, ñañeha’ã va’erã avei jaheka mba’éichapa ontendéta ñande rapichakuéra ko’ãga gua pe Jesús yma ñanembo’e va’ekue. Mba’éichapa ikatu ñamboguejy ko’ãga gua rekovépe umi Jesús oheja va’ekue ñandéve.
ÑAÑEMBO’E OÑONDIVE
Ñandejára Hesukrísto rehokuetévo ehejáva ore rembiaporã romombe’u opavavépe ne ñe’ẽ ha nerembiapokue, embou oréve nde Espíritu Santo arandu, ta ore mbo’e mba’éichapa roñe’ẽta, roñembo’éta ha romoirũta ore rapichakuérape nde kuaa porãve ha nde rayhu haguã. Amén.
Pa’i Alberto Luna.