Ñahendu Jesús Ñe’ẽ. Domingo de Ramos

Escucha el evangelio y la reflexión en: https://youtu.be/5KulUDPXOaE

Domingo de Ramos Ciclo B. Pindo karai ára.

Marcos 11, 1 – 10

Jesús ha idisípulokuéra oguãhẽ Monte de los Olívospe, opytáva Betfagé ha Betánia ypy rupi, Jerusalén rembe’ýpema. Upégui Jesús omondo mokõi idisípulope henonderã.

He’i chupekuéra:— Tapeho amo, umi ógakuéra opu’aháme hína. Ágã peguãhẽvo, pejuhúta peteĩ vúrro oñeñapytĩva, ne’ĩrava gueteri avave ojupi hi’ári. Pejora ha peru. Ha oĩ ramo oporandúva peẽme mba’épa pejapo, peje chupe, “Ñandejára ko oikotevẽ hese, ha pya’e ogueruka jeýta”.

Ha oho hikuái. Ha ojuhu pe vúrro oñeñapytĩva hína peteĩ okẽ ypýpe, óga rokápe. Ha ojora hikuái. Péva ohechávo umi upe rupi oĩva hína, osẽ oporandu chupekuéra:— Mba’éiko pejapo. Maerãiko pejora.

Umi disípulo mokõi he’i upe Jesús he’i va’ekue chupe kuéra he’i haguã. Ha oheja chupekuéra oho. Ogueraha hikuái pe vúrro Jesús rendápe. Ha omoĩ rire hikuái ijao mimi pe vúrro apére, Jesús ojupi hi’ári.

Heta ave oĩ oipysóva ijahoja haperãme. Oĩ katu oikytĩva yvyra rakã hamba’e, ha omyasãiva hapépe. Umi henonderã ha hapykuépe ohóva katu oñemoĩ osapukái: — Hosána. Tojehovasa ko Ñandejára rérape oúva.

Ñandejára tohovasa ñande ypykue David rréino. Ñandejára toñemomba’e guasu.
Jesús oikévo Jerusalénpe, oho tupaópe. Ha omañamba heta porã rire opa mba’ére ha
ka’arúguima, osẽ oho Betániape umi 12 idisípulo ndive.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Mba’etekópa ejupi vúrro ári ha eho eguata héntekuéra apytépe. Ojepukapáne ñande rehe. La ichúkova niko kavaju ári ojupi, hineteáda ojapo. Móto porã térã áuto mba’e katu ko’ãga la oikóva. Ha mba’épa oiméne raka’e Hesu akãme ojerurévo idisípulokuérape peteĩ vurríto, oike haguã Herusalénpe.

Jaikuaa ningo ikontráriokuéra ojerepaitemaha hese ojuka haguãicha voi. Tuicha jehasa asýpe oikéta hína Herusalénpe.Ha’e katu oike Ñandejára rérape. Py’a porã ha mborayhu reheve ohenonde’a umi oúva ohundi haguãicha ichupe.

Pe mboriahu niko ikangy, ndaikatúi voi omuña ha oguerosapukái avavépe mbarete ha ñorairõme. Ha Hesu oguahẽvo mboriahúicha, oiméne ohechauka ñandéve chirũ ha che reindy ñande avei ñane kangýramo jepe, ñambohovái va’erãha Ñandejára rérape umi kontrário vai mba’asýicha oúva ñandéve ñande reity haguã.

Ñembo’e, jerovia, py’a porã ha mborayhu rupive mante ikatúta ñande pu’aka Aña rymba rehe.

ÑAÑEMBO’E OÑONDIVE

Ñandejára Hesukrísto, nde reñemopeteĩ vaekue umi imboriahu ha ikangyvéva ndive.
Ejumi jeýna, ymave guaréicha, eike ore apytépe, ore róga ha ore vállepe. Eipe’a ore apytégui opaichagua mba’asy, ñorairõ ha pochy, ha ehechauka oréve mborayhu ha ñepytyvõ rape. Amén.

Pa’i Alberto Luna.