Ñahendu Hesu Ñe’ê. Sábado después de Ceniza
17 febrero, 2024Ñahendu Hesu Ñe’ê. Lunes I de Cuaresma
18 febrero, 2024Escucha el evangelio y la reflexión en: https://youtu.be/ecWTenOeBmI?si=I5kXb85Z37yD8Ath
Domingo 1 Cuaresma Ciclo B Marcos 1, 12 – 15
Upérõ Espíritu Santo ogueraha Jesúspe desiértope. Upépe opyta oiko 40 ára, tymba saite apytépe. Ha upépe ou chupe Sataná, oipy’ara’ã haguã Jesús pe. Ha Ñandejára ángelkuéra ou oservi chupe.
Juan ojeapresa rire, Jesús oho Galiléape omyerakuã haguã Tupã marandu porã. He’i: “Oguahẽma upe ára oje’e va’ekue, ha Ñandejára Rréino hi’aguĩma. Pejevy Tupã gotyo ha perovia pe marandu porã.”
Ñandejára Jesucristo ñe’ẽ
ÑAMBOGUEJY ÑANDE REKOVÉPE
Heta mba’e jahecháva ha jahasáva ko yvy ape ári niko itiémpo ñande rekovépe. Ha ohasa jepe ramo ñanedehegui jajavýma ha hasýpe jahupyty jey. Upéicha lo mitã he’i: “kóa hi’ajúma”. Oguahẽma itiempo. Ha jahejáramo ohasa ipelígro oñembyai térã ituju ñande hegui. Avei oje’e: “ojýma kóa”. Péa he’ise hína oimemaha.
Ndajahechakuaái ha jahejavéramo tatápe ñane rembi’u, okáita hína ñande hegui ha japytáta mesa guype.
Omombe’u ñandéve San Márko Hesu oho hague desiértope oñembo’e. Ha upépe ndaje raka’e Satana ou hi’ári umi vícho hesaite ha iñarõva apytépe.
Upéicha niko ohechauka ñandéve hína mba’eichaitépa pe Aña hova atã, itie’ỹ ha noponderái Ñandejárare jepe. Ha Hesu oikévo pe javorái kua ñande ñaime hápe, oñandu mba’éichapa ñane kutu asy ñandéve umi Aña rymba kuéra ojeréva ñande rehe ratĩ.
Ha upégui Hesu osẽvo ojetyvyro pe Añágui ha he’i opavavépe: Ovaléma, ovaléma Satana orreina ha omanda. Ko’ãga guive oñepyrũma Ñandejára tiémpo. Ha upéicha Hesu he’i avei ñandéve ko’ãga oguahẽmaha pe tiémpo Ñandejára orreina haguã ñande rekovépe.
Ovaléma Aña ruvicha omanda ñande rehe ha ñande reko ipoguýpe. Itiémpoma jajevývo Ñandejára gotyo ha ñaneñe’ẽ rendúvo ichupe.
Ñandejára niko pe omarkáva ñandéve itiémpo. Ndaha’éi hína ñande jaipota vove, ndaha’éi hína ñande ñamarkáva ichupe. Ñande ñahendu ha jasegui va’erã ichupe uvei.
Ñañatende porãkena che irũ ha nde che reindy ko kuarésma aja. Aníkena ohasa rei nde hegui ko tiémpo Ñandejára omarkáva, ha upéi ndereikuaáiva ojere jeýnepa ndéve guarã. Ani ágã ejavy kóva ha epyta rei.
ÑAÑEMBO’E OÑONDIVE
Ñandejára Hesukrísto reikuaáva mba’éichapa pe Aña ore reko asy, aníkena ehasa rei ore ykére ejúvo ore renói. Hatã kena embota ore rokẽ ha oremombáy, ropu’ã ha roipe’a haguã ndéve ore rekove rokẽ ha ore korasõ, eisãmbyhy haguã ore rekove. Amén.
Pa’i Alberto Luna.