Ñahendu Hesu. Miércoles I de Cuaresma

Escucha el evangelio y la reflexión en: https://youtu.be/e-CMoei9QRM

Miércoles 1 Cuaresma

Lucas 11, 29 – 32

Heta hetave upérõ umi oñembojáva ojapysaka haguã Jesús rehe. Ha osẽ ha’e he’i chupekuéra: Peẽ tekove ahẽ ko’agãgua ndaje pejerure chéve aipo milágro.

Ndapehecha mo’ãi pehechaséva. Ñandejára ohechaukáta peẽme proféta Jonás rehe ojapo va’ekue. Ha ku Ñandejára omondo haguéicha Jonáspe ohesape’a haguã Níniveguápe, upéicha avei che, tesape’a hína peẽme guarã.

Ágã ára pahápe, peimévo Ñandejára renondépe, ku Rréina Sebápegua, opu’ãne ave ágã ha pene moĩ vai Ñandejára renondépe. Ha’e niko mombyry-mombyryvégui oho vaekue rréi Salomón rendápe ohendu haguã iñarandukue.

Ha che ha’e peẽme, peteĩ tuichaitevéva Salomóngui oĩ hína ko pene renondépe ko’ágã. Ágã ára pahápe, umi Ninivegua avei opu’ãne ha pene moĩ vaíne peẽme. Ha’ekuéra niko ojere va’ekue Ñandejára gotyo Jonás oñemoñe’ẽ ramo chupekuéra. Ha ko’ápe oĩ hína peteĩ tuichaitevéva Jonásgui.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Heta niko oñemboja Ñandejárare, oho tupaópe oikotevẽ javénte, ojapo promesa, oheka imba’erãva. Ndaha’ei ku oguataséva Hesu rapére mba’e, omohendaséva hekove Ñandejára oipota háicha. Ahániri. Oñemboja oipotágui Ñandejára ome’ẽ chupe ojeruréva. Oipotágui omohenda chupe ha’e ndaikatúiva.

Oñepohanoségui hetépe, ndorekóigui omba’apo haguã, ojejopy vaíguinte. Ágã osẽvo pévagui mbyky oho jey haguã oiko jepi guáicha, heko ha iguata tujápe, imandu’a’ỹre oimépa aipo Ñandejára.

Péva oñandu Hesu heta umi oñembojáva hendápe orekoha ipy’ápe. Oipota ha’e ojapo milágro oipe’a haguã ipohýiva iñakã ári kuéragui ha ombovevúi hembiasa, oheja haguã upéi Hesúpe oguerova’ỹre ijepokuaaha aña ha ilája vai.

Hesu katu he’i oheka vaerãha chupe ijehegui. Ndaha’éi ventáha rapykuérinte. Oheka vaerã chupe ohenduségui iñe’ẽ, oikuaaségui chupe, oguataségui hendive. Ojapo haguéicha pe kuñakarai guasu yma ou va’ekue mombyryetégui ohendu haguã rréi Salomónpe.

Hesu he’i avei ñahendúvo chupe ha ñañembojávo hese ojepe’aha ñandéve tape ñambopyahu haguã ñande rekove. Jahechakuaa ha ñambyasy haguã ñane rembiapo vaikue, ñamyatyrõ oñembyaíva ñande pype. Ojapo haguéicha umi Ninivegua ohóramo guare Jonás oñemoñe’ẽ chupekuéra.

Ha upéicha che irü ha che reindy. Iporã aipo ramo ko kuarésma pe jahávo jajerure umi Hesu ñe’ẽ oguapyve haguã ohóvo ñande py’a ha ñande rekovére. Ani ñahendu ichupe ype apére ýicha.

Pa’i Alberto Luna.