Ñahendu Jesús Ñe’ẽ. Domingo 2º de Cuaresma

Escucha el evangelio y la reflexión en: https://youtu.be/2UxsCvZIPH4

Domingo 2º Cuaresma

Ciclo B Marcos 9, 2 – 10

Upéramo Jesús oho ojupi peteĩ sérro ru’ãme, ha ogueraha hendive Pedro, Santiágo ha Juan.

Upépe henondépekuéra, Jesús rete oñemoambue ohóvo. Ijao overa hendy ha morotĩ sakã. Yvy ári ndaipóri mba’eve peichaite morotĩva.

Upéi katu, ohecháma hikuái Elías ha Moiséspe, oñemongetáva hína Jesús ndive.

Ha osẽ he’i Pedro, Jesúspe: — Mbo’ehára, ajépa iporãite ñaimembáre ko’ápe. Reipotárõ, na torojapo peẽme ráncho’imimi pene rendaguã.

Peteĩ ne mba’erã, peteĩ Moiséspe guarã ha Elíaspe guarã avei.

Oñemondyipa niko hikuái, ha Pedro katu ndoikuaái mba’épa he’íta. Upe jave ou peteĩ arai ha ojaho’i chupekuéra. Ha pe araígui katu oñehendu peteĩ he’íva, “Kóva niko che Ra’y ahayhúva. Pehendu chupe.”

Ha oma’ẽ jeývo hikuái ijerére ohecha ndaipóri veimaha avave hendivekuéra. Jesús añoite.

Oguejykuévo hikuái pe sérrogui, Jesús he’i chupekuéra ani haguã omombe’u avavépe upe ohecha vaekue, ha’e oikove jey peve omanóva apytégui. Ha oñongatu hikuái ko’ã mba’e ipy’apýpe. Upe “jeikove jey” katu ndoikuaái hikuái mba’épa he’ise.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

“Yvágare che pojái, yvýre ajepokyty”. He’i ningo purahéi. Ha upéicha ha’ete ku oñeñandúva Peru, Santiago ha Juan, Hesu oraháramo guare ichupekuéra sérro ru’ãme oñembo’e haguã.

Ymave Moisés ha Elías ojupi haguéicha sérro yvatépe oñembo’e ha ohendu haguã Tupãme, upéicha avei ojapo Hesu iñirũ nguéra ndive.

Ha ñande niko ñahenoiséramo Tupã, Ñandejára Hesukrísto, térã santokuérape, ñañembo’eséramo, jaha tupaópe, misa hápe, jaha Tupãsy Caacupe rendápe, nicho renondépe ñamyataindy, ñañesũ ñañepomoĩ ha ja’e umi ñembo’e jaikuaáva.

Umi rupi ha’ete vaicha ñandéve oĩha voi Tupã ñanera’arõ ha ñanerendu haguãicha. Ha pe yvága ojepe’a haguéicha Pedro, Santiago ha Juan pe, ohechávo Hesu omimbipa henondépekuéra, ha ohendu Tupã oñe’ẽvo ichupe kuéra yvága guive.

Upéicha avei, che reindy ha nde che irũ, ñande Ru yvágape oĩva oñeñanduka ha oñe’ẽ avei ñandéve ñane ñembo’épe. Ñanembovy’a ha ñanembo py’aguapy. Ome’ẽ ñandéve piro’y ha ñanekonsola, ikatu haguãicha jaropu’aka ha ñambohasa, ãga ou vove jehasa asy.

ÑAÑEMBO’E OÑONDIVE

Ñandejára Hesukrísto, nde niko eñemosaingo mboyve kurusúre eraha va’ekue nendive nde apóstolkuérape ha ejechauka ichupe kuéra mimbipápe emombarete haguã ijerovia.

Eñandukamína oréve avei nde reimeha ore ykére tuicha pu’aka reheve, ani haguã ore kangy, ani haguã ore reity mba’eveichagua jehasa asy.

Pa’i Alberto Luna.