Ñahendu Hesu. Domingo Semana 27ª TO

Escucha el evangelio y la reflexión en: https://youtu.be/_-icSnibyAU

Domingo 27ª TO Ciclo A                                                    Mateo 23, 33 – 43                

                Upérô Jesús he’i umi pa’i ruvichakuéra ha Israel myakãhárakuérape: Peteĩ karai ndaje oñotỹ raka’e peteĩ parralty ikokuépe. Omongorapy ha ojapo peteĩ piléta víno ojejapo haguãme. Omopu’ã ave peteĩ sovrádo upégui oĩ haguã omañáva ha oñangarekóva ikokuére.

Upéi katu, oarkila ha osẽ oho mombyry. Ha oguãhẽ upe parral ojepo’oha ára, víno ojejapo haguã. Upépe pe yvy jára omondo hembiguáikuérape ojerurévo upe chupe ohupytýva. Umi oarkila vaekue katu ojeity umi tembiguái ári. Peteĩme heta oinupã, pe ambuépe katu ojuka hikuái, ha pe mbohapyha ojapi itápe ojuka peve hikuái.

Upéi katu pe yvy jára omondo hetave hembiguáikuéra, ha oiko hesekuéra umi tenonde oho va’ekuéicha. Ipahápe omondo ta’ýra teépe, he’ígui ipy’apýpe: “Che ra’ýpeko ohendu va’erã hikuái”. Ohechávo hikuái pe yvy jára ra’ýpe katu, he’i hikuái: “Kóva yvy járata hína ágã túva omano vove. Jajuka ha topyta ñandéve ko yvy”. Ha ojeity hi’ári hikuái. Oguenohẽ pe kokuégui ha ojuka.”

                Upéi Jesús oporandu: — Ágã pe yvy jára ou vove, mba’épa peje ojapóne haguã.

Ha he’i hikuái chupe: — Ojukapaite vaerã niko umi tekove ahẽ. Upéi katu oarkiláne ijyvy ambuépe ome’ẽ vaerãva chupe pe imba’éva.

                Upépe Jesús he’i chupe kuéra: — Na pene mandu’ái aje Ñandejára Ñe’ẽme he’iha:  “Pe ita omboyke vaekue umi óga omopu’ãva péva ári ko’ágã oñemopu’ã tupao. Péicha ojapo Ñandejára, ha ñande jurujái jahechávo.”

                Upévare ha’e peẽme, Ñandejára Rréino ojepe’áta pende hegui ha oñeme’ẽta umi ojapóvape Ñandejára rembipota. Ha oimeraẽva oñepysãngáva ko itáre, opẽmbaiténe. Ha ho’a ramo pende ári katu, pene mongu’i paiténe.

                Umi pa’i ruvicha ha fariséokuéra ohendúvo pe káso Jesús omombe’úva, ohecha kuaa hikuái hesekuéra he’iha. Ha oapresase mo’ã hikuái Jesúspe. Noñanimáinte hikuái okyhyjégui opavavégui. Oje’e niko Jesús rehe ha’e profetaha.

Ñandejára Hesukrísto ñe’ẽ.

Heta mba’e jarekóva niko ñande ñahenói “Ñandejára grásia”. Ndaha’éigui ñande jajapo va’ekue, oñeme’ẽnte ñandéve. Ñande rekove, ñane ñe’ẽ, ko yvy, yvytu, ysyry, ñande rekoha, ñande válle. Ñandejára niko pe oñotỹva ko yvýpe opa mba’e ha upéi ome’ẽ ñandéve, oheja ñande pópe. Ha “oho mombyry”, he’i Hesu.

Nde’iséi hína ñande rejaha. Oipotánte ñande jehegui ha noĩri ñande ári, ojeroviágui ñande rehe. Oipota ñamba’apo oñondive, jareko ñaikotevẽva, ñamboja’o ñande rapicha ndive, ha ñame’ẽ avei Ñandejárape upe ha’e oha’arõva ñande hegui.

            Upevarã ombou ñane atõiva, ani ñande resarái ichugui. Ani haguã ñaimo’ã ñande ha’eha opa mba’e jára, ha tekotevẽha ñamoguahẽ ñande rógape, ñande rekovépe, Ñandejára remimboukuérape, ñahendu iñe’ẽ ha ñame’ẽ Ñandejárape, ñande Iglésiape, upe jarekóvagui. Ha’e ome’ẽ haguéicha ñandéve ñame’ẽ avei ñande ichupe. Ani ñande pojopy ha ñanerakate’ỹeterei.

ÑAÑEMBO’E OÑONDIVE

Ñandejára ore Ru, eme’ẽva oréve opa mba’e porã, ore rayhu ha ejeroviágui ore rehe. Ore pytyvõmíkena romba’apo kyre’ỹ haguãnde Iglésiape. Torome’ẽ ndéve upe eha’arõva ore hegui ha toromoguahẽ vy’apópe umi nde rérape oúva ore moirũ haguã.

Pa’i Jasy.