Ñahendu Jesús Ñe’ẽ. Familia Marangatu ára

Escucha el evangelio y la reflexión en: https://youtu.be/UnXBdjkQqbg

DOMINGO Familia Marangatu ára. Lucas 2, 41 – 52

José ha María ohómiva áño jerére Jerusalénpe Páskua areterã. Jesús ombotývo 12 áño, oho avei túva ha isy ndive Jerusalénpe. Pe arete ohasapa rire, ojevy hikuái hogaperãicha. Ha José ha María ohecha kuaa’ỹre, Jesús opyta ra’e Jerusalénpe. Oimo’ã hikuái Jesús ouha hína hapicha kuéra apytépe. Ha ka’arúmavo, oñepyrũ oheka chupe ihéntekuéra ha ikuaaha kuéra apytépe, ha ndojuhúi. Upémarõ ojevy hikuái Jerusalénpe hekávo.

Mbohapy ára rire ojuhu chupe Tupaópe oguapy hína umi Moisés léi ombo’éva apytépe. Ojapysaka hesekuéra ha omba’e porandu hína chupekuéra. Ha opa umi ojapysakáva, ohecha ramoite. Ijurujái opytávo hikuái ohechávo mba’éichapa iñarandu, ha hekoitépe he’iha opa mba’e. Túva kuéra ohechávo chupe, ipy’andýi.

María he’i chupe: — Che memby, mba’éreiko péicha rejapo ore rehe. Nde ru ndive niko opa rupi roheka roikóvo, ha heta rojepya’apy nde rehe.

Jesús katu he’i chupe: — Maerãiko che reka. Ndapeikuaái nga’u piko aime va’erãha che Ru rógape.

Túvakuéra katu ndoikuaái pe he’íva. Jesús oho hendive kuéra Nazarétpe. Ha opa mba’épe iñe’ẽ rendúva túva ha isýpe. Isy María katu oñongatupánte ko’ã mba’e ipy’apýpe. Jesús okakuaa aja ohóvo, iñaranduve ave ohóvo. Ñandejára ohovasa ha opavave oguerohory ichupe.

Ñandejára Jesukrísto ñe’ẽ.

ÑAMBOGUEJY ÑANDE REKOVÉPE…

Pe ñande sy ha ñande ru niko peteĩ sã imbarete ha ipoguasúva ñanemosãva ijehekuéra hína amoite ñande rekove ypy mataite guive. Tuicha mba’éko hina pe ñanereñói ha jakakuaa hague, ñañeñandu hague ha oiko hague ñande hegui ko ñande ha’éva koãgaite peve. Pe familia ningo Ñandejára apopyre, kuña ha kuimba’e, ñande sy ha ñande ru, mborayhu rupive ombojoajúva hekove, ha ñanemoheñóiva ipa’ũme.

Hesu imita guive iñe’ẽrendu vaekue túva ha isýpe, ha opa ára ombojeréva hóga ha igéntekuéra. Péina katu ko’ápe imita rusumavo opo’o sapy’a ha oñanduka ha’e orekoha avei imisión Ñandejára renondépe, ha tekotevẽha oguahẽvove itiémpo ojei ichuguikuéra ha oveve.

Jahecha Tupãsy ha San José ipy’a tarova imemby okañy va’ekue rapykuéri otopa peve. Mboy sy ha túva oĩ hina ko’ãga iñangekói ha ndoikuáaiva mba’épa ojapóta oisãmbyhy haguã ifamília. Ha upéva niko che reindy ha nde che irũ peteĩ mba’e tekotevẽva jajerure ha ñañeha’ã.

Ñamoirũ ha jaiko haguã mitãkuimba’e ha mitãkuña rusu kuéra rehe, ñañapytĩ su’u’ÿre ñande jehe. Jahayhu ha ñañangareko va’erã ramo jepe ñande ndaha’ei amo ipahápe ijára. Ha peteĩ teĩvape Ñandejára ome’ẽha imisión omboguata va’erãva ijehegui.

Pa’i Jasy.