Ñahendu Hesu. Jesús, María ha Jesús, familia marangatu

Escucha el evangelio y la reflexión en: https://youtu.be/RF8eQksJ2oo

28 diciembre: Inocentekuéra ára

Mateo 2, 13 – 18

Oho rire umi karai arandu, Ñandejára ángel peteĩ ojehechauka Josépe iképe, ha he’i chupe:

— Epáy epu’ã. Pya’e eraháta pe mitã ha isy, ha pehóta Egíptope. Upépe epytáta che
ha’e peve ndéve. Cháke Herodes ohekaukáta hína pe mitã ojuka haguã.

Opáy ha opu’ã José, ha pe pyharépe voi ogueraha pe mitã ha isy Egíptope. Ha opyta
hikuái upépe Herodes omano meve. Péicha ojehu vaekue oiko haguã hekoitépe ku
Ñandejára he’i vaekue proféta rupi: “Egíptogui ahenói vaekue che ra’y.”

Herodes ohecha kuaávo umi karai arandu ombotavy hague chupe, tuicha ipochy.
Upémarõ, ojukauka paite mitã kuimba’e mimi oĩ haguéicha 2 áño ombotýva peve, Belénpe
ha pe ijerére.

Péicha oiko, ojehu haguã ku proféta Jeremías oheja va’ekue kuatiápe: Oñehendu Rramáme tasẽ ha jahe’o soro.

Raquel ojahe’óva imembykuérare, omanomba haguére chugui ha ndoipotái avave okonsola ichupe.

Ñandejára Hesukrísto ñe’ẽ.

ÑAMBOGUEJY ÑANDE REKOVÉPE…

Jaikuaa heta ñande rapicha ohoha mombyry, omba’apo oipytyvõ haguã ifamíliape.
Oime niko ohóva ndojuhúigui ivállepe hembiaporã ha oime avei ohóva ojeheka ombyaty
haguã pira pire oiko porãsevégui.

Ñambyasy jahecháramo mitã nguéra ityre’ỹ, opyta ha’eño, ména térã tembireko ohejáva hóga ha oho ambue tetãme. Mombyry ojuehegui oime ramo niko ijetu’u oiko haguã py’a peteĩme, ha tíro pukúpe katu mbyky voi ojei mba’e haguã ojuehegui.

Jahecha San José ha Tupãsy osẽ Beléngui ani haguã Herode ojuka pe mitã ou ramóva. Osẽ oho mombyry, ambue tetãme ha upépe opyta okañy, omano meve pe mburuvicha pochy. Ñane retãme avei ymave mburuvicha Stroessner oĩ jave oñemboharái tortúrape ha ojukauka va’ekue heta tapicha oñemoĩva guive henondépe. Hetápe katu omosẽ ha omuña, ha umíva oho vaekue oiko ambue tetãme.

Ha upéicha che reindy ha nde che irũ, iporã ko’ã mba’e jareko ñande resa renondépe jahechakuaa haguã umi ñande rapicha osẽva ivállegui ohekávo jeiko porãve, imboriahúgui
terã oñemuñágui hendape’ỹ. Taha’e ñane retãgua térã katu ambue tetãgua, ojejopy, oiko
asy, ha ityre’ỹva.

Ñamoirũ ha ñaipytyvõ ichupe kuéra jajapo ramo guáicha Tupãsy, San José ha Hesúpe, imitãmi guive péicha avei ohasáva.

Pa’i Jasy.