Ñahendu Hesu. Lunes 10ª Tiempo Durante el Año

Escucha el evangelio y la reflexión en: https://youtu.be/f2G4e53bw4c

Lunes 10ª TDA

Mateo 5, 1 – 12

Jesús ohechávo hetaha umi ijatýva, ojupi peteĩ sérro akãme ha oguapy oñe’ẽ hag̃ua.
Idisípulokuéra oñembyaty ijerére, ha Jesús oñepyrũ ombo’e chupekuéra.

“Ovy’a vaerã umi ipy’aite guive ohecha kuaáva imboriahuha, chupekuéra g̃uarã niko hína Ñandejára Rréino. Ovy’a vaerã umi ohasa asýva, Ñandejára voi omyangapyhýta chupekuéra.

Ovy’a va’erã umi heko mirĩva, Ñandejára ome’ẽta chupe kuéra yvy imba’e teerã.
Ovy’a va’erã umi Ñandejára rembipotánte ojaposéva, ha’e voi ome’ẽta chupekuéra opa oikotevẽva.
Ovy’a va’erã umi oiporiahuverekóva hapichápe, Ñandejára oiporiahuverekóta chupekuéra.
Ovy’a va’erã umi ipy’a potĩva, ha’e kuéra ohechátagui Ñandejárape.
Ovy’a va’erã umi oñeha’ãva oporomoingo py’aguapýpe, Ñandejára oguerekóta chupekuéra ita’ýra ha itajýra ramo.

Ovy’a va’erã umi ohasa asýva Ñandejára rembipota ojapógui, chupekuéra g̃uarã niko hína Ñandejára Rréino yvagapegua.

Pevy’a va’erã pejeja’o ha peñemuña ramo, ha oje’e ramo pende rehe opa mba’e vai, che ndive peiko haguére. Pevy’áke ha tapende py’a rory, tuicha mba’e niko oñeme’ẽta peẽme yvágape. Peẽicha avei, profétakuéra ohasa asy va’ekue yma.”

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Ovy’a va’erã umi karai guasu ha kuñakarai guasu oñembojeroviáva, oñemoñe’ẽmbáva discúrsope, rrádiope, osẽva diario ha télepe. Umi oiko porãva, karu guasu ha vy’a saingópe, ndojejopýiva ha ndohasa asýiva.

Umíva ojerovia ijehe, orovia voi mba’e guasuha, oñemoĩ hapicha ári, oapo’i ha ndoiporiahuverekói. Umíva oimo’ã tuichágui noikotevẽiha Tupãre. Ha oimo’ã noikotevẽiha hapicháre ave.

Hesu he’i ovy’a va’erãha umi ipy’aite guive ohechakuaáva imboriahuha, ikangyha, oikotevẽha Ñandejárare ha hapicháre, ndaikatuiha ijehegui ha’eño oguata.

Ovy’a va’erã umi ndojejapóiva, oiporiahuverekóva hapicha kangy ha ohasa asývape, ha’e oikuaágui mba’épa péva he’ise. Ovy’a va’erã umi oñeha’ãva omoingo porã hapichápe, ipy’a potĩva. Ovy’a vaerã ohasa asy kuaáva Ñandejára rayhupápe. Umívape, he’i Hesu, Ñandejára tuicha omyengoviáta ha omoguahẽta yvága ru’ãme.

Reikuaápa che reindy ha nde che irũ nde rapicha peichagua, oiko ha omboguatáva hekovépe Hesu he’íva. Reñandúpa hesekuéra añetehápe pe vy’a ha py’aguapy Ñandejáragui oúva.

Pa’i Alberto Luna.