Ñahendu Jesús Ñe’ẽ. Martes 33º Durante el Año

Escucha el evangelio y la reflexión en: https://youtu.be/6mXAechZj10

Martes 33º Durante el Año

Lucas 19, 1 – 10

Upérõ Jesús og̃uahẽ Jericópe, ha ohasa ohóvo pe puéblo rupi. Upépe oiko peteĩ kuimba’e irríkova hérava Zaqueo. Ha’e niko hína umi impuésto okovráva ruvicha.

Zaqueo niko ohechase Jesúspe. Ha ndaikatúi ohecha chupe, hetágui umi hénte Jesús jerére oĩva, ha upéi ave, Zaqueo ikarape voi. Odipara upémarõ Jesús renonderã ha oho ojupi peteĩ yvyra mátare.

Upégui ohecháta hína Jesúspe ohasávo upe rupi. Ha ohasávo ohóvo Jesús, omaña yvatévo ha he’i Zaquéope: — Zaqueo, nde pya’e eguejy upégui. Nde rógape apytase hína.

Pya’ete oguejy Zaqueo, ha torypápe omog̃uahẽ Jesúspe hógape. Ha umi hénte ohechávo upéva, oñepyrũ oñe’ẽ Jesús rehe. He’i hikuái, “Mba’éicha piko aipo ohóta opyta peteĩ pekador rógape.”

Okarupa rire, Zaqueo opu’ã ha he’i Jesúspe: — Opa arekóva amboja’óta mbyte rupi ha ame’ẽta hénte mboriahúpe. Ha oime rire che rapichápe ambotavy ra’e, amyengoviáta chupe 4 vése hetave.

Jesús he’i chupe: — Ko árape nde ha opa nde rogaygua pejesalva, ndégui hína Abraham ñemoñare añetete. Che niko aju aheka ha asalva hag̃ua opa umi oñehundítavape.

Ñandejára Jesukrísto ñe’ẽ.

ÑAMBOGUEJY ÑANDE REKOVÉPE…

Oĩ ningo impuesto ñande japaga va’erãva ñane retãme ha ñande távape. Impuesto inmobiliario, impuesto municipalidápe. Oĩ avei IVA, japagáva jajoguáramo ñemuhãme, ha ombyatýva Ministerio de Hacienda. Ha umi impuesto repykuére gobiérno ha instituciónkuéra ojapo tape, escuela, hospital, omopotĩ ñande táva, oñangareko ñande rehe ha ñane pytyvõ. Iporã japaga ñande impuesto, ha jajerure avei ñande gobiérnope tome’ẽ jevy ñandéve upe ñande voi ñame’ẽ va’ekue ichupe.

Ñame’ẽ joja vaerã niko jareko háicha ha jaiporu háicha avei. Pe mboriahu oguatáva yvy rupi niko sa’ive oiporu tape umi imba’yrúvagui, ha oĩ voi imba’yru hetáva ave.

Umíva ningo oiporuve ha ome’ẽve va’erã avei impuesto. Pe impuesto a la renta personal, opaga va’erãva ogana hetavéva, ojejoko ñane retãme ko’ãga peve. Pe impuesto inmobiliario ojepagáva yvýre, peteĩcha ome’ẽ pe orekóva yvy pehenguemi ha pe orekóva yvy tuicha rasa, oñehenóiva latifundio. Nañande guata jojái ñaína upérupi.

Ha ou ningo Zaquéo, impuésto kovraha irríkova, ohechase Jesúpe. Ndareíri voi “sakéo” héra ko tapicha oikóva raka’e omoperõ mboriahúpe ha oipe’áva chuguikuéra opa oreko’ỹva. Ha mba’éichapa oguahẽ pe Ñandejára salvación Zaqueo rógape. Ha ojehechakuaa ñande rapicha, ha he’i Jesúpe omboja’otaha upe orekóva mboriahu ndive ha ome’ẽ jevytaha jo’a jo’a oiméramo omonda hapichágui.

Upéva ha’e salvación hína umi pokarẽ ha monda rupi irríkóva peguarã. Tome’ẽ upe oreko rasapávagui, mboriahu ohupytyve haguã oikotevẽva.

Pa’i Jasy.