Ñahendu Hesu. Miércoles 33º Durante el Año

Escucha el evangelio y la reflexión en: https://youtu.be/_RgtmBAj1og

Miércoles 33º Durante el Año

Lucas 19, 11 – 28

Jesús oñe’ẽ ohóvo oñemo’aguĩvo Jerusaléngui. Ha maymávante oimo’ã Ñandejára Rréino outamaha katuete. Upémarõ osẽ omombe’u chupekuéra ko káso: Oiko va’ekue ndaje raka’e peteĩ kuimba’e, poguasu ra’y, oho va’erãva mombyry tetã ambuépe oñemoingo hag̃ua rréi ramo, ha upéi ou jey hag̃ua hetãme mburuvicha ramo.

Osẽ mboyve, ohenói 10 hembiguáikuérape, ha peteĩ-teĩme ome’ẽ heta pláta. Upéi he’i chupekuéra, “Pemomba’apo ko ahejáva peẽme aju jey peve.” Umi hetãgua katu nda’ija’éi ra’e hese, ha omondo hikuái henonderã peteĩ aty he’i va’erã hese: “Ndoroipotái kóva ore rréirã.”

Opáichavo, oñemoingo chupe rréi ramo, ha upéi ojevy hetãme. Og̃uahẽ rire, ohenói umi pláta oheja va’ekuépe oikuaa hag̃ua mboýpa omomemby chupe hikuái ra’e. Pe tenonde oúva he’i chupe, “Karai, amomba’apo niko ndéve nde pláta ha imemby ndéve 10 jevyve.”

Huvicha osẽ he’i chupe, “Iporã che ra’y. Kuimba’e katupyry niko nde. Ha pe michĩmi aheja vaekue ndéve remomba’apo porã haguére, amoĩta nde pópe 10 puéblo reisãmbyhy hag̃ua.”

Upéi katu oñemboja ambue ha he’i chupe, “Karai, ku pláta reheja va’ekue chéve niko amomemby ndéve 5 jevyve.” Ha upévape pe rréi he’i, “Nde pópe opytáta 5 puéblo.” Pe tapykue oúva katu he’i chupe, “Karai, kóina ápe nde pláta. Añapytĩ porã, ha upéi añongatu ani hag̃ua okañy mba’e. Akyhyje ndehegui. Aikuaa niko nde po pohyiha, reñemomba’eha ne mba’e’ỹvare jepe, ha remono’õha reñemitỹ’ỹ haguépe.”

Upépe, pe rréi he’i chupe, “Ne tembiguái ate’ỹ. Ne ñe’ẽ ne rundi. Ha reikuaa ramo che po pohýiha, añemomba’eha che mba’e’ỹvare, ha amono’õha añemitỹ’ỹ haguépe, niko eraha va’erã mo’ã che pláta emoĩ ikatuhápe oñemomba’apo. Péicharõ, aju jeývo, reme’ẽ jey va’erã mo’ã chéve imemby reheve.”

Upépe, pe rréi osẽ he’i, “Peipe’a chugui pe pláta ha peme’ẽ pe 10 omomemby va’ekuépe.” Osẽ katu he’i chupe hikuái, “Karai, ha’e niko oguerekóma 10.” Pe rréi katu he’i, “Ha’éta peẽme peteĩ mba’e. Pe heta oguerekóvape oñeme’ẽvéta. Upe oguereko’ỹvagui katu, pe michĩmi oguerekóva jepe, ojepe’áta chugui. Ha umi che rehe ija’e’ỹva katu, peguerúta ha pejuka chéve ko che renondépe nda che potái haguére huvichárã.”

Ñandejára Hesukrísto ñe’ẽ.

ÑAMBOGUEJY ÑANDE REKOVÉPE…

Pe tapicha okyhyjéva ndojapói mba’eve. Oñemboty ha okañy. Pe kyhyje ningo ñanembopy’a mirĩ ha ñanemokangy, ñanembopyta ryrýi ha ñanemboguevi.

Jakyhyjéramo ndajavale mo’ãi Ñandejára kokuépe ñamba’apo haguã ikuénta haguãicha. Jajerure aipóramo Ñandejárape, che irũ ha che reindy, tañanembopy’a guasu ikatu haguãicha ojevale ñande rehe.

Pa’i Jasy.