Ñahendu Jesús Ñe’ẽ. Jueves 33° Durante el Año

Escucha el evangelio y la reflexión en: https://youtu.be/8f9_PCT5jsY

Jueves 33 Durante el Año Lucas 19, 41 – 44

Ha og̃uahẽvo hikuái Jerusalén ypýpe, ha omañávo hese, Jesús ojahe’o. He’i: Ikatúmo ra’e ko árape, peẽ Jerusalengua peikuaa mba’épa he’ise py’aguapy. Okañy pende hegui, ha ndaikatúi pehecha. Ág̃ante og̃uahẽne peẽme ára, ho’ávo pende ári mba’e ivaíva.

Umi pende rehe ija’e’ỹva omopu’ãne ág̃a tápia pende jerére, ha pende jopy va’erã opa guio. Peñehundíta ha pemanombáta. Ha pende rógagui katu ndopyta mo’ãi ita ojo’ári. Péicha ojehúta peẽme nda pe hecha kuaái haguére pe ára Ñandejára ou hague pene andúvo.

Ñandejára Jesucristo ñe’ẽ.

ÑAMBOGUEJY ÑANDE REKOVÉPE…

“Heta idéa ha proyecto porã opa rei mboriahu akãme”, he’i ningo ñe’ẽ. Oĩ umi proyecto ha tembiapo ñaha’ãva ñande rógape guarã. Oĩ avei tembiapo ñaha’ãva ñande barriope, ñande comunidad pe, ñande távape ha oĩ avei tembiapo guasu ñaha’ãva ñane retãme guarã. Ha jajapo umíva jahayhúgui ñande familia, ñande comunidad, ñande táva ha ñane retã. Jahechase niko osẽ porãramo tembiapo. Ha heta ñeha’ãme ko osẽ ñandéve.

Jahecha ñande rapykuere mbeguekatu ha sa’i sa’ípe oiko ohóvo pe jaipotáva. Ñahenóiramo ñane irũrã ikatu ijaty una partida, ha upéi katu tapére okúi ohóvo.

Sapy’ante ko avei iñate’ỹ lo mitã, ndoúi, térã ou pokã pokã. Ha umíva oguapy ñande rehe, ñanemokangy, ha japoiséma, jaguapyséma avei ñande ha jajehejase.

Jesús oñandu avei upéva hetãre. Heta oñeha’ã hesekuéra ombo’e Ñandejára oipotáva, ombyaty chupekuéra, ohenói hetápe iñirũrã. Ha amo ipahápe oñandu irariha ichugui umi hetãgua. Oipytyvõ rangue chupe umi karai guasu kuéra tetã Israel ruvicha, opu’ã hese ha ohundise ichupe.

Opáichavo Jesús oguata iñirũ nguéra ndive. Sa’i sa’ípe oho hese ha ndoguevíri. Opu’ãramo jepe henondépe Aña rembiguái ojokoséva Ñandejára rapére oguatáva. Ani jaguevi avei ñande, che reindy ha nde che irũ. Ani ñasẽ upe Ñandejára rapégui. Sa’i sa’ínte jepe jaguatáramo upéva ha’e semilla porã tekotevẽva ñañotỹ heñói haguã tekove pyahu. Ikatúko ñande ndajahechái mba’e okakuaapáramo upe ñañotỹ va’ekue ha ndaja’úi hi’a. Ñande rapykuéri oúva ombyatýne.

Pa’i Jasy.