Ñahendu Jesús Ñe’ẽ. Miércoles 8ª Tiempo Durante el Año

Escucha el evangelio y la reflexión en: https://youtu.be/fHuj2wKVosA

Miércoles 8ª Semana TDA

Marcos 10, 32-45

Jesús ha idisípulokuéra oho Jerusalénpe. Jesús katu oñemotenonde chuguikuéra. Oĩ avei hapykuérikuéra ohóva, ha umíva kyhyjepópe oho. Jesús omoha’eño jey umi 12 idisípulo ha he’i chupekuéra upe ojehútava chupe: — Jaha niko hína Jerusalénpe.

Upépe oĩta che moĩva pa’i kuéra ruvicha ha Moises léi ombo’éva pópe. Ha’ekuéra katu ojeruréta ajejuka haguã. Upéi che moĩne ágã hikuái pytagua pópe, oñembohory haguã che rehe hikuái. Che nupã ha che mosãingo rire kurusúre katu, aikove jeýta mbohapy ára rire.

Santiágo ha Juan, Zebedeo ra’y mokõivéva, oñemboja Jesús rendápe, ha he’i chupe: — Mbo’ehára, romba’ejerurese niko ndéve.

Jesús oporandu chupe kuéra: — Mba’éiko peipota.

He’i hikuái chupe: — Ágã reguapývo ne Rréino pe, na eheja oréve toroguapy mokõive nde ykére.

Jesús he’i chupekuéra: — Ndapeikuaái ete mba’épa pejerure hína. Peime nga’u piko pehasa asy haguãicha, che ahasa asytaháicha.

Ha’ekuéra he’i: — Héẽ, roime.

Jesús he’i chupekuéra: — Añete ha’e peẽme, peẽ pehasa asy vaivéta hína che hegui.
Peguapy haguã che ykére katu, nda’ijái chéve ame’ẽ avavépe. Che ru upéva ome’ẽta umi ha’e oiporavo vaekuépe.

Umi 10 idisípulo ohendúvo upéva, ipochypa Santiágo ha Juan ndive. Ha Jesús ohenói chupekuéra ha he’i: — Peẽ niko peikuaa umi rrománo kuéra, he’íva ijehe ñande ruvichaha, mba’éichapa ipo pohýi ñane ndive.

Peikuaa avei mba’éichapa poguasukuéra ojopy umi ipo guýpe oĩva ndive. Pende apytépe katu ndaupéichai vaerã. Upéva rangue, pe tuichaséva pende apytépe toiko pene rembijokuái ramo. Ha pe itenondeséva pende apytépe, toiko opavave rembiguáirõ.

Che niko ndajúi tembiguái rekávo. Aju aiko haguã tembiguáirõ ha ame’ẽ haguã che rekove ojesalva haguã heta.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Umi omandaségui itaryrýiva niko oñemboja jepi mburuvicha guasu ha karaikuéra rehe. Ojechauka ijykére opavave renondépe. Hesu katu he’i apóstolkuérape, ha ñandéve avei che reindy ha che irũ, ndaupéichai va’erãha. Ha upepete voi Hesu oporandu ichupekuéra ha ñandéve ave, ñaimépa ñañemoĩ haguãicha tembiguairõ, ñañangarekóvo ñande rapicháre.

Ñaimépa jahupi haguã ipohýi kuéte ñambovevúivo ikangývape, ñame’ẽvo ñande jehegui ha ñande rekove jepe ñande rapicháre, ha’e ojapo haguéicha.

Pa’i Alberto Luna.