Ñahendu Jesús Ñe’ẽ. Jueves 8º Tiempo Durante el Año

Escucha el evangelio y la reflexión en: https://youtu.be/Vz4-6d_j7sg

Jueves 8º Durante el Año Marcos 10, 46-52

Jesús ha idisípulokuéra oguãhẽ Jericópe. Ha osẽvo hikuái upégui, heta umi ohóva hapykuérikuéra. Pe tape yképe katu oguapy hína peteĩ tupãmba’e ojeruréva, ha ohecha’ỹva. Héra Bartiméo, Timéo ra’y. Ha ohendúvo Jesús ku Nazaretgua, ohasaha ohóvo hína upe rupi, oñepyrũ osapukái: — Nde Jesús Mesías, che poriahuverekomína.

Heta katu oĩ ojeréva ha he’íva chupe okirirĩ haguã. Ha’e katu hatãve osapukái: — David ra’y, ore poriahuverekomína.
Upépe Jesús opyta ha he’i: — Peje chupe tou.

Ha he’i hikuái Bartiméope: — Pya’éke epu’ã eju. Nerenói niko hína.

Pe ohecha’ỹva oity ijahoja, opo opu’ã ha oñemboja Jesús rendápe.
Jesús oporandu chupe: — Mba’éiko reipota ajapo nde rehe.
Pe ohecha’ỹva he’i chupe: — Mbo’ehára, ahechasemínteko.
Jesús he’i chupe: — Terehóntema. Che rehe rejerovia haguére rekuera.

Upepete pe ohecha’ỹva ohecha sapy’a, ha oho Jesús rapykuéri.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Akañyete vera. Ndaikuaái moõgotyopa ajapíta. He’i ningo lo mitã ndohecháiramo mba’éichapa osẽta hína javorái kuágui. Oñeñandu pe tapicha ohecha’ỹ vaicha, oiméva hína pe tape yképe Tupãmba’e járaicha ojerure.

Ha’e ningo ikatupyry voi mba’e jerurépe, oikógui ojerure opa ohasávape. Ha ko’ãga ñanembo’e mba’éichapa jajerure va’erã Ñandejárape jahupyty haguã pe jaipotáva. Ha’e osapukái hatã voi, ipy’aite guive ohenói Jesús pe. Ha oiméramo jepe omokirirĩséva ichupe, ha’e nopenái.

Upépe katu hatãvéntema osapukái, oñehenduka peve Jesús pe. Ojerovia ha’e Jesús noñembotavýi chéne haguã ohendu ha ohecháramo ichupe. Ha péicha oiko, ha’e ojerovia haguéicha. Jesús ohendu ha ohenói chupe. Upépe katu ikyre’ỹvéntema. Opo voi opu’ã ñande ra’y, omombo ijao jepe ha oguahẽ Jesús rendápe omombe’úvo ichupe pe oipotáva.

Tekotevẽ ñande avei ñañembo’e hatã ha jaiko pe jaipotáva rapykuéri. Ani ñane kangy ha ñaimo’ãgui Ñandejára nañanerendúi chene haguã, japyta jey pe tape yképe.

Térã katu ñatĩgui ñande rapicha he’ívagui ñakirirĩma ha jaguevi. Jajerovia va’erã ñaguahẽne haguã avei Jesús renondépe. Japokóne haguã hese. Ñahendúne haguã he’ívo ñandéve: Mba’épa reipota ajapo nde rehe. Ha ja’évo pe jaipotáva, tome’ẽ ñandéve. Ha pe ohecha’ỹ va’ekuéicha avei, upekuévo tajahupyty pe mba’e iporãvéva: jahecha Jesús pe, ñañandu ichupe, ha ñamoirũ ichupe.

Pa’i Alberto Luna.