Ñahendu Jesús Ñe’ẽ. Martes 5º Tiempo Durante el Año
10 febrero, 2025Ñahendu Jesús Ñe’ẽ. Domingo 6º Tiempo Durante el Año
15 febrero, 2025
Escucha el evangelio y la reflexión en: https://youtu.be/b44D9jFTgx4
Miércoles 5° Tiempo Ordinario
Marcos 7, 14 – 23
Upéi Jesús ohenói opavavépe ha he’i chupekuéra: — Pe che rendúke opavave, jahecha nahesakãipa peẽme ko ha’étava.
Mba’eve ja’úva niko na ñane mongy’ái. Umi mba’e ñane korasõgui osẽvante pe ñane mongy’áva. Peẽ pende apysáva, pehendu.
Jesús oike hógape ha oheja opavavépe okápe. Upépe idisípulokuéra oporandu chupe mba’épa pe he’ise va’ekue. He’i chupekuéra ha’e: — Peẽ ave piko ndapeikuaái. Mba’eve oikéva ñande juru rupi niko ndaikatúi ñane mongy’a. Ndohói niko ñane korasõme. Ñande retepýpente oho ha upéi osẽ jey ñande hegui.
Upéicha he’ívo niko Jesús he’ise opaichagua tembi’u ipotĩha. He’i avei: — Pe osẽva ñane korasõgui, upéva hína pe ñane mongy’áva. Ñane korasõgui niko osẽ opa mba’e vai, jejuka, ñemyakãratĩ, teko vai, monda, japu, ha ñe’ẽ rei ñande rapicháre. Opa ko’ã mba’e vai osẽ ñane korasõgui ha ñane mongy’a.
Ñandejára Jesucristo ñe’ẽ
ÑAMBOGUEJY ÑANDE REKOVÉPE
Kuimba’e térã kuña ipy’a porãva ha heko marangatúva ndojekuaái ijapére, ijaóre, térã umi mba’e orekóvare. Pe ijapekue niko sapy’ánte tuicha ñanembotavy.
Oiméramo ñande rapicha oúva kampáñagui, térã oikóva bañádope, ndaijapellido guasúi, okaru pokã, oikóva oga’ípe, oñemondéva ao ha sapatu ndaha’éiva umi imarkapáva, indígena mba’éramo katu, mbyky voi oñembo’yke haguã ha ojerereko haguã mba’eve ndovaléi ramo guáicha. Oĩ voi okyhyjéva mboriahúgui mondaha ramo guáicha.
Ha oguahẽramo peteĩ ijao porã imarkapáva, áutope oguatáva, hóga porã, ijapellido joapy, ojerereko karai guasúramo guáicha. Oĩ avei omosaingóva kurusu, medalla ha rosárioma katu ijajúri, ojovasáva y karaípe oikévo tupaópe ha ijapéguio ha’ete ku imba’e porãtava mante voi. Opáichavo pe ñande apekuénte nañandeapói, ivai ramo nde’iséi pe ñande py’a ivaitaha. Ha iporãramo nde’iséi pe ñande py’a iporãtaha.
Ñama’ẽ va’erã mba’épa osẽ ñande py’águi. Mba’épa ñañandu ñande rapicháre, ha mba’eichagua ñe’ẽpa jaiporu. Osẽpa tie’ỹ ha ñe’ẽ rei ñande jurúgui, terãpa pochy ñande py’águi. Hesu ñanekonvida hína che irû ha che reindy, ñañangarekove haguã ñande py’áre. Ani jajepy’apy ñande apénte ñambojegua, ha ñane korasõ rogapy katu puerkésa opyta ñande hegui.
Pa’i Alberto Luna.