Ñahendu Hesu Ñe’ê. Domingo 09 de febrero

Escucha el evangelio y la reflexión en: https://youtu.be/7DZOJs27Oqw

Domingo V Tiempo Ordinario Ciclo A Mateo 5, 13 – 16.

Upérõ Jesús he’i idisípulokuérape: – Peẽ niko ku jukýicha hína ko yvy apére. Pe juky nahe’ẽvéi ramo niko ndikatu véima ñamohe’ẽ jey. Mba’everãma na’iporãi. Ñamombo okápe ha oñepyrũmba hese.

Peẽ niko ku mba’e rendýicha hína ko yvy apére. Peteĩ táva oĩva sérro ru’ãme niko ndaikatúi jajaho’i. Avave niko nomyendýi lampĩu ha upéi omoĩ kambuchípe térã tupa guýpe. Yvate katu omoĩ, ohesape hag̃ua opa pe óga ryepy. Péichake avei peẽ. Peñeha’ã pehesape opavave renondépe, ha tojehecha pene rembiapo porãngue, ha tomomba’e guasu pende Ru, yvágape oĩvape.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Oime niko he’íva: Che rógapente añembo’e, che kotýpe, che ñoháme, che nicho renondépe, che py’apýpe añe’ẽ Ñandejára ndive, amoĩ che rekove ha opa mba’e ipópe. Hesu voi niko he’i va’ekue natekotevẽi ñañembo’e haguã ñañemoĩ opavave renondépe, naiporãi ñamoherakuã jajapóramo ayuno, Tupãnte oikuaa va’erã he’i Hesu.

Ko’ápe katu ñahendu he’i tekotevẽha jajapo tembiapo porã ñande rapicha renondépe, oñandu ha ohecha haguã opavave. Ndaha’éi ñande japyta porã haguã, térã oñeñe’ẽ porã haguã ñande rehe, Tupã oñemomba’e guasu haguã uvei.

Pe juky niko ojehe’a ha hyku vaerã tembi’úpe omohe’ẽ haguã upe já’úva, opytáramo ha’eño, ndoikéiramo tembi’úpe ha’e naiporãi mba’everã. Upéicha avei upe tataindy hendýramo ha’eño, térã oñemoĩramo tupã guýpe ndohesapéi avavépe.

Ha upéicha avei ñande jarekóramo ñande jerovia kañymby, ñande, tupaogua haguére jaikóramo ñatĩ ha ñane tĩndy ñande rapichakuéra apytépe, ha ndajajapóiramo mba’eve iporãva ñande rogagua rehe, ñande comunida rehe, ñande capilla, ñande escuela, ñande vesino kuéra ndive, jakyhyje ha ñakirirĩramo, ñande ate’ỹgui nañasẽiramo jajotopa ha ñamba’apo, ndajahejáiramo ñande rapykuérepe mba’eve iporãva, upéicharamo upe ñande jerovia ha ñande rekove naiporãi mba’everã.

Papa Francisco he’i ñandéve: “Ñasẽ, ñasẽ ñamoguahẽ opavavépe Jesucristo rekove. Che aipotave peteĩ Iglesia oñeaccidenta, ojekutu, ha oñemongy’áva osẽ haguére kállepe, ambue iglesia hasy katúvagui, oñemboty ha oñeñongatúgui oiko porãse haguére. Ndaipotái peteĩ Iglesia ojepy’apýva ijehe año ha ha’enteséva, amo ipahápe oñeñapytĩmba haguã opytávo tembiaporã sa’i ha jepy’apy javoráikuápe

Oiméramo upe ñande py’apy vaerã añetéva ha ñanemyangekóiva, upéva ha’e hina jahecha hetaite ñande rapicha ikangy ha okañýva pytũmbýpe noñandúigui Hesu mborayhu, ityre’ỹva ndaijatýigui hapicha ojeroviáva ndive, ndoikuaáiva mba’e ojapóta hekovemígui”. (Evangelii Gaudium N° 49).

Pa’i Alberto Luna.