Ñahendu Hesu Ñe’ê. Domingo 12 de enero

Escucha el evangelio y la reflexión en: https://youtu.be/zwR6SyhzGeg

Ñandejára Hesukrísto ñemongarai. Ciclo A Mateo 3, 13 – 17.

Jesús osẽ oho Galiléagui Juan rendápe. Oho Juan omongarai haguãicha chupe Jordánpe. Juan katu nomongaraiséi Jesúspe. He’i chupe: — Nde uvei niko chéve che mongarai va’erã. Ha piko mba’éicha rupi nde reju che rendápe.

Jesús katu he’i chupe: — Marãve ndoikói. Iporã niko jajapopa hekópe Tupã oipotáva. Ha Juan omongarai chupe. Ikarai rire, osẽvo pe ýgui, yvága ojepe’a ha Jesús ohecha Ñandejára Espíritu oguejýva hi’ári ku pykasúicha. Upévo oñehendu peteĩ oñe’ẽva yvágape, ha he’íva: — Kóva hína che ra’y ahayhúva, che mbovy’áva.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Oime niko túva ha sy he’íva: roñeha’ã ore famíliare ndoroipotáigui oiko ore roiko haguéicha, roipota tuichave mba’e ore hegui, tosẽ ichugui kuéra karai guasu, kuñakarai guasu. Ha upéicha omoinge imemby ha ita’ýra kuéra akãme upe mboriahu ha upe jeiko opavave oiko háicha naiporãiha, tekotevẽha oñakãrapu’ã ha oñemoĩ hogaygua ári ojeapo haguã mávaramo. Ha péicha heta oime otĩ ha omongañýva ha’eha mboriahu memby, campesino, indígena térã bañadogua.

Ñahendu San Mateo omombe’u Hesu ouha Galiléagui. Ha jaikuaa niko upe Galilea ndaha’éi hague tetã oñemomba’e guasúva, ha upégui osẽva ndaha’éi voi Israélpe ojehecha ramóva. Tupã katu ou haguã ko yvy apére oiporavo upéva upe tetã ha ojevale umi tapicha upépe oikóva rehe, María ha José, oiko haguã ha’e kuéraichagua, oiko haguã ijapytépekuéra ohayhu ha omomorãgui upe hekove. Upévare Tupã ra’y oñehenói va’ekue Hesu Nasaregua, Ña María memby ha Karai José, ku carpintero, ra’y.

Oguahẽvo Hesu oñemongaraiuka haguã Juan Bautísta pórupi rrío Jordánpe, Juan osẽ he’i Hesu tuichave mba’eha ichugui ha upévare ha’e hina upe omongarai va’erãha ichupe. Hesu he’i Juanpe ndaha’eiha upéicha Tupã oipotáva oiko, ha Hesu ojapo hekópe upe Túva Ñandejára oipotáva: Pe tuichavéva ojayvy va’erã upe michĩvéva renondépe, ha pe mburuvicha oiko va’erã hapicha kuéra rembiguáiramo.

Mba’épa ere che irũ ha che reindy, ñande ave jaiko ramo Hesúicha, ndouiva oñemoĩ avave akã ári, ndouiva ojapóvo avavégui hembiguái, ñanemoirũva, oguatáva ñande ykére ha oñandukáva ñandéve mba’éichapa tuicha Tupã Ñandejára mborayhu.

Pa’i Alberto Luna.