Ñahendu Hesu Ñe’ê. Domingo 20 de octubre

Escucha la reflexión en : https://www.youtube.com/watch?v=Yd2YkBY3q50&feature=youtu.be

Ñahendu Hesu Ñe’ê. Domingo 20 de octubre

Lucas 18, 1 – 8.

Jesús omombe’u idisípulo kuérape peteĩ káso ohechauka hag̃ua chupe kuéra mba’éichapa oñembo’e vaerã, ani hag̃ua ipy’a kangy.

     Oiko vaekue ndaje raka’e peteĩ puéblope peteĩ juez ndokyhyjéiva Tupãgui ha nomomba’éi etéva voi avavépe. Ha upépe ndaje oiko vaekue avei peteĩ viúda py’ỹinte ohóva hendápe ha he’ímiva chupe, “Ág̃a ku pléito arekóva hína oúvo ndéve, ke na ehecha osẽ porã hag̃ua chéve”. Ñepyrũrã pe juez nopenái hese. Upéi katu he’i ipy’apýpe, “Ndakyhyjéi ramo jepe Ñandejáragui, ha namomba’éi ave avavépe, aipytyvõta chupe. Ỹro niko manterei ág̃a oúne che rendápe, che monguerái peve.”

Upéi katu Jesús he’ive: Pehechápa hína mba’épa he’i pe juez reko karẽ.  Peẽ piko peimo’ã Ñandejára noipytyvõ mo’ãi umi ha’e oiporavo vaekuépe, ára ha pyhare oñembo’éva chupe. Peimo’ã nga’u piko ha’e oñeha’ãrõukáne hag̃ua.  Nahániri. Pya’eterei niko pene pytyvõ vaerã. Ha ág̃a che aju jey vove yvy ári, ajuhúnepa Ñandejárare ojeroviáva.

Ñandejára Hesukrísto ñe’ẽ.

ÑAMBOGUEJY ÑANDE REKOVÉPE…

                Pe mitã niko oiméramo oreko oipotáva ohóne ojerure asy isy térã itúvape upe oipotáva, noñeme’ẽiramo ichupe ha oipota iterei ramo ojerure jevy jevýne. Ikatu voi hasẽ ha oñembyasyka opoko haguã isy ha itúva py’áre. Ha ilája vaimíramo ikatu voi ojepokyty yvýre, osapatea, hasẽ soro ha osapukái. Ha péicha omohu’ũne ichupe kuéra ágã kane’õ ha kueráigui jepe ome’ẽ haguã ichupe oipotáva. Upéicha avei oiko upe káso Hesu omombe’úvape. Ndaha’éi imba’e porãgui pe juez ome’ẽva upe ojejeruréva. Ikuerái ha ikane’õgui pe kuñakarai poriahúguinte.

                Pe viúda guaiguĩ rehe niko noñepenái. Mba’evérõ guáicha upe karai juez aña renondépe. Ndaikatu oho oñe’ẽ hatã mba’e ichupe. La hembýva pe viúdape oho oime ára ha ára henondépe, omokane’õ peve. Péva ñanemomandu’a avei mba’éichapa heta jaiko vaerã mburuvicha kuéra rapykuéri jahupyty haguã ñaikotevẽva ñande barrio, escuela, capilla, ñande comunidad peguarã. Amo ipahápe ñamokane’õ rire jareko haguã upe jahekáva.

                Ha upéicha avei, he’i Hesu, oiméramo jaipota ha jahupytyse añete Ñandejára remime’ẽ, jaiko vaerã hapykuéri, jajerure jevy jevy, jajerure asy, ñamyangekói santo kuéra ha Tupãsýme ñanemoirũ haguã, jajapo promesa, ha jaikuaauka ñande rapicha kuérape toñembo’e avei ñane ndive upe jaipotáva jahupyty haguã. Ha Hesu he’i, umi tapicha aña jepe niko kueráigui jepe ome’ẽ upe jajeruréva, ko’ýteve Ñandejára ohendu ha ome’ẽne ñandéve umi mba’e porã jajeruréva, ha ndaha’éi kuerái térã kane’õgui, ome’ẽne ñandéve py’a porã ha mborayhu pópe. Mba’épa oime che reindy ha nde che irũ, upe reipota asýva Ñandejára ome’ẽ ndéve.

Pa’i Jasy.