Ñahendu Hesu Ñe’ê. Lunes 21 de octubre

Escucha la reflexión en : https://youtu.be/Q6ljUCPkwxw

Ñahendu Hesu Ñe’ê. Lunes 21 de octubre

Lucas 12, 13-21.

Upérõ osẽ peteĩ karai umi oñembyatýva apytégui he’i Jesúspe: — Mbo’ehára, ikatu piko ere che ryke’ýpe ome’ẽ hag̃ua chéve pe chéve otokáva upe ore ru oheja va’ekuégui.

 Jesús he’i chupe: — Che irũ, mávaiko che moĩ juez ramo peẽ mokõi pa’ũme.

 Upéi ojere he’i opavavépe: — Ani pende taryrýi. Mba’e pota rei ha mba’e jerereko heta niko ndoguerúi vy’a.

 Upéi katu oñemoĩ omombe’u chupekuéra ko káso:

Oiko vaekue ndaje raka’e peteĩ karai heta mba’e oguerekóva. Ha heta oñemitỹ haguéicha, heta ave omono’õ.  Ha he’i ipy’apýpe, “Mba’éiko ajapóta. Moõiko añongatupáta ko’ã mba’e, ko ndarekóiva hendaguã”.  Upéi katu he’i, “Aikuaáma mba’épa ajapóta. Aitypáta umi arekóva ha hendaguépe amopu’ãta tuichavéva. Umívape ijapáne pe amono’õ va’ekue”.  Ág̃a upéi ha’éne che jupe, “Hetáma niko rembyaty ha reñongatu. Umívare niko nde tuja peve reikovéta. Ikatúntema epytu’u, ekaru, emokõ ha evy’a”. Ñandejára katu he’i chupe, “Nde výro. Ko pyharépe remanóta. Ha mávape rehejapáta gua’u pe reñongatu va¡ekue”.

 Péichako ojehu umi oñongatupáva opa mba’e imba’erãiténte. He’i hikuái ijehe irríkoha. Ñandejára renondépe katu, imboriahu.

Ñandejára Hesukrísto ñe’ẽ.

ÑAMBOGUEJY ÑANDE REKOVÉPE…

Heta oĩ ñande rapicha ñane retãme ha avei ambue tetãme opu’ãva ára ko’ẽre oha’ã upe oikotevẽva okaru haguã upe árape ha sapy’ánte ndohupytýiva ijupe térã ifamília peguarã tembi’u ha oñenóva ñembyahýi reheve. He’i ningo upe Naciones Unidas ko ñane múndo hetakue ñaime háichape, 6 tapicha apytégui peteĩva okaru pokã, ohasa ñembyahýi. Ha upéva ha’e hina heta mba’asy, jeiko asy, kangy, mba’apo’ỹ ha ñemano voi rape, heta ñande rapicha peguarã.

Ha ñande jaikuaa avei ko ñane múndope oĩha tembi’u opavave okaru haguã. Ko’ã ñande rapicha iñembyahýiramo ndaha’éi hina ndaipórigui tembi’u, upéva rangue oime umi ombyaty rasapáva, ndoiporu mo’ãiva araka’eve umi orekóva, ha upeicharõ jepe nomboja’óiva upe orekóvagui hapicha ndive.

Hesu he’i ñandéve jajerereko haguã upeichagua taryrýi ha mba’e pota tarovágui. Ndaha’e mo’ãi hína ñande mba’e guasuve avavégui ñande rríko apasusũ haguére. Rei ñambyaty rasápa. Ikuentavéta ñandéve jahupyty rire upe ñaikotevẽva ñamboja’o ñande rapicha ndive.

Ndajaikuáai niko araka’épa ñane renóita hina Ñandejára. Ani ágã oguahẽ vove upe ára jahejapa umi ñambyaty vaekue ko’ápe, ndajaikuáai mávape guarãpa. Ha jaha ñande jajejuhu nandi ha perõ vera amo Ñandejára renondépe. Jajerure aipóramo che irũ ha che reindy, ani ñande py’a tarova ñambyaty haguã ñande jupe guarãnte, ha tañandepojera mieve ñande rapicha ndive.

Pa’i Jasy.