Ñahendu Jesús Ñe’ẽ. Martes 29° Durante el Año

Escucha la reflexión en: https://youtu.be/FiZ_kBTf-D4

Ñahendu Hesu Ñe’ê. Martes 29° Durante el Año

Lucas 12, 35 – 38

Upéro Jesús he’i idisípulokuérape:

     Peñembosako’íke ha ani peheja pene lampĩu ogue pendehegui.  Peime vaerã umi tembiguáicha oha’arõva ijárape ou jey mendahágui. Lampĩu ipópe oha’arõ hikuái upe okẽme, oipe’a hag̃ua ijárape ombotavove.  Ou porã vaerã niko umi tembiguáipe, ojevývo ijára ha ndojuhúi chupe kuéra oke hína.

Che ha’e peẽme, pe óga jára voi omboguapýne chupe kuéra mesápe ha ha’e voi omoĩne peteĩ-teĩme hembi’urã.  Ou porã va’erã chupe kuéra, hóga jára oúrõ ojuhu ipáype porã, tou jepe ra’e pyhare pyte térã ko’ẽ mbotávo.

Ñandejára Jesucristo ñe’ẽ.

ÑAMBOGUEJY ÑANDE REKOVÉPE…

Oiko ningo sapy’ánte ñande rógape upe túva ha sy oime aja, umi mitã nguéra oiko porãitente hina. Ágã katu osẽramo mba’e pe túva ha sy ha mitã nguéra opyta ha’eño, mbykyete oñepyrũ haguã oiko vai, oguapy ohecha téle ojapo rangue hembiapo, osẽnema katu oiko kállere, oñemongy’a, ndojahúi, ojapo guyryry upérupi, ha upéi ojevýramo itúva térã isy, sarambikue ojuhu.

Upéicha avei oiko jepi umi ñemba’apo hárupi. Oime aja patrón térã patróna, ndaipóri jurujái. Lo mitã hatã omba’apo, ijuku’a, ou ha oho ñande rapicha kuéra, pya’e oiko opa mba’e. Ágã katu patrón ndoúi ramo térã osẽ ramo oho, sa’ivéma ojeka’api, oguapýmane lo mitã ombopuku terere je’u, ha oikuaáramo hi’arétaha mba’e katu amóntema.

Hesu omombe’u peteĩ káso he’ívo ñandéve ñande patrón guasu ha’éva Ñandejára ome’ẽha ñandéve ñane rembiaporã, ha ndoikói ñanderapykuéri ñamba’apo haguã ichupe. Ha’e ndoipotái ñamba’apo ichupe guarã jajejopýguinte, upéva rangue ha’e oipota jajapo upe tembiapo ha’e ome’ẽva ñandéve ñande jehegui, ha jaipotágui.

Ha’e nañanemosãi ha oipota ñaime upe ñane rembiapópe ñande py’aite guive. Ha’e ojerovia ñandejehegui ñamba’apo porãtaha ára pukukue jave, ha jajeitýtaha upe ñane líñope. Jajapotaha upe jaikuáava jajapo vaerãha, tekotevẽ’yre avave oiko ñande rapykuéri mitãicha.

Opaichavo, che irũ ha che reindy, Ñandejára ñande rejáramo jepe ñamba’apo ñandejehegui, upéva nde’iséi hina opoiha ñande hegui ha ndou mo’ãiha ñanemoirũ ha ohecha upe ñane rembiapokue. Oúta ñande patrón he’i Hesu. Ñaimo’ã’ỹve jave. Ha ñande juhúvo ñaimeha kyre’ỹ pópe jajapo porãite ñane rembiapo, ñande guerohorýta, ñanemboguapýta imesápe ha ñanemongarúta, ha upépe ñandepiro’ýta ha javy’áta.

Pa’i Jasy.