Ñahendu Jesús Ñe’ẽ. Domingo III de Cuaresma

Escucha el evangelio y la reflexión en: https://youtu.be/Krrd-y5OQVE

Domingo III Cuaresma Ciclo A Juan 4, 5-15

Upérõ Samaria rupi ohasakuévo, Jesús og̃uahẽ Sicar puéblope. Upégui namombyrýi opyta pe yvy Jacob oheja vaekue Josépe imba’erã. Upépe avei oĩ ku Jacob ykua. Ha Jesús ikane’õgui, oguapy pe ykua ypýpe. Asaje pyte rupíma upéva, ha Jesús disípulokuéra oho puéblope ojogua hag̃ua ho’u va’erã.

Upe jave, og̃uahẽ y rekávo peteĩ kuña Samariagua. Jesús he’i chupe: — Eme’ẽmona chéve nde ymi.

Pe kuña katu he’i chupe: — Nde niko hudío ha che Samariagua. Mba’éicha rupi piko aipo ramo rejerure chéve y. (Hudíokuéra niko ndoy’úiva Samariagua kambuchígui).

Jesús he’i chupe:— Reikuaa nga’u ra’e mba’épa Ñandejára ome’ẽ kuaa ndéve, ha mávapa hína pe ojeruréva ndéve y. Reikuaa rire, rejerure va’erã mo’ã chéve, ha che ame’ẽne ndéve y ne moingove va’erãva.

Pe kuña he’i chupe: — Karai, mba’épe gua’u piko renohẽta ko ykua ipypukúva. Mba’éicha piko aipóramo reme’ẽta chéve y che moingove va’erãva. Ore ru ypykue Jacob niko oheja va’ekue oréve kóva ko ykua. Ha’ete voi, ha upéi ita’ýrakuéra hymbakuéra reheve chugui hoy’u va’ekue. Nde nga’u piko nde tuichave Jacóbgui

Jesús he’i chupe: — Oimeraẽ hoy’úva ko ykuágui niko ijyuhéi jeýta. Pe hoy’úva upe y che ame’ẽvagui katu, nda’ijyuhéi mo’ã véima araka’eve. Pe y chupe ame’ẽva, ku yvúicha opupúne ipype ha omoingovéne chupe opa ára g̃uarã.

Pe kuña he’i chupe: — Karai, eme’ẽmona chéve upe y upévagui. Péicharõ, nda che yuheivéi chéne, ha natekotevẽ mo’ã véima aju y rekávo.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Pe yuhéi ára aku ha kane’õ reheve ningo tuicha mba’e. Ndajajokói ndaha’éiramo y rupive. Hesu avei ikane’õ ha ijyuhéi; oheka avei ombogue haguã yuhéi ha ojerure petẽi kuñáme oúva y rekávo. Oñemongeta hikuái pe ýre. Hesu he’i pe kuñáme ha’e ouha ára ko’ẽre oheka y ha upéi ijyuhéi jeýnteha, ndoguéi ipype upe yuhéi. Ha Hesu he’i ichupe ha’e orekoha ome’ẽ haguã peteĩ y oporomoingovéva, omboguéva yuhéi opa ára guarã.

Ñande avei che reindy ha nde che irũ, ñande yuhéi ha jaiko ára ko’ẽre jaheka ha jadesea upe omyenyhẽvaerãva ñane korasõ, ñamuña upe ome’ẽvaerãva ñandéve vy’a ha py’aguapy.

Ha ñañandu avei umi vy’a jahupytýva sapy’arãnte ñande py’a rupi. Nañanemoyguatãi, ãgaiteramo guarã ñane korasõ opyta jey nandi ha ijyuhéi. Hesu katu he’i orekoha ñandéve guarã y porã ñanemoingovéva, mborayhu añete, yvúicha opupúva ñande pype, ndaha’éiva umi vy’a gua’u rei ohasa ha ñande reja rei vaicha.

ÑAÑEMBO’EMÍNA

Ñandejára Hesukrísto. Nde niko reikuaa porã mba’éichapa ore korasõ ijyuhéi ha oheka mborayhu, vy’a ha py’aguapy. Eme’ẽmína oréve upe y porã nde rerekóva, anivéma haguã ore py’a tarova. Eju nde embopiro’y ha emyehyhẽ ore korasõ. Amén.

Jajerure ñande avei Hesúpe upe y porã ha’e orekóva, upéva ningo ha’ete voi hina ouséva oiko ñande ykére ha opyta ñande py’ápe, anive haguã jaiko ñamuña umi ñanemyenyhẽ’ỹva. Ojerure haguéicha ko kuña, ja’e avei ñande Hesúpe: Che Jára, eme’ẽna chéve upe nde y porã anive haguã aiko cheyuhéi.

Pa’i Alberto Luna.