Ñahendu Jesús Ñe’ẽ. Lunes III de Cuaresma

Escucha el evangelio y la reflexión en: https://youtu.be/UO6jpuCKhqA

Lunes 3º Cuaresma

Lucas 4, 24 – 30

Jesús oguahẽ ramo Nazarétpe, he’i umi ijatývape tupaópe: Jaikuaa niko ndaiporiha proféta ojererohorýva ivállepe. Yma proféta Elías oikovépe, ndokyvéi va’ekue mbohapy áño rasa rupi. Tuicha ñembyahýi ou vaekue upérõ, ha heta omano. Ha hetárõ jepe kuña viúda Israélpe upérõ, Ñandejára nomondói vaekue Elíaspe umíva rendápe.

Omondo katu chupe peteĩ kuña Sareptagua rendápe, Sidón ypýpe. Umíva umi árape ave, heta va’ekue Israélpe umi lépragui hasýva. Eliseo katu omonguera peteĩmente, Naamánpe, Síriape oikóva.

Umi tupaópe oĩva hína upéva ohendúvo, ipochypa. Opu’ã ha omosẽ Jesúspe pe puéblogui.
Ogueraha chupe hikuái pe sérro ru’ãme, upégui omyaña ha oity haguã chupe. Jesús katu oñembohape ipa’ũ rupi kuéra ha oguata ohóvo.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

He’i háicha ñe’ẽ, mitã nguéra okakuaávo guyráicha oveve oho haguã ojeporeka hendaguãre ha ojaitypo ambue hendápe. Hesu okakuaávo osẽ avei hógagui oipykúi tape oheka mamópa Ñandejára omohenda chupe. Ha péicha avei ñande japo’o, jakakuaa ha ñasẽ ñande rógagui, ñande kora’ígui, ñagana tape ha ñañembokatupyry ñande rekovépe.

Ha jahecha Hesu ojevýrõ hógape, upépe oñandu ndojeroviaiha hese ivallegua. Ha ohechakuaa osẽ jevy va’erãha upégui. Ndopytái va’erãha ikorapy’ípe oiko vai hendivekuéra upépe, Ñandejára oikotevẽha hese omyasãi haguã iñe’ẽ mombyry mombyryve guáva ndive.

Ha ojehekýinte ha’e umi ojokose ha oitysévagui ichupe, ohasa ipa’ũ rupi ha osẽ oipykúi hape, ojagarra la múndo ipéchore Ñandejára rérape.

Ymaite guivéma voi ñahendu umi profeta Ñandejára ojokuáiva osẽha hógagui, ohejaha iválle, ikakuaa irũngue, ha ohoha mombyry oheka ha ombyaty umi okañývape. Ha ojapo ramo jepe mba’e guasu, hóga ha ivállepe mba’evérõ guáicha.

He’i ningo Ghandi, peteĩ karai guasu Marangatu Indiagua: Tenonderã hikuái nopenái che rehe, mba’evéramo guáicha che reko. Uperire katu opuka ha oñembohory che rehe hikuái, upéi chemuña ha che reityséma ave. Amo ipahápe katu aju péichape che che pu’aka hesekuéra.

Umi mbaretépe ñandejokoséva ikangýguinte péicha ojapo, oñandúgui ndaipu’aka mo’ãiha ñande rehe ndaha’éirõ garróte púpe. Upévare che irũ ha nde che reindy, ndajakyhyje va’erãi umi orronka hatãvagui, oime ramo añetegua ha iporãva rapikuéri jaiko.

Jahánte vaerã ñande rape rupi ñañemopa’ũ jahávo, Hesu ojapo haguéicha, jahupyty peve upe mba’e porã Ñandejára oñandukáva ñandéve jaheka haguã.

Pa’i Alberto Luna.