Ñahendu Hesu Ñe’ê. Jueves 19 de Diciembre

Escucha el evangelio y la reflexión en: https://youtu.be/vboDuXiHFWY

19 de diciembre: Feria de Adviento                                              Lucas 1, 5-25

   Herodes oĩ ramo rréi ramo Judápe, oiko vaekue peteĩ pa’i hérava Zacarías. Pa’i Abías ñemoñare vaekue niko ha’e. Hembireko hérava Isabel katu Aarón ñemoñare.   Mokõivéva hekojoja Ñandejára renondépe, ha ojapóva hekópe Ñandejára rembipota ha imandamiénto.  Zacarías niko nda’ita’ýrai Isabel ndaikatúigui imemby. Ha upéi ave, ha’e itujáma ha hembireko katu iguãiguĩma.

 Peteĩ jey, ija Zacarías ha iñirũ nguérape hembiapo haguã Tupaópe, Ñandejára renondépe.Ha ojapo háicha jepi pa’i kuéra, Zacarías oike pe kotýpe ojehapyhápe insiénso Ñandejára renondépe.   Pe insiénso otĩmbo aja, umi okápe oĩva oñembo’e joa.  Upe javete ojehechauka sapy’a Zacaríaspe peteĩ Ñandejára ángel. Oñemoĩ oñembo’y pe insiénso ojehapyha altar yképe.  Zacarías ohechávo Ñandejára ángelpe, opyta ijurujái ha okyhyje.  

Ñandejára ángel katu he’i chupe: — Zacarías, ani rekyhyje. Ñandejára ohendu ne ñembo’e. Ne rembireko Isabel imembýta, ha rembohérata pe mitã Juan.  Tuicha vy’a oguerúta ndéve, ha péicha avei heta oĩta ovy’áva ne ndive.  Nde ra’y niko Ñandejára rembiguáita hína. Ndo’u mo’ãi mba’eve omonga’úva chupe. Espíritu Sántogui henyhẽta onase mboyve guive.

 Hembiapo rupi heta Israelgua ohejáta hembiapo vai ha ojevýta Ñandejára gotyo.  Juan oúta pe Mesías ou mboyve, ha oúta Elías espíritu ha ipokatu reheve. Ha’e omoingo porãta túva kuéra ta’ýra kuéra ndive. Umi iñe’ẽ rendu’ỹva katu oikuaáta mba’éichapa iñe’ẽ rendu arã. Ha péicha ombosako’íta Israelguápe ojerovia haguã Ñandejára rehe.

 Zacarías oporandu Ñandejára ángelpe: —Mba’éicha piko aikuaáta péicha oikotaha. Che niko che tujáma ha che rembireko ave iguãiguĩma.

 Ñandejára ángel he’i chupe: — Che niko Graviel, Ñandejára rembiguái. Ha’e che mbou ne rendápe ame’ẽ haguã ndéve ko marandu porãite.  Ha ko’ágã, ndereroviái haguére ko’ã mba’e ha’éva ndéve, ne ñe’ẽngúta ojehupa peve umi mba’e ha’éva ndéve.

  Upe aja, opavave umi oha’arõva okápe Zacaríaspe, oporandu joa mba’érepa hi’areterei Tupao ryepýpe.  Ha osẽvo, Zacarías ndaikatúi oñe’ẽ chupe kuéra. Upépe ohecha kuaa hikuái oiméne ra’e oĩ ohecháva pe Tupao ryepýpe. Zacarías katu, ipo ha iñakã mante ombovava oikuaauka haguã oipotáva. Ha péicha opyta iñe’ẽngu.  Ha oikopávo hembiapo, pa’i Zacarías oho hógape.  Ko’ã mba’e ojehu rire, hembireko Isabel ou hye guasu, ha 5 mése aja nosẽvéi hógagui. He’i ipy’apýpe:  “Ñandejára ome’ẽ chéve kóva, anive haguã avave ojahéi che rehe”.

Ñandejára Hesukrísto ñe’ẽ.

ÑAMBOGUEJY ÑANDE REKOVÉPE…

Ikatu piko Ñandejára oñe’ẽ ñandéve. Ikatu piko ñahendu chupe ñande py’ápe he’iramo ñandéve mba’épa jajapo va’erã. Ñandejára oñe’ẽ ñandéve ha ñande avei ikatu ñañe’ẽ ichupe, he’i San Ignacio, ñañemongeta hendive ñañemongeta háicha ñane irũndive, py’aguapy ha torýpe.

Ñandejára ha’e ñane ánga jára, he’i niko avei San Ignacio, ha’e ikatu oike ha osẽ ñande pype oipota háicha, ñane sambyhy haguã tape porãre. Ha péicha che iru ha che reindy, ikatu porã hína nde eñandu Ñandejárape, nerenói ha ome’ẽ ndéve nerembiaporã. Umi mba’e ndejehegui ikatu’ỹva ejapo, ha’e oipotáma guive oikóta katuete.  Eñeprende hatãramo ijyváre, ndaipóri ikatu’ỹva.

Pa’i Jasy.