Ñahendu Hesu Ñe’ê. Lunes 24 de febrero

Escucha el evangelio y la reflexión en: https://youtu.be/14OACcHBkw8

LUNES VII Tiempo Ordinario Marcos 9, 14-29

Jesús ha umi 3 idisípulo oguejývo pe sérrogui, ohecha hetaha umi ijatýva umi disípulo
opyta va’ekue jerére. Oĩ avei upépe umi Moises léi ombo’éva oñoñe’ẽ apíva hína hendive
kuéra. Ohechávo Jesúspe hikuái, opavave oho pya’e huvãitĩvo ha ohecha ramo joaite chupe.
Osẽ ha’e oporandu chupe kuéra: — Mba’ére mba’éiko peñe’ẽ hína.

Osẽ peteĩ he’i chupe: — Aru niko ndéve kuri che ra’y. Oguereko peteĩ demóño omoñe’ẽngúva chupe. Mamo rupi rei pe demóño oity jepi chupe yvýre. Ijuru ryjuipa hamba’e, hãi omopururũ ha upéi hatãmba opytávo. Ajerure nde disípulo kuérape omosẽ haguã chugui pe demóño ha nda’ipu’akái hikuái hese.

Jesús he’i chupekuéra: — Háa, peẽ tekove jerovia’ỹ. Araka’e peve piko aime vaerã pene
ndive. Araka’e peve piko aikóta pende reheve. Peru chéve pe mitã.

Ogueraha hikuái pe mitãrusu Jesús rendápe. Pe demóño ohechávo Jesúspe katu, oityvyro
pe mitãrusúpe ha ho’a ha ojapajeréi yvýre, ijuru ryjuipa. Jesús oporandu itúvape:

— Araka’e guive piko péicha oiko.

Itúva he’i: — Imitã guive. Ha hetáma ojukase chupe. Oity jepi chupe tatápe térã ýpe. Ijárõ
ndéve, na ore poriahuvereko ha ore pytyvõmi.

Jesús he’i chupe: — Mba’éreiko ere chéve ‘ijárõ ndéve’. Umi Ñandejára rehe ojeroviávape guarã niko ndaipóri mba’eve ikatu’ỹva.

Upépe pe mitãrusu ru osapukái: — Ajerovia niko hese. Che pytyvõna ajeroviave haguã.
Jesús ohechávo hetaveha umi oñembyatýva, oja’o pe demóñope: — Nde espíritu aña.
Ndéve ha’e, esẽ chugui ha anive mo’ãke eike pype.

Pe demóño hatã osapukái ha oityvyro pe mitãrusúpe. Upéi katu osẽ. Pe mitãrusu katu
opyta pe yvýpe ku omanórõ guáicha. Oĩ voi osẽva he’i, omanoite hague. Jesús katu ipojái
ipóre, omopu’ã chupe ha pe mitãrusu oñembo’y.

Upéi Jesús oike peteĩ ógape ha idisípulo kuéra oporandu chupe ha’eñoháme:

— Mba’éreiko ndaikatúi kuri ore romosẽ pe demóño.

Ha Jesús he’i chupe kuéra: — Koichagua demóño niko ñembo’e ha ajúno rupi mante
ikatúva ñamosẽ.

Ñandejára Jesucristo Ñe’ẽ.

ÑAMBOGUEJY ÑANDE REKOVÉPE

Pe mba’e porã jaroviáva jahupytytaha, jaipotáva oiko ha ñamuñáva jake ha japáy jave jajeruréva Ñandejárape, upéva jahupytýta ha osẽta ñandéve, he’i Hesu. Ndajaroviapái
ha ñanepy’a mokõi ramo katu ndajajepoipái ñahuguaitĩvo, ñaha’ã kangy voi, ha upekuévo
jajavýma.

Pe aña ningo ñanemokangy ñande jeroviápe, ñande tyvyro voi ha ñanemborretovado
Ñandejára renondépe jepe. Upéicha ñañandu ramo che reindy ha nde che irü, tekotevẽ
jajerure ñande rapichápe toñembo’e ñande rehe, ha ñañembo’e mbareteve ñande, jajerure
asy Hesúpe, ojapo haguéicha pe karai, orekóva ita’ýra demóño poguýpe, sapukáipe
ojeruréva Hesúpe ipy’aite guive: Arovia che Jára, che pytyvõmína taimbareteve che
jerovia.

Pa’i Alberto Luna.